កាលពីថ្ងៃទី៣ ខែកក្កដា អង្គការសហប្រជាជាតិ បានព្រមានអំពីការរីកធំឡើងយ៉ាងរហ័សនូវបាតុភូតអាកាសធាតុធម្មជាតិ អេល នីណូ ដែលបានបន្ត និងឈានដល់កម្លាំងកាន់តែខ្លាំងក្លា ក្នុងរវាងខែកក្កដា និងខែកញ្ញា នេះ។ វាបង្កើតឲ្យមានលទ្ធភាពនៃការកកើតឡើងនូវបាតុភូតឧតុនិយមខ្លាំងក្លាហួសហេតុនានានៅជុំវិញពិភពលោក។
នៅក្នុងសេចក្តីប្រកាសមួយ ទីភ្នាក់ងារនៃអង្គការសហប្រជាជាតិ បានរៀបរាប់ថា ព្រឹត្តិបត្រស្តីអំពីអាកាសធាតុដែលត្រូវបានផ្សព្វផ្សាយឡើងជារៀងរាល់ខែដោយទីភ្នាក់ងារឧតុនិយមពិភពលោក បានបង្ហាញនូវការវិវត្តយ៉ាងឆាប់រហ័សនៃវគ្គនៃអេល នីណូ ដែលមានវិសាលភាពដ៏ខ្លាំងក្លា ក្នុងរវាងខែកក្កដា និងខែកញ្ញា នេះ។
ចំណុចស្ថានការណ៍ថ្មីនេះ បន្ថែមលើអ្វីដែលបានចេញផ្សាយនៅថ្ងៃទី២ ខែមិថុនា ដោយទីភ្នាក់ងារឧតុនិយមពិភពលោក (OMM) ដែលបានប្រកាសអំពីការជិតមកដល់នៃរដូវកាលអេល នីណូ។
យោងតាមទីភ្នាក់ងារឧតុនិយមពិភពលោក បាតុភូតអាកាសធាតុធម្មជាតិនេះ កើតមានឡើងជាធម្មតា រៀងរាល់ ២ឆ្នាំ ទៅ ៧ឆ្នាំ និងមានរយៈពេលពី៩ ទៅ ១២ខែ។ ទីភ្នាក់ងារនេះ ធ្វើលំអិតថា អេល នីណូ បង្កើនកម្តៅសីតុណ្ហភាពទឹកនៅភាគកណ្តាល និងភាគខាងកើតនៃមហាសមុទ្រប៉ាស៊ីហ្វ៊ិកអេក្វាទ័រ និងធ្វើឲ្យប្រែប្រួលក្នុងកម្រិតពិភពលោកនូវរបបខ្យល់ សំពាធអាកាស និងការធ្លាក់ភ្លៀង ហើយវាក៏ជះឥទ្ធិពលដ៏ខ្លាំងក្លាលើសីតុណ្ហភាពពិភពលោកនៅអំឡុងឆ្នាំដែលវាលេចឡើង។
លោកស្រីសេឡេស សូឡូ អគ្គលេខានៃទីភ្នាក់ងារឧតុនិយមពិភពលោក បានថ្លែងថា ៖ “បាតុភូតអេល នីណូ បានមានវត្តមានរួចហើយ និងបានរីកទំហំធំឡើងយ៉ាងឆាប់រហ័សដើម្បីឈានទៅដល់កម្រិតដ៏មហាខ្លាំងក្លា។ លោកស្រីបន្ថែមថា ៖ “វានឹងបង្កើននូវលទ្ធភាពនៃការកើតមានឡើងនូវគ្រោះរាំងស្ងួត ការធ្លាក់ភ្លៀងខ្លាំងក្លា ព្រមទាំងហានិភ័យនៃរលកកម្តៅនៅលើផ្ទៃដី និងនៅលើសមុទ្រនៅក្នុងតំបន់ជាច្រើននៅលើពិភពលោក”។ បាតុភូតនេះមានលក្ខណៈជាចង្វាក់។ វាប៉ះពាល់ដល់អាកាសធាតុពិភពលោកជាច្រើនខែតាមរយៈការជះឥទ្ធិពលដូមីណូ។
យោងតាមទីភ្នាក់ងារឧតុនិយមពិភពលោក ការព្យាករលើមជ្ឈមណ្ឌលសំខាន់ៗនៃពិភពលោក បង្ហាញអំពីការកើតឡើងជាស្ថិរភាព និងខ្លាំងក្លា នៃសីតុណ្ហភាពមហាសមុទ្រនៅក្នុងភាគកណ្តាល និងភាគខាងកើតនៃមហាសមុទ្រប៉ាស៊ីហ្វ៊ិកអេក្វាទ័រ។ ជាមួយនឹងភាពខុសប្រក្រតីតាមរដូវនៃសីតុណ្ហភាពមធ្យមលើផ្ទៃសមុទ្រ គេរំពឹងថា វានឹងឡើងលើសពី ២°C នៅតំបន់សំខាន់ៗដែលត្រូវបានសង្កេត។
ទីភ្នាក់ងារឧតុនិយមពិភពលោកបញ្ជាក់ថា គំរូនៃការព្យាករមានការស្របគ្នាយ៉ាងគួរឲ្យកត់សម្គាល់ ដែលផ្តល់នូវកម្រិតទំនុកចិត្តខ្ពស់ចំពោះទស្សនវិស័យលើការវិវត្ត។ ស្របពេលគ្នានេះដែរ សីតុណ្ហភាពនៅក្នុងមហាសមុទ្រអាត្លង់ទិកអេក្វាទ័រនឹងនៅតែស្ថិតនៅខ្ពស់ជាងធម្មតាជាទូទៅ។
អង្កការឧតុនិយមពិពលោក ព្យាករអំពីលទ្ធភាពខ្លាំងនៃសីតុណ្ហភាពដែលមានកម្រិតខ្ពស់ជាងមធ្យមនៅស្ទើរតែគ្រប់តំបន់ដែលមានប្រជាជនរស់នៅក្រៅពីតំបន់ប៉ូល សម្រាប់រយៈពេល ពីខែកក្កដា ដល់ខែកញ្ញា។
ទីភ្នាក់ងារឧតុនិយមពិភពលោក ក៏បានព្យាករអំពីការធ្លាក់ភ្លៀងច្រើនលើសជាងធម្មតានៅលើភាគកណ្តាល និងភាគខាងកើតនៃមហាសមុទ្រប៉ាស៊ីហ្វ៊ិកអេក្វាទ័រ និងការធ្លាក់ភ្លៀងក្រោមកម្រិតធម្មតានៅក្នុងតំបន់ខ្លះនៃមហាសមុទ្រឥណ្ឌាត្រូពិក ឧបទ្វីបឥណ្ឌា និងនៅមួយភាគធំនៃដែនដីអូស្រ្តាលី។
Daily Program
