ទោះបីមានការលំបាកខាងសេដ្ឋកិច្ច កាលពីថ្ងៃពុធ ប្រទេសចិនដាក់គោលដៅកំណើនសេដ្ឋកិច្ចថាមានប្រមាណ ៥% នៅឆ្នាំ២០២៥ ដោយផ្តោចអារម្មណ៍លើតម្រូវការប្រើប្រាស់ក្នុងស្រុក។
កាលពីថ្ងៃពុធ ទី៥ ប្រទេសចិនបានប្រកាសដាក់គោលដៅកំណើនសេដ្ឋកិច្ច ប្រមាណ ៥% នៅឆ្នាំ២០២៥ និងទប់ទល់ឱនភាពថវិកា នៅក្នុងបរិបទសង្រ្គាមពាណិជ្ជកម្មដែលកើតមានជាមួយសហរដ្ឋអាម៉េរិក និងការលំបាកខាងសេដ្ឋកិច្ចផ្ទៃក្នុងដែលរ៉ាំរ៉ៃ។
ការថ្លែងទាំងនេះត្រូវបានធ្វើឡើងដោយនាយករដ្ឋមន្រ្តីចិន លោកលី ឈាង នៅពេលបើកកិច្ចប្រជុំប្រចាំឆ្នាំនៃសភាជាតិប្រជាជន (ANP) នៅទីក្រុងប៉េកាំង ដែលគ្រប់គ្រងដោយគណបក្សកាន់អំណាចកុំមុយនីស្តចិន (PCC) និងមានការចូលរួមពីប្រតិភូរាប់ពាន់នាក់។
សេដ្ឋកិច្ចចិនបានប្រឈមមុខនឹងវិបត្តិអចិន្រ្តៃយ៍ពីវិស័យអចលនទ្រព្យជាប់គាំង និងអត្រាដ៏ខ្ពស់នៃភាពអត់ការងារធ្វើក្នុងចំណោមយុវជន។ ទោះបីជាមានរឿងនេះ លោកលី ឈាង បានថ្លែងអំពីគោលដៅនៃកំណើនប្រមាណ ៥% សម្រាប់ឆ្នាំ២០២៥។ ហើយទីក្រុងប៉េកាំង ក៏គ្រោងនឹងបង្កើតការងារ ១២លានកន្លែងនៅទីក្រុងសម្រាប់ឆ្នាំ២០២៥។
លោកឌីឡា ឡូ សកលវិទ្យាធិការរងនៅសកលវិទ្យាល័យបច្ចេកវិជ្ជាណានយ៉ាង នៅសិង្ហបុរី បានសន្និដ្ឋានថា ៖ “គោលដៅនៃកំណើននេះហាក់ដូចជាស្មុគស្មាញ ប៉ុន្តែអាចសម្រេចទៅបាន”។ អ្នកជំនាញបានបន្តថា ប៉ុន្តែកម្រិតដ៏ខ្សោយនៃការប្រើប្រាស់បង្ហាញអំពីបញ្ហានៃទំនុកចិត្តរបស់អ្នកប្រើប្រាស់ ដែលមានភាពកាន់តែលំបាកក្នុងការដោះស្រាយ។
លោកហ្ស៊ូលីយាង អេវ៉ាន ព្រីឆាក នៅក្រុមហ៊ុន Capital Economics បានសរសេរថា ៖ ”យើងនៅតែមានការសង្ស័យនៅលើសមត្ថភាពនៃការថ្លែងបញ្ចៀសការយឺតយ៉ាវនៃកំណើននៅឆ្នាំនេះ ជាពិសេសជាមួយនឹងអវត្តមាននៃការតម្រង់ទិសឡើងវិញដែលគួរឲ្យកត់សម្គាល់សម្រាប់ការចំណាយសាធារណឆ្ពោះទៅកាន់ការគាំទ្រការប្រើប្រាស់”។ អ្នកឯកទេស បញ្ជាក់ថា ៖ “គោលដៅកំណើនអាចសម្រេចបានត្រឹមត្រូវនៅឆ្នាំមុន គឺដោយសារតែការនាំចេញខ្លាំងក្លាជាងការរំពឹងទុក និងផែនការផ្តល់សំទុះនៅនាទីចុងក្រោយ”។ លោកវាយតម្លៃថា ៖ “ជាមួយនឹងកិច្ចខិតខំប្រឹងប្រែងទាំងនេះ ភាពត្រឹមត្រូវនៃអត្រាកំណើន ៥% ដែលផ្សព្វផ្សាយដោយការិយាល័យជាតិស្ថិតិចិន (BNS) គឺអាចពិភាក្សាបាន”។
ក្រៅពីការលំបាកខាងក្នុងសេដ្ឋកិច្ច ចិនត្រូវប្រឈមមុខនឹងការរីកធំនៃសង្រ្គាមពាណិជ្ជកម្មជាមួយទីក្រុងវ៉ាស៊ីនតុន ដែលការអនុវត្តចុងក្រោយបាននាំទៅដល់ការកើនឡើង ២០% នៃច្បាប់ពន្ធគយបន្ថែមនៅលើផលិតកម្មដែលនាំចេញពីចិន ចូលមកសហរដ្ឋអាម៉េរិក។
ពន្ធគយទាំងនេះនឹងត្រូវប៉ះពាល់ជាច្រើនរាប់រយពាន់លានដុល្លារក្នុងការផ្លាស់ប្តូរពាណិជ្ជកម្មរវាងយក្សសេដ្ឋកិច្ចពិភពលោកដ៏ធំបំផុតទាំងពីរ និងធ្វើឲ្យលំបាកដល់ការនាំចេញរបស់ចិន ដែលជាសរសរស្តម្ភមួយក្នុងចំណោមសរសរស្តម្ភនានានៃកំណើនសេដ្ឋកិច្ចរបស់ចិន។
ដើម្បីទ្រទ្រង់សេដ្ឋកិច្ចរបស់ខ្លួន ទីក្រុងប៉េកាំងបានសន្យានឹងធ្វើឲ្យការបញ្ជាទិញក្នុងស្រុកក្លាយជាក្បាលម៉ាស៊ីនដ៏ខ្លាំងក្លាអូសកំណើនសេដ្ឋកិច្ចនៅឆ្នាំ២០២៥។
របាយការណ៍សកម្មភាពរបស់រដ្ឋាភិបាល បានគូសបញ្ជាក់ថា ៖ ”យើង (...) នឹងជួសជុលឲ្យបានលឿនបំផុតចំពោះភាពទន់ខ្សោយនៃការប្រើប្រាស់ក្នុងស្រុក ជាមួយការបញ្ជាទិញរបស់អ្នកប្រើប្រាស់ ដើម្បីឲ្យការប្រើប្រាស់ក្នុងស្រុកនេះក្លាយជាក្បាលម៉ាស៊ីនដ៏ខ្លាំងក្លា និងជាយុទ្ធសាស្រ្តនៃកំណើនសេដ្ឋកិច្ច”។
កាលពីថ្ងៃអង្គារ ប្រទេសចិនក៏បានថ្លែងអំពីវិធានការបឋមៗឆ្លើយតបនឹងច្បាប់ពន្ធគយថ្មីរបស់អាម៉េរិកផងដែរ និងសន្យាប្រយុទ្ធរហូតដល់ទីបញ្ចប់ លើរឿងនេះ។អាជ្ញាធរចិននឹងដាក់ពន្ធគយរហូតដល់ ១៥% លើផលិតផលកសិកម្មរបស់អាម៉េរិក មានជាអាទិ៍សណ្តែក សាច់ជ្រូក ស្រូវសាលី ចាប់ពីថ្ងៃទី១០ ខែមីនា តទៅ។
Daily Program
