​ប្រធាន​​មណ្ឌលសិប្បកម្ម ដូងតាកែវ ចូលរួម​កម្មវិធី​ ASEAN HERITAGE Train ដើម្បីបង្ហាញពី​ការកែច្នៃធនធានធម្មជាតិឡើងវិញ

មណ្ឌលសិប្បកម្ម ដូងតាកែវ ក្នុងនាមព្រះសហគមន៏កាតូលិក​នៅ​ព្រះរាជាណាចក្រកម្ពុជា បាន​ចូលរួម​កម្មវិធីASEAN HERITAGE Train- Enhancing Connectivity towards Cultural Diversity ដែល​បានរៀបចំឡើងរយៈពេល១៨ថ្ងៃ គឺចាប់ពីថ្ងៃទី៩ ដល់ថ្ងៃទី២៦ ខែកក្កដា ឆ្នាំ២០២៤។

កម្មវិធីនេះបានចាប់ផ្តើម​ដំណើរ​​ការ​នៅ​ប្រទេស​ឡាវ រួចបន្ត​ឆ្លងកាត់ប្រទេសថៃ និង​បញ្ចប់នៅប្រទេសម៉ាឡេស៊ី។ គោលបំណងកម្មវិធីនេះ គឺដើម្បី​លើក​កម្ពស់​ភាព​សុខដុម​រមនា​ក្នុង​តំបន់ និងពង្រឹងការផ្លា​ស់ប្តូរវប្បធម៌នៅតាមប​ណ្តោយផ្លូវ​ដ៏គួរឱ្យទាក់ទាញ​ ដោយមានការ​​ចូលរួម​ក្នុង​សកម្មភាពផ្សេងៗ រួមមាន​​ ការសម្តែងជាសាធារណៈ ការតាំងពិព័រណ៌ សិក្ខាសាលា និង​បទ​ពិសោធ​ធ្វើ​ម្ហូបជាដើម។

​​​លោក មាគ​ ស៊ន ​ប្រធាន​មណ្ឌល​សិប្បកម្ម​ដូង​តាកែវ បានប្រាប់RVA Khmer កាលពី​ថ្ងៃទី​២៨ ខែកក្កដាថា កម្មវិធី ASEAN HERITAGE Train ជាកម្មវិធីមួយដែលបង្កើតឡើងដើម្បី​ផ្សាភ្ជាប់នូវទំនាក់ទំនង​ក្នុង​ប្រទេសដែលជាសមាជិកអាស៊ាន​ដើម្បីឱ្យមានការ​ជួបជុំគ្នា​រវាងវប្បធម៌នៃ​ប្រទេសនីមួយៗ។ អ្វីដែលសំខាន់ក្នុង​​ការអភិវឌ្ឍន៍​ផ្នែកទេសចរណ៍​ផងដែរ។

លោកបានបញ្ជាក់ថា ៖ «គោលដៅសំខាន់នៅក្នុង​កម្មវិធីនេះគឺ​គេបានជ្រើសរើសតំណាង​ពីប្រទេសមួយៗដែលមាន៣ផ្នែកសំខាន់ៗ​ដែល​ក្នុង​នោះរួមមាន​ ផ្នែករបាំប្រពៃណី ម្ហូបអាហារ​ និង​ការកែ​ច្នៃ។ ក្នុង​ចំណោម​តំណាង​៣នាក់ពីប្រទេសកម្ពុជា មានចុងភៅ ដែលមកពីខេត្តសៀមរាប, អ្នករាំរបាំមកពីក្រសួង​វប្បធម៌ និង​វិចិត្រសិល្បៈ និងខាងសិប្បកម្មកែច្នៃ​ មកពីមណ្ឌលសិប្បកម្មដូងដើម្បីចូលរួម​ធ្វើបទបង្ហាញសម្រាប់កម្មវិធីអាស៊ាននេះ»។

បើតាមលោក មាគ ស៊ន កម្មវិធីនេះ​បានចាប់​ផ្តើមធ្វើឡើងនៅប្រទេសឡាវ ដែលមានប្រធានបទសំខាន់គឺការកែច្នៃ​ធនធានធម្មជាតិឡើងវិញ ដូចជាពីសំរាម ឬពីអ្វីដែល​ត្រូវបានគេបោះចោលហើយ​យកមកធ្វើការកែច្នៃឡើងវិញ ក្នុងនោះក៏មានការតាំងពិព័រណ៌​ផលិតដែល​បានកែច្នៃឡើងវិញ​ផងដែរ។

លោកបានថ្លែងថា ៖ «នៅប្រទេសឡាវ យើងបាន​ជ្រើសរើសប្រធានបទពីការកែច្នៃផ្លែដូង​ ហើយសម្រាប់​ចូលដល់ប្រទេសថៃគឺមានការ​ផ្លាស់ប្តូរ​តាមរយៈការធ្វើម្ហូបអាហារ​តាមតំណាងប្រទេសនីមួយៗ ដែលប្រទេសយើងបានជ្រើសរើសនូវមុខម្ហូបមួយផងដែរគឺ នំបញ្ចុកខ្មែរយើងដើម្បីបង្ហាញ​ដល់ប្រទេសផ្សេងៗ ហើយក្នុងនោះក៏មានការចាប់អារម្មណ៍ច្រើនផងដែរ»។

ចំណែកនៅប្រទេសម៉ាឡេស៊ី គឺមានការ​ផ្លាស់ប្តូរពីវប្បធម៌ របាំ​ប្រពៃណី និង​សម្លៀកបំពាក់ប្រពៃណី ដែលបាន​ផ្លាស់ប្តូរជាមួយនឹងប្រទេសម៉ាឡេស៊ី។

លោក មាគ ស៊នថា ៖ «យើងឃើញថានៅក្នុង​កម្មវិធីនេះមានការ​ទទួលស្វាគមន៍​បានយ៉ាងល្អពីម្ចាស់​ផ្ទះទាំងបីប្រទេសនេះ​ តាមរយៈអាជ្ញាធរ និង​ការផ្តល់ភាពកក់ក្តៅពីបណ្តាប្រទេសអាស៊ាននេះបានយ៉ាងល្អ»។

«ខ្ញុំ ក្នុងនាម​មណ្ឌលសិប្បកម្ម ដូងតាកែវ ក្នុងនាមព្រះសហគមន៏កាតូលិក​នៅកម្ពុជា ពិតជាមានមោទ​ន​ភាព និងមានកិត្តិយសបំផុតដែលក្រសួង​វប្បធម៌ និងវិចិត្រសិល្បៈ បានជ្រើសរើសសិប្បកម្មរបស់យើងខ្ញុំ ដែលជាស្នាដៃបង្កើតឡើងដោយលោកអភិបាលអូលីវីយេ អភិបាលព្រះសហគមន៏កាតូលិកភូមិភាគភ្នំពេញ ក្នុងនាមតំណាងប្រទេសកម្ពុជារបស់យើងដើម្បីបង្ហាញអំពីស្នាដៃ ការកែច្នៃផលិតផល អោយប្រទេសទាំងនៃរដ្ឋ អាស៊ាន បានឃើញ»។ នេះបើតាមការបន្ថែម​របស់លោក មាគ ស៊ន។

«ខ្ញុំសូមសំដែងនូវក្តីអំណរសប្បាយ និងអរព្រះគុណព្រះជាម្ចាស់សំរាប់ផលផ្លែមួយនេះ ដែលជាស្នាព្រះហស្ថរបស់ព្រះអង្គ»៕