សម្តេចប៉ាប៖ ពិភពលោកបច្ចុប្បន្ន ត្រូវការសន្តិភាពបំផុត

សម្តេចប៉ាបហ្រ្វង់ស៊ីស្កូបានបន្តគោរពអញ្ជើញមនុស្សជាតិគ្រប់គ្នាឱ្យអធិដ្ឋានសុំសន្តិភាពនៅក្នុ​ងពិភពលោករបស់យើងនៅពេលនេះហើយជំរុញឱ្យមនុស្សជាតិ កុំភ្លេចអ៊ុយក្រែន ប៉ាឡេស្ទីន អ៊ី​ស្រាអែល មីយ៉ាន់ម៉ា និងប្រទេសទាំងអស់ដែលរងទុក្ខដោយសារជម្លោះ និង​ហិង្សា។

វ៉ាទីកង់ញូវបានរាយការណ៍ថា សម្តេចប៉ាបបានលើកឡើងជាថ្មីម្តងទៀតបែបនេះនៅក្នុងកម្មវិធីអប់រំជំនឿប្រចាំសប្តាហ៍ ជាមួយនឹងគ្រីស្តបរិស័ទរាប់សិបនាក់ដែលបានប្រមូលម្តុំគ្នានៅទីលានសន្តសិលា។

សម្តេចប៉ាបបានមានបន្ទូលថា ៖ «ចូរយើងទាំងអស់គ្នាអធិស្ឋានសុំសន្តិភាព យើងត្រូវការសន្តិភា​ព ពិភពលោករបស់យើងកំពុងមានសង្រ្គាម»។

សាររបស់សម្តេចប៉ាបបែបនេះនៅពេលដែល មរណៈបុគ្គលគឺបានកើតមានជាបន្តបន្ទាប់ដោ​យសារតែការវាយ ប្រហារដោយយន្តហោះគ្មានមនុស្សបើកនៅអ៊ុយក្រែន ជម្លោះដែលពិបាកផ្សះ​ផ្សានៅមជ្ឈឹមបូពារ ជាមួយនឹងវិបត្តិផ្ទៃក្នុង និងស្ថានភាពរបស់ដ៏សែនទារុណរបស់ជនជាតិរ៉ូហ៊ីងយ៉ានៅមីយ៉ានម៉ា។

សម្តេចប៉ាបបានមានបន្ទូលថា ៖ «សូមយើងកុំឱ្យបំភ្លេចអ្នកធ្វើទុក្ករកម្មនៅអ៊ុយក្រែនដែលកំ​ពុងរងទុក្ខវេទនាយ៉ាងខ្លាំង។ សូមកុំភ្លេចប៉ាឡេស្ទីននិង អ៊ីស្រាអែល សូមកុំភ្លេចមីយ៉ាន់ម៉ា ហើ​យកុំឱ្យយើងភ្លេចប្រទេសជាច្រើនដែលកំពុងមានសង្រ្គាម»។

សម្តេចប៉ាបបានអំពាវនាវថា ៖ «បងប្អូនប្រុសស្រី យើងត្រូវអធិដ្ឋានសុំសន្តិភាពក្នុងគ្រាសង្រ្គាមលោ​កនេះ»។

សម្តេចប៉ាបបានមានបន្ទូលថា សន្តិភាពគឺជាអ្វីដែលមនុស្សម្នាក់ៗអាចកសាងបានដោយការរួ​មចំណែករបស់ពួកគេផ្ទាល់ សូម្បីតែកូនក្មេងក៏ដោយ៕