អាកាសធាតុក្តៅហើយស្ងួតដូចសព្វថ្ងៃ ប្រយ័ត្នគ្រោះអគ្គីភ័យ!

នៅក្នុងខណៈដែលកម្ពុជាកំពុងតែស្ថិតនៅក្នុងស្ថានភាពនៃអាកាសធាតុក្តៅបំផុតប្រចាំឆ្នាំនៅ ពេ​លសព្វថ្ងៃនេះសូមលើកកំពស់ និងប្រុងប្រយ័ត្នចំពោះគ្រោះអគ្គីភ័យជាយថាហេតុជាពិ​សេ​ស នៅក្នុងអំឡុងពេលបុណ្យចូលឆ្នាំថ្មីប្រពៃណីជាតិនៅចុងសប្តាហ៍នេះ។

អាកាសធាតុប៉ុន្មានថ្ងៃនេះក្តៅខ្លាំងណាស់ដោយពេលខ្លះវាអាចលោតឡើងរហូតដល់លើសពី ៤០ អង្សាសេ ជាពិសេសនៅពេលដែលយើងធ្វើដំណើរចេញក្រៅចន្លោះចាប់ពីម៉ោង ១ទៅ ម៉ោ​ង៤ ដូច្នេះស្ថានភាពនេះគឺគ្រោះថ្នាក់ណាស់ប្រសិនបើមានបញ្ហាផ្ទុះសេខ្សែភ្លើង ឆ្លងចរន្ត អគ្គិសនី ឬក៏សកម្មភាពធ្វេសប្រហែសណាមួយបានកើតមានឡើង។

ម្យ៉ាងវិញទៅ តាមក្បូនតម្រាប្រពៃណីខ្មែរនៅពេលដែលទទួលទេវតាឆ្នាំថ្មីនៅឆ្នាំនេះគឺនៅយប់​រាងជ្រៅបន្តិចដូច្នេះយើងទាំងអស់គ្នាអាចនឹងមានបញ្ហាងងុយគេង ប៉ុន្តែសូមលើកកំពស់ការ ប្រុ​ងប្រយ័ត្នណាបងប្អូន។ នៅពេលដែលអុធទៀតធូបនានា គឺសូមប្រុងប្រយ័ត្នចាំភ្លើងរលត់ ឬទៀ​នធូបឆេះអស់រលត់ចាំចូលគេង។ សូមកុំធ្វេសប្រហែសដុតទៀនធូបចោលហើយនាំគ្នា​ប្រា​ស់ខ្លួនសម្រាន្ត។

ការប្រហែសតែមួយនាទីយើងអាចក្លាយជាអ្នករងគ្រោះបាន អាកាសធាតុក្តៅបែបនេះស្ងួតខ្លាំង ងាយឆេះបំផុតនៅពេលដែលមានភ្លើងមានអ្វីដែលបង្កជាគ្រោះអគ្គិភ័យ។​

គ្រោះអគ្គិភ័យនេះប្រហែសមិនបានឡើយ ខណៈដែលកាលពីឆ្នាំ២០២៣កន្លងទៅ ​​គ្រោះ​ថ្នាក់​អគ្គិ​ភ័យ​បាន​កើត​ឡើង​ចំនួន​ ៧៦១​ លើក​នៅ​ទូទាំង​ប្រទេស ​ដែល​ករណី​នេះ​កើន​ឡើង ១៤៣​ លើក ​បើ​ប្រៀប​ទៅ​នឹង​ឆ្នាំ​ ២០២២​។

គ្រោះ​អគ្គិ​ភ័យនៅអំឡុងពេលនោះ​បាន​បណ្តាល​ឱ្យ​ស្លាប់​មនុស្សចំនួន ​៥៤​ នាក់ និង​របួស​មនុស្ស​ ៩៧​ នាក់ រួម​នឹង​បង្ក​ឱ្យ​ខូច​ខាត​ផ្ទះ​អស់​ចំនួន៥៧៩​ខ្នង​ផង​ដែរ​។​

សូមប្រុងប្រយ័ត្នទាំងអស់គ្នាជាពិសេសបងប្អូនប្រជាពលរដ្ឋដែលមានផ្ទះឈើ ពីព្រោះវាងាយស្រួលឆេះបំផុត ហើយនៅពេលឆេះគឺវាឆេះលឿន ពិបាកនឹងបាញពន្លត់ ឬមានវិធានការសង្រ្គោះ​។​

សរុបមកវិញសូម​ប្រជា​ពលរដ្ឋទាំងអស់មិនថាផ្ទះឈើ ឬថ្មទេ ត្រូវតែ​ប្រុង​ប្រយ័ត្ន និង​បង្កើន​ការ​កា​រ​ពារ​ក្នុង​អំឡុង​រដូវ​ប្រាំងជាពិសេសគឺពេលវេលាដែលអាកាសធាតុក្តៅហើយស្ងួតដូចសព្វថ្ងៃ​នេះ។ ស្ថាប័នធំៗមានក្រុមហ៊ុនឯកជនក្រសួងមន្ទីរជាដើមសូមដកភ្លើងបិទភ្លើង ដើម្បីជាការសន្សំ​សំចៃផង និង ជាការប្រុងប្រយ័ត្នគ្រោះអគ្គីភ័យដោយចៃដន្យផងដែរ៕