អង្គការសហប្រជាជាតិចោទប្រកាន់ទីក្រុងមូស្គូ លុបបំបាត់អត្តសញ្ញាណអ៊ុយក្រែននៅតំបន់ខ្លួនគ្រប់គ្រង
អង្គការសហប្រជាជាតិ នៅក្នុងរបាយការណ៍មួយដែលផ្សព្វផ្សាយកាលពីថ្ងៃពុធ បានថ្លែងថា រុស្ស៊ីបានបង្កើតបរិយាកាសភ័យខ្លាចនៅក្នុងតំបន់គ្រប់គ្រងនៅប្រទេសអ៊ុយក្រែន ដែលកងកម្លាំងរបស់ខ្លួន បានបង្កើតជំរុំប្រមូលផ្តុំ ការធ្វើទារុញកម្ម និងព្យាយាមលុបបំបាត់អត្តសញ្ញាណអ៊ុយក្រែន ជាពិសេសនៅលើក្មេងៗ ។
យោងតាមរបាយការណ៍ដែលលើកឡើងនៅក្នុងសេចក្តីប្រកាសព័ត៌មានរបស់ស្នងការជាន់ខ្ពស់នៃសិទ្ធមនុស្សរបស់អង្គការសហប្រជាជាតិ និងមានមូលដ្ឋានលើកិច្ចសម្ភាសន៍ចំនួន ២៣០០ ដងជាមួយជនរងគ្រោះ និងសាក្សីនានា បានឲ្យដឹងថា ៖ “ប្រទេសរុស្ស៊ីបានបង្កើតបរិយាកាសភ័យខ្លាចដ៏គួរឲ្យថប់បារម្ភនៅក្នុងតំបន់ខ្លួនគ្រប់គ្រងនៅអ៊ុយក្រែន ដែលប្រព្រឹត្តិការរំលោភក្នុងទ្រង់ទ្រាយធំទៅលើសិទ្ធអន្តរជាតិខាងមនុស្សធម៌ និងសិទ្ធមនុស្ស។”
សេចក្តីប្រកាសបញ្ជាក់ថា រុស្ស៊ីដាក់ឲ្យប្រើប្រាស់ភាសាខ្លួន បញ្ចូលជាសញ្ជាតិរុស្ស៊ី ច្បាប់ ប្រព័ន្ធយុត្តិធម៌ និងកម្មវិធីសិក្សារុស្ស៊ី និងលុបបំបាត់វប្បធម៌ និងអត្តសញ្ញាណអ៊ុយក្រែន។ កុមារត្រូវបានដាក់គោលដៅជាពិសេស ជាមួយនឹងការផ្លាស់ប្តូរកម្មវិធីសិក្សារបស់អ៊ុយក្រែន ដាក់កម្មវិធីរបស់រុស្ស៊ី។ តួយ៉ាង សេចក្តីផ្តើមនៅក្នុងសៀវភៅសិក្សាពន្យល់អំពីភាពត្រឹមត្រូវនៃការឈ្លានពានរបស់រុស្ស៊ី តួនាទីរបស់យុវជនក្នុងអង្គការរុស្ស៊ីនានា និងបង្រៀនពួកគេអំពីទឹកចិត្តស្នេហាជាតិរុស្ស៊ី។
ចំណែកសហគមន៍អឺរ៉ុប កាលពីថ្ងៃទី២០ ខែមីនា បានព្រមព្រៀងគ្នាដើម្បីដាក់ពិដានតម្លៃសម្រាប់ការនាំចូលផលិតផលកសិកម្មរបស់អ៊ុយក្រែនខ្លះ ដោយការប្រើប្រាស់ពន្ធគយ លើផលិតផលនានាដូចជា ពងទា សត្វបសុបក្សី ស្ករ ពោត និងទឹកឃ្មុំ ប៉ុន្តែមិនបានរាប់បញ្ជូលស្រូវសាលីនោះទេ។ កិច្ចព្រមព្រៀងត្រូវសម្រេចនៅក្នុងរាត្រីរវាងរដ្ឋសមាជិកសហគមន៍អឺរ៉ុប និងសភាអឺរ៉ុប ដើម្បីបន្តមួយឆ្នាំទៀត ចាប់តាំងពីខែមិថុនា មុនការលើកលែងជាទូទៅនូវពន្ធគយដែលព្រមព្រៀងតាំងពីឆ្នាំ២០២២ ជាមួយអ៊ុយក្រែនដើម្បីគាំទ្រទីក្រុងគៀវ បន្ទាប់បីការឈ្លានពានរបស់រុស្ស៊ី។
នៅប្រទេសអាឡឺម៉ង រដ្ឋមន្រ្តីការពារជាតិអាម៉េរិក លោកលយ អូស្ទីន បានសន្យាកាលពីថ្ងៃទី១៩ ខែមីនាថា ប្រទេសអាម៉េរិកនឹងមិនបណ្តោយឲ្យអ៊ុយក្រែនចាញ់សង្រ្គាមនោះទេ ប្រឈមមុខនឹងរុស្ស៊ី។ លោកបាននិយាយសង្ឃឹមថា នឹងឆាប់ទទួលបានភ្លើងបៃតង់ពីសភាអាម៉េរិកសម្រាប់ជំនួយអាម៉េរិកដល់អ៊ុយក្រែន។ លោកលយ អូស្ទីនបានថ្លែងដែរថា សហរដ្ឋអាម៉េរិកគាំទ្រអ៊ុយក្រែនដោយសារតែវាជាអំពើល្អ និងដោយសារតែអាម៉េរិកព្រួយបារម្ភអំពីសេរីភាព នៅពេលដែលវាត្រូវបានទទួលរងការគំរាមកំហែង។ ប៉ុន្តែអាម៉េរិកក៏គាំទ្រអ៊ុយក្រែនដោយសារតែវាចាំបាច់សម្រាប់សន្តិសុខផ្ទាល់ខ្លួនរបស់អាម៉េរិកផងដែរ។”។
អ៊ុយក្រែនបានទទ្ទឹងរង់ចាំដោយអត់ធ្មត់នូវជំនួយអាម៉េរិកដែលមានទឹកប្រាក់ប្រមាណ ៥៥ពាន់លានអឺរ៉ូ ដែលត្រូវបានរាំងស្ទះនៅសភាអាម៉េរិកនដោយសារហេតុផលនៃការជំទាស់របស់អ្នកតំណាងរាស្រ្តគណបក្សសាធារណរដ្ឋ។ ប្រមុខការទូតអ៊ុយក្រែនធ្លាប់បានបញ្ជាក់ថា អ៊ុយក្រែនបានប៉ះទង្គិចជាមួយនឹងការរាំងខ្ទប់មិនចេះចប់មិនចេះហើយនេះ។
ប៉ុន្តែលោកលយ អូស្ទីន ចង់បង្ហាញទំនុកចិត្តថា លោកនឹងបន្តវាយតម្លៃថា សភាទាំងពីររបស់អាម៉េរិក នឹងគាំទ្រយ៉ាងទូលំទូលាយនូវសកម្មភាពជួយដល់អ៊ុយក្រែន ហើយដូច្នេះលោកមានសុទិដ្ឋិនិយមសម្រាប់លទ្ធភាពនៃសកម្មភាពនាពេលអនាគត។
ចំណែកប្រទេសអឺរ៉ុប មិនអាចជំនួសអវត្តមាននៃជំនួយអាម៉េរិកបានទេ។ ប្រទេសអាឡឺម៉ង ដែលជាអ្នកចូលរួមទី១នៃការគាំទ្រខាងយោធាដល់អ៊ុយក្រែន បានប្រកាសកាលពីថ្ងៃអង្គារនូវកញ្ចប់ថវិកាបន្ថែមចំនួន ៥០០ អឺរ៉ូ ជួយដល់អ៊ុយក្រែន។
Daily Program
