អំពើហិង្សានៅហៃទី បានបង្កការផ្លាស់ទីរបស់កុមារប្រមាណ ៣០០០០០ នាក់

កាលពីថ្ងៃចន្ទ អង្គការយូនីសេហ្វ បានប្រកាសអាសន្នអំពីការផ្លាស់ទីរបស់កុមារប្រមាណ ៣០០០០០នាក់ នៅប្រទេសកោះហៃទី ឬច្រើនជាងពាក់កណ្តាលនៃមនុស្ស ៦០០០០០នាក់ ត្រូវ​បង្ខំ​ឲ្យ​គេច​ចេញពីទីលំនៅរាល់ថ្ងៃរបស់ពួកគេ ដោយសារហេតុផលនៃអំពើហិង្សារបស់ជន​អន្ធពាល។ លើសពីនេះ ក្មេងជាច្រើន​ក្នុងចំណោមពួកគេ ត្រូវទទួលរង​ការបំពានផ្លូវភេទ ការ​កេងប្រវញ្ច័ និងការរំលោភ។

កាលពីថ្ងៃចន្ទ ទី១ កក្កដា អង្គការយូនីសេហ្វ បានព្រមានថា ចំនួនកុមារដែលត្រូវភៀសខ្លួន​ដោយសារអំពើហិង្សានៃក្រុមជនអន្ធពាលនៅប្រទេសហៃទី បានកើនឡើង ៦០% ចាប់តាំងពី​ខែមីនា ឬស្មើនឹង​មានក្មេងម្នាក់ទទួលរងគ្រោះនៅរាល់នាទី។ អង្គការនេះ វាយតម្លៃថា កុមារ​ដែលពាក់ព័ន្ធមានចំនួន ៣០០០០០នាក់។

យោងតាមមូលនិធិនៃអង្គការសហប្រជាជាតិសម្រាប់កុមារ បានឲ្យដឹងថា ក្មេងៗ ដែលភៀស​ខ្លួន តំណាងឲ្យ​ច្រើនជាងពាក់កណ្តាល​នៃប្រជាជន ៦០០០០០នាក់ ដែលត្រូវបាន​បង្ខំ​ចិត្ត​ចាកចេញ​ពីទីលំនៅដ្ឋានរាល់ថ្ងៃរបស់ពួកគេ​ដោយសារហេតុផល​នៃអំពើ​ហិង្សា​ ដែលជាជំងឺ​កើត​ឡើងរ៉ាំរ៉ៃ​នៅក្នុងប្រទេសនេះ ជាពិសេសនៅក្នុងរដ្ឋធានី ព័រអូប្រាំងស៍។

នៅក្នុងសេចក្តីប្រកាសមួយ អគ្គនាយិកានៃអង្គការយូនីសេហ្វ លោកស្រីកាតឺរីន រុយសែល បានថ្លែងថា ៖ ”មហន្តរាយមនុស្សធម៌ដែលប្រព្រឹត្តទៅនៅក្នុងភ្នែក​របស់យើងមានឥទ្ធិពលដ៏​បំផ្លិច​បំផ្លាញទៅលើកុមារ។ កុមារភៀសខ្លួន ត្រូវការដោយអស់សង្ឃឹមនូវបរិស្ថានស្អាត និង​ការ​ការពារ ព្រមទាំងជំនួយ និងហិរញ្ញវត្ថុដែលកើនឡើង​ពីផ្នែក​នៃសហគមន៍អន្តរជាតិ។

កុមារ និងយុវជន វ័យជំទង់ គឺជាជនរងគ្រោះពីអំពើហិង្សទ្វេដង។ លើសពីការបង្ខំឲ្យ​ផ្លាស់​ទី​លំនៅជារឿយៗ ទៅដោយគ្មានគ្រួសារ បោះបង់ការសិក្សា និង​នៅក្នុងករណីជាច្រើន គឺ​មិន​ទទួល​​ប្រយោជន៍នៃលក្ខខណ្ឌអប្បបរិមានៃការរស់រានផង​ដែរ ពួកគេត្រូវទទួលរង​ការបំពាន​ផ្លូវ​ភេទ ការកេងប្រវញ្ច័ និងការរំលោភទៀតផង។

យូនីសេហ្វ គូសបញ្ជាក់ថា ដូច្នេះ កុមារចូលរួមកាន់តែច្រើនឡើងៗ ជារឿយៗ នៅក្នុងក្រុម​យោធា ដែលសាបព្រួស​ការ​ភ័យខ្លាច នៅក្នុងប្រទេសមួយ ដែលមាន ប្រជាជន ៩០% រស់​នៅ​ក្នុង​ភាពក្រីក្រ និងដែលជាកន្លែងដែល កុមារ ៣លាននាក់ ត្រូវការជំនួយមនុស្សធម៌។

អង្គការសហប្រជាជាតិ អធិប្បាយថា ៖ “តម្រូវការនៅក្នុងប្រទេសហៃទី កើន​ឡើង​មិនឈប់​ឈរ​គ្រប់អ្វីៗ ដោយសារមានភាពគ្រោះថ្នាក់សម្រាប់កុមារ។ មនុស្សម្នាក់ៗមាន​តួនាទី​ដើម្បី​ធ្វើ​ការ​ដើម្បីផ្លាស់ប្តូរ​ទិសដៅ និងធ្វើឲ្យប្រាកដថា កុមារអាចវិល​ត្រឡប់ទៅរៀន។ ពួកគេត្រូវមាន​សុវត្ថិភាព និងអាចទទួលបាននូវសេវាកម្មមូលដ្ឋាន។

ហៃទីប្រទេសដែលក្របំផុត​នៅទ្វីបអាម៉េរិក ជាច្រើនឆ្នាំមកហើយ បានរអិលធ្លាក់ទៅក្នុងវិបត្តិ​សេដ្ឋកិច្ច នយោបាយ និងសន្តិសុខ ហើយនិងធ្វើឲ្យកាន់តែឈឺចាប់​ដោយអំពើហិង្សានៃក្រុម​អន្ធពាល ដែលគ្រប់គ្រងរដ្ឋធានី ៨០%។

ក្រុមប៉ូលីសកេនយ៉ាដំបូង បានមកដល់រដ្ឋធានីព័រអូប្រាំង កាលពីថ្ងៃទី២៥ ខែឧសភា នៅក្នុង​ក្រប​​ខណ្ឌ​​​នៃបេសកកម្មអន្តរជាតិ​ដែលសំដៅ​ស្តារ​សន្តិសុខនៅក្នុង​ប្រទេស។

នៅអំឡុងដំណើរទស្សនកិច្ចនៅទីក្រុងវ៉ាស៊ីនតុន លោកហ្គារី កូនីល នាយករដ្ឋមន្រ្តីថ្មី​របស់​ប្រទេស​ហៃទី បានបញ្ជាក់ថា សហរដ្ឋអាម៉េរិកដែលចូលពាក់ព័ន្ធយ៉ាងច្រើនរួចហើយ​នៅក្នុង​ការ​គាំទ្រ​កងកម្លាំងពហុជាតិ​ក្នុងការគាំទ្រប៉ូលីសហៃទី ក៏តាំងចិត្ត​ក្នុងការងារបន្តទៀត​ដើម្បី​ពង្រឹង​សមត្ថភាពរបស់ខ្លួន។

កាលពីថ្ងៃចន្ទ លោកហ្គារី កូនីល បាននិយាយទៅកាន់អ្នកកាសែតថា អាម៉េរិក​បាន​សន្យា​ធ្វើ​ការ​​​​នៅលើការពង្រឹង​ប្រសិទ្ធភាព និងសមត្ថភាព​នៃបេសកកម្ម​ដែលដឹក​នាំដោយកេនយ៉ា ដែល​​​ក្រុមប៉ូលីសដំបូង បានមកដល់ហៃទី​រួចហើយ។