ថ្ងៃទី៣០ ខែសីហា ឆ្នាំ២០២៥ អត្ថបទគម្ពីរ (ម៉ាថាយ ២៥,១៤-៣០)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ជម្រាបសួរ បងប្អូនជាទីស្រឡាញ់! ខ្ញុំអញ្ជើញបងប្អូនអធិដ្ឋាន ទីណាមានមេត្តានិងសេចក្តីស្រឡាញ់ ព្រះ​ជា​ម្ចាស់គង់ជាមួយយើង! ឥឡូវស្ថានភាពនៃសង្រ្គាមធ្វើឲ្យបាក់បែក ធ្វើឲ្យមានទុក្ខវេទនា យើង​សូម​ទូល​អង្វរ​ព្រះជាម្ចាស់ សូមឲ្យរាជរដ្ឋាភិបាលទាំង២ប្រទេសខែ្មរ និងថៃ ចេះរិះ​គិត​ជាមួយគ្នា រកដំណោះ​ស្រាយ​ដោយ​សន្តិវិធី ជាប្រយោជន៍រួមសម្រាប់ប្រទេសទាំងពីរ និងប្រជាជន។  

នៅថ្ងៃនេះ ព្រះយេស៊ូបានលើកឡើងពីប្រស្នាអំពីម្នាក់ៗដែលបានទទួល៥តម្លឹង ២តម្លឹង និងម្នាក់១ តម្លឹង។ បាទ! ប្រស្នានេះនាំឲ្យយើងបានទទួលការបង្កើតពីព្រះជាម្ចាស់ មានរូបសម្បត្តិ លក្ខណៈ​ផ្សេង​ៗ​ពី​គ្នា​ នឹងទីពីរ៖ ព្រះជាម្ចាស់ផ្តល់សេរីភាពឲ្យយើងនៅក្នុងការរិះគិត ការសម្រេចចិត្តនៅក្នុងអ្វីៗដែល​យើង​​ធ្វើ ព្រះជាម្ចាស់បានធ្វើឲ្យយើងជារូបតំណាងរបស់ព្រះអង្គ ត្បិតទ្រង់បង្កើតយើងម្នាក់ៗមានលក្ខ​ណៈ​សម្បត្តិ​ផ្សេង​ៗគ្នា តែឲ្យយើងមានសេរីភាពក្នុងការរិះគិត នឹងការសម្រេចចិត្ត។ នេះជាព្រះអំណោយទាន ដែល​ព្រះ​ជាម្ចាស់ប្រទានឲ្យ ដូច្នេះនៅក្នុងព្រះអំណោយទានដែលយើងបានទទួលនៅថ្ងៃនេះ៥ តម្លឹង ២តម្លឹង និង១តម្លឹងតើអំណោយទានទាំងនេះ អាចយកមកធើ្វអី្វបានខ្លះ?

បងប្អូនជាទីស្រឡាញ់ នៅពេលដែលយើងដឹងថាព្រះជាម្ចាស់បង្កើតយើងឲ្យមានលក្ខណៈផ្សេងៗពីគ្នា ទាំង​សេរីភាព សេចក្តីទាំងនេះព្រះអង្គចង់ឲ្យយើងរស់នៅជាបងប្អូននឹងគ្នា ជាគ្រួ​សារ​តែ​មួយ ដោយដឹងថា ព្រះជាម្ចាស់បានបង្កើតយើង ហើយធ្វើឲ្យយើងចេះជួយគ្នាចេះយល់គ្នា ​រស់​នៅ​ជាមួយគ្នា ដោយ​មិនគិត​ថា​យើងចេះជាងគេ ល្អជាងគេ ប្រសើរជាងគេនោះទេ តែផ្ទុយទៅវិញធ្វើ​ឲ្យ​យើ​ងមានចិត្តអាណិតអាសូរ និ​ង​ចេះ​ជួយគ្នាដើម្បីបំពេញគ្នានូវចំណុចខ្វះខាតរបស់យើង។ នេះ​ជា​សេចក្តីមួយដើម្បីជួយឲ្យយើងដឹងថា អំណោយទានដែលយើងបានទទួល៥តម្លឹង ២តម្លឹង និង១តម្លឹង គឺព្រះជាម្ចាស់ចង់ធ្វើឲ្យយើង ចេះរស់​នៅ​ជា​បងប្អូននិងគ្នា។

ព្រះយេស៊ូចង់ឲ្យយើងដឹងថាមានតែព្រះជាម្ចាស់ជាបិតាដ៏វិសុទ្ធ ដែលជាព្រះអម្ចាស់១០​០​​%ជាសិរីរុង​រឿង ជាភាពដ៏វិសុទ្ធដ៏ខ្ពង់ខ្ពស់របស់ព្រះអង្គ  ហើយ​ធ្វើ​ឲ្យ​មនុស្ស​លោកដឹង​ថាយើង​ជា​អ្ន​ក​ទន់ខ្សោយជា​អ្នកបា​ប​នោះ ដែលព្រះអង្គបានប្រទានឲ្យយើង ​ឲ្យ​យើង​កើតជារូបតំណាងរបស់ព្រះអង្គ នេះជាការអស្ចា​រ្យ​ ទោះបី​យើង​មា​ន​ជាតិសាសន៍ផ្សេងគ្នា ប៉ុន្តែព្រះ​ជា​ម្ចាស់បានបង្រួបប្រង្រួមធ្វើឲ្យយើង ទៅជាសាច់ឈាមតែមួយ​ក្នុង​​ព្រះ​ជាម្ចាស់។ សូមបងប្អូនអរព្រះគុណព្រះជាម្ចាស់នូវអំណោយទានដែលយើងបានទទួល ឲ្យ​យើង​​​ចេះ​ប្រើ​អំ​ណោ​យ​​​ទានដែលយើងមាននេះសម្រាប់ស្រឡាញ់គ្នា ផ្តល់ក្តីស្រឡាញ់ធម៌មេត្តាករុណា​ប្រណី​​សណ្ដោស​​ចំពោះ​គ្នា ជួយបំពេញគ្នា ដើម្បីយើងទៅជារូបតំណាង​របស់ព្រះជាម្ចាស់ដ៏ពេញ​លក្ខណៈ​។

នៅពេលដែលមានបញ្ហាជម្លោះបាក់បែកគ្នា សង្រ្គាមតទល់គ្នា សូមឲ្យបងប្អូនចេះមានការសោកស្តាយ ឲ្យ​បង​​ប្អូន​ឃើញថា ទង្វើដែលយើងឈ្លោះគ្នា ឈ្នានីសគ្នា បំពានលើគ្នា គឺជាទង្វើមួយប្រឆាំង​​នឹង​ព្រះ​ជា​ម្ចាស់​ សូមឲ្យយើងទាំងអស់គ្នា រួមគ្នាទូលអង្វរព្រះជាម្ចាស់ សូម​ព្រះជា​ម្ចាស់​លើក​លែងទោសនូវភាពទន់​ខ្សោយ​ទាំង​ប៉ុ​ន្មានដែលយើងបានធ្វើ ហើយឲ្យយើងនឹកចាំថាទីណាមាន​មេត្តា​និ​ងសេចក្តីស្រឡាញ់ គឺព្រះជាម្ចាស់​គង់ជាមួយយើង អាម៉ែន៕​