រឿងស្រូវអង្ករធ្លាក់ថ្លៃជាបញ្ហាសាកល តែក៏ត្រូវ​ដោះស្រាយឲ្យ​បាន​ឆាប់

រឿងស្រូវធ្លាក់ថ្លៃនេះទំនងជាបញ្ហាដែលមិនងាយនឹងដោះស្រាយចេញឡើយ ពីព្រោះវាគឺជាបញ្ហាសាកល បណ្តាមកពីបរិមាណផលិតកម្មស្រូវនៅលើពិភពលោកមានទិន្នផលល្អ។

មកដល់ពេលនេះមានការប៉ាន់ប្រមាណថា ទិន្នផលស្រូវនៅលើពិភពលោកនៅក្នុងឆ្នំានេះល្អ ហើយបានផលសឹងតែគ្រប់ប្រទេសរហូតដល់ការិយាល័យកសិកម្មអាមេរិកបានអះអាងថា បរិមាណអាចកើនឡើងជាង​៣ លានតោន ដែលនាំឲ្យបរិមាណស្រូវផលិតបាននៅក្នុងរដូវប្រមូលផលនេះកើនឡើងដល់ប្រមាណជា ៥៣០ លានតោន។​

ដោយសារតែទិន្នផលស្រូវនេះវាមានស្ថានភាពប្រសើរប្រទេសជាច្រើនដែលធ្លាប់នាំចូលអង្ករគឺកាត់បន្ថយ ឬលុបចោល ដោយសារតែពួកគេអាចប្រមូលផលស្រូវបានប្រសើរដែរ។ សម្រាប់ឥណ្ឌាដែលកាលពីឆ្នាំ២០២៤ អាចនាំចេញបានប្រមាណជា ១៧ លានតោននោះ នឹងបង្កើនបរិមាណនាំចេញ​​អាចលើសពី​៥ លានតោន​នៅក្នុងឆ្នាំ២០២៥នេះ។​

ការប៉ាន់ប្រមាណនេះហើយ ដែលនាំឲ្យតម្លៃអង្ករនៅលើពិភពលោកស្រុតចុះនៅដើមឆ្នាំ២០២៥នេះតែម្តង ហើយបញ្ហានេះបានកំពុងតែបង្កភាពតានតឹងមិនថាតែនៅកម្ពុជានោះទេ គឺសូម្បីតែថៃ ដែលកាលពីឆ្នាំ២០២៤ ធ្លាប់នាំចេញបានជិត១០លានតោន ហើយវៀតណាមបាននាំចេញបានជាង៩ លានតោន គឺទម្លាក់ក្តីរំពឹងហើយ ដោយសារតែឥណ្ឌា។

ថៃឆ្នាំនេះរំពឹងថា អាចនឹងនាំចេញអង្ករបានត្រឹមតែ រង្វង់៧,៥ លានតោនប៉ុណ្ណោះ ថយចុះ ២,៥លានតោន។​ នៅពេលដែលអង្ករថៃនៅក្នុងស្ថានភាពបែបនេះ វៀតណាមក៏មិនខុសគ្នាដែរ។

កាលពីអង្ករត្រូវប៉ាន់ វៀតណាមនិងថៃមានទឹកមាត់លេប ក៏ហ៊ានមកដល់កម្ពុជាដែលផលិតស្រូវបានច្រើន តែខ្វះសមត្ថភាពកែច្នៃនាំចេញច្រើន​ ដូច្នេះនៅពេលដែលថៃនិងវៀតណាមមានបញ្ហា តម្លៃស្រូវដែលប្រមូលផល ក៏​ត្រូវ​ធ្លាក់ដល់តម្លៃក្រោម១០០០ រៀលនៅក្នុងមួយគីឡូក្រាម រហូតដល់មានបាតុភាពនិងការត្អូញត្អែកើនឡើងនៅក្នុងស្រទាប់មហាជន​។​

ដំណោះស្រាយដើម្បីឆ្លើយតបនៅក្នុងពេលនេះ គឺមានតែបង្កើនទីកន្លែងស្តុក ប៉ុន្តែបើស្តុកគឺវាប៉ះពាល់ដល់បញ្ហាបង្វិលទុនរបស់កសិករ ដោយសារតែពេលនេះកសិករមួយចំនួនខ្ចីទុនពីអ្នកចងការឬពីស្ថាប័នហិរញ្ញវត្ថុដើម្បីទិញជី និង ប្រេងឥន្ធនៈ ឬជួលគេនៅក្នុងដំណើរសង្វាក់ផលិតកម្មស្រូវនេះ។​

ដើម្បីដោះស្រាយបញ្ហានេះ គឺមានតែលក់ខ្លះដោះបំណុល ហើយទុកក្នុង​​ស្តុក ដើម្បីបញ្ចេញនៅពេលដែលតម្លៃស្រូវប្រសើរឡើងវិញ។ ស្រូវជាផលិតកម្មស្បៀងអាហារដែលពិបាកនឹងប៉ាន់ស្មានដោយ​សារ​តែវាពាក់ព័ន្ធនឹងធម្មជាតិ ដូច្នេះសង្ឃឹមថា រាជរដ្ឋាភិបាលនឹងរិះគិតនូវសេណារីយូសមស្របដើម្បីឆ្លើយតប​នឹងបញ្ហានេះ៕