ណាអូមី អូសាកា កំពូលកីឡាការិនីតេនីស អាជីបលេខមួយនៅលើពិភពលោក

អ្នកនាង ណាអូមី អូសាកា កើតនៅថ្ងៃទី១៦ ខែតុលា ឆ្នាំ១៩៩៧ នៅសង្កាត់ជូអូ នៅ ទីក្រុង អូសាកា ប្រទេសជប៉ុន។ អ្នកនាងគឺជាអ្នកលេងកីឡាតេនីសជនជាតិជប៉ុន និងអាម៉េរិក ចាប់តាំងពីឆ្នាំ២០១២។ ម្តាយរបស់អ្នកនាងគឺជាជនជាតិជប៉ុន ហើយឪពុករបស់អ្នកនាង គឺ​ជា​ជន​ជាតិហៃទី។ អ្នកនាងរស់នៅសហរដ្ឋអាម៉េរិក ចាប់តាំងពីអាយុ ៣ឆ្នាំ និងមាន​សញ្ជាតិ​ជប៉ុន​ផង​ដែរ។ អ្នក​នាងបានបោះបង់ចោលសញ្ជាតិអាម៉េរិកនៅខែតុលា ឆ្នាំ២០១៩ ដូចដែល ច្បាប់​ជប៉ុន​បានទាម​ទារ ដែលបដិសេធការមានសញ្ជាតិពីរ នៅក្រោយអាយុ ២២ឆ្នាំ។ អ្នកនាង ណាអូមី អូសាកា គឺជាអតីតនិស្សិត​នៅសកលវិទ្យាល័យ ញូ យ៉ក ផងដែរ។   

ដូចបងស្រីច្បងរបស់អ្នកនាងដែរ ម៉ារី អូសាកា អ្នកនាង ណាអូមី អូសាកា បាន​យក​ឈ្មោះ​តាម​ម្តាយ​​ក្នុងហេតុផលជាទូទៅ នៅខណៈដែលគ្រួសារធ្លាប់រស់នៅជប៉ុន។ នៅអំឡុងឆ្នាំ២០០០ ដោយ​​មានបញ្ហាខ្លាំងក្នុងទំនាក់ទំនងគ្រួសារជាមួយតាយាយ​ ឪពុកម្តាយរបស់ ណាអូមី បាន​ចាក​ចេញពីជប៉ុន ជាមួយនឹងជាមួយនឹងកូនស្រីទាំងពីររបស់ពួកគាត់ ហើយបានមករស់នៅ​ក្នុង​ទីក្រុងញូយ៉ក បន្ទាប់​មកបានមករស់នៅទីក្រុង ហ្វ៉ត ឡូឌឺដាល់ រដ្ឋហ្វ៉្លរីដា សហរដ្ឋ​អាម៉េរិក។    ដោយ​យក​គំរូ​តាម គ្រូបង្វឹកតេនីសដ៏ល្បីនៅសហរដ្ឋអាម៉េរិក លោករីឆាត វីលៀម ដែលជាឪពុក និង​អ្នក​បង្វឹក តារាតេនីស វើនុស និងសេរ៉ឺណា វីលៀម ឪពុករបស់ណាអូមី បាន​ជំរុញ​​ឲ្យកូន​ស្រី​របស់​លោក​លេងកីឡាតេនីសដោយយកចិត្តទុកដាក់។

នៅហ្វ៉្លរីដា ដែលជា​កន្លែង​​ដែល​អ្នក​នាង​ណាអូមីបានស្នាក់នៅ អ្នកនាងណាអូមី បានអភិវឌ្ឍ​ជំនាញ​ តេនីស​របស់​អ្នកនាង​នៅ​មជ្ឈ​មណ្ឌល​ហ្វឹកហ្វឺនបណ្តុះបណ្តាលកីឡាតេនីស នៅទីក្រុង ហ្វ៉ត ឡូឌឺដាល់។  

អ្នកនាងណាអូមី និងបងស្រី ទាំងពីរនាក់ បានក្លាយជាអ្នកលេងតេនីស អាជីប។ នៅក្នុង​ទសវត្ស​​ឆ្នាំ២០១០ យាយតារបស់ណាអូមី បានជុំជួបជុំ​ឡើងវិញជាមួយកូនស្រី ហើយ​បាន​សម្តែង​នូវមោទភាពរបស់ពួកគាត់ជាសាធារណៈ បន្ទាប់ពីជោគជ័យរបស់ចៅស្រីពួកគាត់​នៅ​កម្មវិធី​តេនីស Open Australie នៅខែមករា ឆ្នាំ២០១៩។

ដោយត្រូវបានចាត់ទុកជាកីឡាការីនីម្នាក់លេងបានយ៉ាងល្អនៅរដូវកាល ឆ្នាំ២០១៦ អ្នកនាង​ណាអូមី បានឈ្នះពានរង្វាន់តេនីស Indian Wells នៅឆ្នាំ២០១៨។ បន្ទាប់មក អ្នកនាងណាអូមី បានឈ្នះផ្ទួនៗគ្នា នៅពានរង្វាន់ US Open ឆ្នាំ២០១៨ និង Open Australie ឆ្នាំ២០១៩ នៅ​ពេល​ដែលនាងទើបមានអាយុតែ ២១ឆ្នាំ។ អ្នកនាងបានកើនភាពល្បីល្បាញ និងឈាន​ដល់​ចំណាត់​ថ្នាក់ទី១ បន្ទាប់ពីជ័យជម្នះនៃការប្រកួតនៅមេលប៊ន នៃចំណាត់ថ្នាក់ WTA ដែល​ជា​តារាង​ចាត់ថ្នាក់កំពូលៗ នៃកីឡាករតេនីស។    អ្នកនាង​ណាអូមី គឺជាជនជាតិជប៉ុនដំបូង ដែល​ឈ្នះពានរង្វាន់តេនីសពិភពលោក Grand Chelem និង​គ្រប់គ្រងចំណាត់ថ្នាក់​កំពូល​ជា​កីឡាក​តេនីសនៅលើពិភពលោក។ បន្ទាប់មក អ្នកនាង ណាអូមី អូសាកា ឈ្នះពានរង្វាន់ US Open ជាលើកទី២ នៅឆ្នាំ២០២០ និង ពានរង្វាន់ Open Australie ជាលើកទី២ នៅឆ្នាំ២០២១។ ចាប់តាំងពីឆ្នាំ២០១៨ អ្នកនាងបានឈ្នះ ពានរង្វាន់ Grand Chelem បួនដង។

អ្នកនាងក៏បានបង្ហាញខ្លួន ដោយសារការប្រកាន់យកមុខតំណែង ជាអ្នកគាំទ្រចលនា Black Lives Matter ចលនាជីវិតជនជាតិស្បែកខ្មៅក៏មានតម្លៃ។ អ្នកនាងណាអូមី ក៏បានពាក់់ម៉ាស ដាក់​ឈ្មោះជនជាតិស្បែកខ្មៅ​ដែលត្រូវបានសម្លាប់ដោយប៉ូលីស នៅអំឡុងកម្មវិធីពានរង្វាន់ តេនីស US Open ឆ្នាំ២០២០។

កាលពីថ្ងៃទី២៣ ខែកក្កដា ឆ្នាំ២០២០ អ្នកនាងណាអូមី គឺជាអ្នក​កាន់ភ្លើង​គុប​រត់​ចុង​ក្រោយ​នៃ​កីឡា​អូឡាំពិច និងដុត​ភ្លើងគុបនៅស្តាតអូឡាំពិចជាតិ​ជប៉ុន នៅអំឡុងកម្មវិធី​បើកកីឡា​អូឡាំពិច​រដូវក្តៅ​នៅឆ្នាំ២០២០ នៅទីក្រុងតូក្យូ ប្រទេសជប៉ុន។