ព្រះសហគមន៍កំពុងយកចិត្តទុកដាក់លើការស្តារសេចក្តីថ្លៃថ្នូររបស់មនុស្ស និងក្តីសង្ឃឹមជនរងគ្រោះដោយស្កែម

ការជួញដូរមនុស្សនៅតែបន្តមាន គ្រាន់តែវាប្តូរជាទម្រង់ថ្មីៗ នៅពេលដែលបច្ចេកវិទ្យារីកចម្រើន ហើយដើម្បីប្រឈមនឹងបញ្ហានេះ ព្រះសហគមន៍កាតូលិកបាន និងកំពុងតែយកចិត្តទុកដាក់លើពួកគេ។

តាមសេចក្តីរាយការណ៍របស់វ៉ាទីកង់ញូវ នៅពេលដែលបច្ចេកវិទ្យារីកចម្រើន អ្នកជួញដូរក៏សម្របខ្លួនផងដែរ ដោយប្រើប្រាស់ប្រព័ន្ធផ្សព្វផ្សាយសង្គម វេទិកាអនឡាញ និងយុទ្ធសាស្ត្រជ្រើសរើសបុគ្គលិកបោកប្រាស់ ដើម្បីកេងប្រវ័ញ្ចមនុស្សដែលស្វែងរកឱកាសកាន់តែប្រសើរ។

ពាក់ព័ន្ធនឹងបញ្ហានេះ ព្រះសហគមន៍កាតូលិកបានចាត់ទុកថា ការផ្តល់ជូនការងារដែលសន្យាថានឹងមានក្តីសង្ឃឹម និងអនាគត អាចក្លាយជាផ្លូវចូលទៅក្នុងការភ័យខ្លាច ការរំលោភបំពាន និងការកេងប្រវ័ញ្ច។

ពាក់ព័ន្ធនឹងបញ្ហានេះ សម្តេចប៉ាប ទ្រង់ធ្លាប់មានបន្ទូលឱ្យព្រះសហគមន៍យកចិត្តទុកដាក់លើតម្លៃស្នូលរបស់មនុស្ស។ សម្តេចប៉ាបតែងតែរំលឹកថា សេចក្តីថ្លៃថ្នូររបស់មនុស្សត្រូវតែនៅជាចំណុចកណ្តាលនៃការអភិវឌ្ឍសង្គម សេដ្ឋកិច្ច និងបច្ចេកវិទ្យាទាំងអស់។ ទ្រង់បានមានបន្ទូលថា ការងារមិនត្រឹមតែជាមធ្យោបាយមួយដើម្បីរកប្រាក់ចិញ្ចឹមជីវិតប៉ុណ្ណោះទេ ប៉ុន្តែវាគឺជាការបង្ហាញពីសេចក្តីថ្លៃថ្នូររបស់មនុស្ស ការចូលរួមក្នុងការងារច្នៃប្រឌិតរបស់ព្រះ និងជាការរួមចំណែកដល់ប្រយោជន៍រួម។

សព្វថ្ងៃនេះ ការផ្លាស់ប្តូរឌីជីថល និងបញ្ញាសិប្បនិម្មិតផ្តល់នូវលទ្ធភាពដ៏អស្ចារ្យសម្រាប់មនុស្សជាតិ ប៉ុន្តែយ៉ាងណាក៏ដោយ បច្ចេកវិទ្យាត្រូវតែបម្រើមនុស្សជានិច្ច។ វាមិនត្រូវក្លាយជាឧបករណ៍ដែលធ្វើឱ្យមនុស្សចុះខ្សោយ ឬក្លាយជាវត្ថុរកប្រាក់ចំណេញ និងការកេងប្រវ័ញ្ចឡើយ។

ការពិតនៃឧក្រិដ្ឋកម្មដោយបង្ខំក្នុងប្រតិបត្តិការបោកប្រាស់តាមប្រព័ន្ធអនឡាញ (ស្កែម) គឺជាការរំលោភបំពានយ៉ាងធ្ងន់ធ្ងរលើសេចក្តីថ្លៃថ្នូរនៃការងារ។ ជនរងគ្រោះដោយការជួញដូរត្រូវបានដកហូតសេរីភាព សមត្ថភាពរបស់ពួកគេត្រូវបានគេកេងប្រវ័ញ្ច ហើយតម្លៃជាមនុស្សរបស់ពួកគេត្រូវបានបដិសេធ។ ពួកគេត្រូវបានចាត់ទុកជាទំនិញ ជាងជាមនុស្ស។