រដ្ឋមន្ត្រីការពារជាតិអាមេរិក មកកាន់ប្រទេសកម្ពុជា នាព្រឹកនេះ

លោក Lloyd Austin រដ្ឋមន្ត្រីការពារជាតិអាមេរិក មកកាន់ប្រទេសកម្ពុជា ដើម្បីជួបជាមួ​យមន្ត្រីជាន់ខ្ពស់។ នេះជាលើកទីពីរ នៃដំណើរទស្សនកិច្ចរបស់លោក រដ្ឋមន្ត្រី Austin ក្នុងតំណែងរបស់លោក ក្រោយពីធ្លាប់បានមកចូលរួមកិច្ចប្រជុំរដ្ឋមន្ត្រីការពារជាតិអា​ស៊ាន​បូក កាលពីឆ្នាំ ២០២២ ។​

លោករដ្ឋមន្ត្រី Austin ត្រូវបានទទួលស្វាគមន៍ដោយមន្ត្រីជាន់ខ្ពស់តំណា​ងពីកងយោធ​ពលខេ​មរភូមិន្ទ និងបានជួបជាមួយអតីតនិស្សិតកម្ពុជា ដែលធ្លាប់បានទទួលការអប់រំខា​ង​កម្មវិធីយោ​ធា ពីសហរដ្ឋអាមេរិក ។

យោងតាមសេចក្តីប្រកាសព័ត៌មានរបស់ក្រសួងការពារជាតិ ស្តីពីដំណើរទស្សនកិច្ចផ្លូវការជា​ប្រវត្តិសា​ស្ត្ររបស់Lloyd Austin) រដ្ឋមន្ត្រីក្រសួងការពារជាតិសហរដ្ឋអាមេរិក នៅព្រះរា​ជាណាចក្រកម្ពុជា បានឱ្យដឹង រដ្ឋមន្ត្រីក្រសួងការពារជាតិសហរដ្ឋអាមេរិក នឹ​ងដឹកនាំគ​ណៈប្រតិភូ ជាន់ខ្ពស់ នៃក្រសួងការពារជាតិសហរដ្ឋអាមេរិក អញ្ជើញមកបំពេញទស្ស​នកិច្ចផ្លូ​វការជាប្រវត្តិសាស្ត លើកដំបូង នៅព្រះរាជាណាចក្រកម្ពុជា ដែលនឹងប្រព្រឹត្តទៅ នៅថ្ងៃទី០៤ ខែមិថុនា ឆ្នាំ២០២៤។

ក្នុងក្របខ័ណ្ឌទស្សនកិច្ចនេះ លោក នឹងជួបសម្ដែងការគួរសម និងពិភាក្សា ការងារដាច់​ដោយឡែក ជាមួយថ្នាក់ដឹកនាំជាន់ខ្ពស់មួយចំនួន នៃព្រះរាជាណាចក្រកម្ពុជា ដែលក្នុងនោះ រួមមាន៖ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា សម្តេច ធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកនាយ​ឧត្ដម​សេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដើម្បីបន្តពង្រឹង និង ពង្រីកកិច្ច​សហប្រតិបត្តិការល្អរវាងប្រទេសទាំងពីរ កម្ពុជា- អាមេរិក ដែលមានជាង៧០ឆ្នាំមកហើយ ជាពិសេសតាមរយៈ ការជំរុញការអនុវត្ត កិច្ចសហប្រតិបត្តិការរបស់រដ្ឋាភិបាលទាំងពីរ។

ដំណើរទស្សនកិច្ចផ្លូវការ លោក ឡយ អូស្ទីន ​នឹងបញ្ជាក់ជាថ្មី នូវចំណងមិត្តភាពដ៏យូរ​អង្វែង និងគូសបញ្ជាក់ពីការប្ដេជ្ញាចិត្តរបស់ក្រសួងការពារជាតិ អាមេរិក និងកងយោធ​ពល​ខេមរភូមិន្ទ ក្នុងការសហការជាដៃគូដ៏សំខាន់ ដើម្បីជំរុញកិច្ចសហប្រតិបត្តិការ ការពារជាតិ​ឱ្យកាន់តែស៊ីជម្រៅ សម្រាប់ការថែរក្សានូវ សន្តិភាព ស្ថិរភាព និងការអភិវឌ្ឍប្រកបដោយ ចីរភាពរបស់ប្រទេសទាំងពីរ ក៏ដូចជាសម្រាប់តំបន់ទាំងមូល។​​

នាព្រឹកថ្ងៃទី​៤ ខែមិថុនានេះ សម្តេច តេជោ ហ៊ុន សែន ប្រធានព្រឹទ្ធសភា​​បានអនុញ្ញា​តឱ្យលោក ឡយ ជេម អូស្ទីន III (Lloyd James Austin III) រដ្ឋមន្ត្រីការពារជាតិស​ហរដ្ឋ​អាមេរិក ចូលជួបសម្ដែងការគួរសម និង ពិភាក្សាកា​រងារ នៅវិមានព្រឹទ្ធសភា រាជធានី​ភ្នំពេញ។

បន្ទាប់ពីនេះ សម្តេចធិបតី ហ៊ុន ម៉ាណែត ក៏បានជួបជាមួយ លោក Lloyd James Austin III រដ្ឋមន្ត្រីក្រសួងការពារជាតិសហរដ្ឋអាមេរិក ក្នុងជំនួបសម្តែងការគួរសម និងពិភាក្សាផងដែរ៕