នៅសន្និសីទអន្តរជាតិលើកទី៣០ អង្គការសហប្រជាជាតិអំពាវនាវ ឲ្យមេដឹកនាំ នានា​ដាក់ជីវិតមនុស្សមានតម្លៃជាង​ផលចំណេញ

លោកអន់តូនីញ៉ូ ហ្គូទែរ៉េស អគ្គលេខានៃអង្គការសហប្រជាជាតិបានអំពាវឲ្យ​មេដឹកនាំនានា​នៅ​លើពិភពលោកដាក់តម្លៃ​ជីវិតមនុស្សឲ្យនៅពីលើផលចំណេញ និងការចាកចេញពីការប្រើ​ប្រាស់​ឥន្ធនៈផូស៊ីល។

កាលពីសប្តាហ៍មុន នៅពេលមកដល់សន្និសីទអន្តរជាតិស្តីអំពីអាកាសធាតុលើកទី៣០ អំពី​ការ​ប្រែប្រួល​អាកាសធាតុ នៅទីក្រុងបេឡេម ប្រទេសប្រេស៊ីល លោកអន់តូនីញ៉ូ ហ្គូទែរ៉េស បាន​ស្នើសុំឲ្យមេដឹកនាំប្រទេសនានានៃប្រទេសដែលជាអ្នកមាន​បំផុត ធ្វើការតាមដាន​វិទ្យាសាស្រ្ត។

អគ្គលេខាអង្គការសហប្រជាជាតិ បានថ្លែងថា ៖ ”យើងត្រូវ​ប្រកាន់​យកការសម្រេចចិត្ត​ និង​ប្រឈម​ការលំបាក ហើយពិភពលោកទាំងមូល​កំពុងក្រឡេក​ភ្នែកមកកាន់ទីក្រុងបេឡេម។ សហគមន៍មូលដ្ឋានជាអ្នកនៅជួរទីមួយនៃការសង្កេតពិនិត្យ ហើយ​សហគមន៍នេះដែរ ក៏មិន​មាន​​អំណាចក្នុងការប្រឈមមុខនឹងទឹកជំនន់ ការ​ប្រមូល​ផល​បានទាប និងមធ្យោបាយ​ទ្រទ្រង់​ជីវិត​របស់ពួកគេកំពុងត្រូវបានបំផ្លិចបំផ្លាញ ហើយពួកគេ​បាន​ចោទសួរថា តើត្រូវការ​ពេល​ប៉ុន្មាន​​ទៀតក្នុងការរងភាពឈឺចាប់នេះ?”

”អស់ពេលជាច្រើនសតវត្សនៃការមិនទទួលស្គាល់ និងការពន្យាធ្វើសកម្មភាពរបស់មនុស្ស វិទ្យាសាស្រ្ត​បាន​ប្រាប់យើងថា ការឆ្លងហួសជាបណ្តោះអាសន្ននៃសីតុណ្ហភាពមធ្យម​នៅលើ​ផែនដី​​លើសពី 1,5 °C នឹងកើតមានឡើង​នៅដើមទសវត្សឆ្នាំ២០៣០ ខាងមុខ ហើយវាក្លាយ​ជាមិនអាចជៀសផុតបាន។ យើងដឹងអំពីអ្វីដែលរឿងនេះមានន័យថា វានឹងបង្កឲ្យមាន​កម្តៅ​កាន់​តែក្តៅ និងគ្រោះទុរភិក្ស បង្កឲ្យកាន់តែមានមហន្តរាយធម្មជាតិ និងការភៀសខ្លួន​របស់​​ប្រជាជន និងមានហានិភ័យ​ដែលកើនឡើងដែលអាចឈានឆ្លងដល់ចំណុចក្រឡាប់​ចក្រ​​ខាង​​​អាកាសធាតុ ដែលទាំងនេះនឹងបង្កជាការខូចខាតដែលមិនអាចជួសជុលបាន។”

បើយោងតាមលោកអន់តូនីញ៉ូ ហ្គូទែរ៉េស បានឲ្យដឹងថា ពិភពលោកនៅ​តែអាច​ធ្វើឲ្យ​ថយ​ចុះ​សម្រាប់​កំណើនសីតុណ្ហភាពពិភពលោកឲ្យនៅក្រោម​កម្រិតលើសពី 1,5 °C មុនដំណាច់​សតវត្ស​នេះ ប៉ុន្តែគេត្រូវធ្វើប្រតិកម្មពេលបច្ចុប្បន្នដើម្បីឲ្យការលើសនេះមានរយៈពេលខ្លី និង​ខ្សោយ​តាមដែលអាចធ្វើទៅបាន។

លោកអន់តូនីញ៉ូ ហ្គូទែរ៉េស បានធ្វើសេចក្តីយោងលើរបាយការណ៍ថ្មីមួយរបស់អង្គការសហ​ប្រ​ជាជាតិដែលចង្អុលបង្ហាញថា ផែនការអាកាសធាតុរបស់រដ្ឋនានាសព្វថ្ងៃ បើទោះជាពួកវាត្រូវ​បាន​​គោរព​​ពេញលេញ ក៏យើងនៅតែស្ថិតនៅលើផ្លូវ​នៃការកើនឡើងសីតុណ្ហភាពលើសពី 2°C  ដែរ។ នេះ​គឺដូចជាការដាក់ទោសប្រហារជីវិតសម្រាប់មនុស្សជាច្រើន។”

អគ្គលេខាអង្គការសហប្រជាជាតិបានរំឭកថា ប្រទេសអភិវឌ្ឍន៍ត្រូវតែគៀងគរយ៉ាងហោច​ណាស់ ៣០០ពាន់លានដុល្លារ ពីពេលនេះរហូតទៅដល់ឆ្នាំ២០៣៥ និងឈាន​ឲ្យ​ដល់ ១,៣​ពាន់​ក្នុងមួយឆ្នាំពីពេលនេះ​ទៅដល់ឆ្នាំ២០៣៥ ដើម្បីគាំទ្រដល់ប្រទេស​ដែល​ងាយ​រងគ្រោះ​បំផុត ដូចដែលត្រូវបានព្រមព្រៀងគ្នាធ្វើនៅអំឡុងសន្និសីទអន្តរជាតិស្តី​អំពី​អាកាសធាតុលើក​ទី​២៩។

ដើម្បីកម្រិតការឈឺចាប់ជាមួយពិភពលោកដែលមានសីតុណ្ហភាពកើនឡើងលើសពីកម្រិត​មធ្យម 2°C ប្រទេសនានាត្រូវតែចាប់ផ្តើមធ្វើការផ្ទេរថាមពលឲ្យបានត្រឹមត្រូវ មានការ​សម្រប​សម្រួល និងសមភាពក្នុងការបោះបង់ចោលថាមពលផូស៊ីល ដូចដែលវាត្រូវបាន​ព្រម​ព្រៀង​គ្នានៅអំឡុងសន្និសីទអន្តរជាតិស្តីអំពីអាកាសធាតុលើកទី២៨ នៅទីក្រុងឌូបៃ រយៈ​ពេល ២ឆ្នាំ​កន្លង​ទៅហើយ។