បញ្ញាវ័នឥណ្ឌូណេស៊ី និងអ្នកដឹកនាំសាសនាពិភាក្សាអំពីឥទ្ធិពលរបស់សម្តេចប៉ាបលើទិដ្ឋភាពសាសនា

រដ្ឋមន្ត្រីក្រសួងកិច្ចការសាសនាឥណ្ឌូណេស៊ី សាស្ត្រាចារ្យ  ណាសារូឌិន អូម៉ា (KH Nasaruddin Umar) បានគូសបញ្ជាក់អំពីសារៈសំខាន់នៃភាពសុខដុមរមនារវាងជំនឿសាសនា និងការអត់ឱនចំពោះសាសនា ក្នុងអំឡុងពេលកិច្ចពិភាក្សា និងសៀវភៅនៅសាកលវិទ្យាល័យ អាតម៉ា ហ្សាវ៉ា កាតូលិក ( Atma Jaya Catholic )​នៃប្រទេសឥណ្ឌូនេស៊ី។

កិច្ចពិភាក្សាដែលរៀបចំនៅសាកលវិទ្យាល័យ នោះបាន រៀបចំឡើងដោយសហការជាមួយមូលនិធិ Frans Seda ។ កិច្ចពិភាក្សាបានឆ្លុះបញ្ចាំងពីដំណើរទស្សនកិច្ចរបស់សម្តេចប៉ាបហ្រ្វងស៊ីស្កូ មកកាន់ប្រទេសឥណ្ឌូនេស៊ីនៅថ្ងៃទី៣ ដល់ ថ្ងៃទី​៦ ខែកញ្ញា ឆ្នាំ ២០២៤។

កិច្ចពិភាក្សានេះបានផ្តោតសំខាន់នៅលើទស្សនៈរបស់ឥស្សរជនឥស្លាមឥណ្ឌូណេស៊ីលេចធ្លោមួយចំនួន ទាក់ទងនឹងដំណើរទស្សនកិច្ចរបស់សម្តេចប៉ាប ចំពេលដែលសាកលវិទ្យាល័យនោះ ប្រារព្ធពិធីខួបលើកទី ១៣ របស់ខ្លួនស្របតាមប្រធានបទអំពីសេចក្តីជំនឿ ភាតរភាព និងការអាណិតអាសូរ។

នាឱកាសនោះលោក រដ្ឋមន្ត្រីក្រសួង បានសង្កត់ធ្ងន់លើភាពជាបន្ទាន់នៃការជំរុញឱ្យមានសុខដុមរមនាអន្តរជំនឿនៅក្នុងបរិយាកាសពិភពលោកដែលកាន់តែស្មុគស្មាញ។

លោកបានលើកឡើងថា “បញ្ហា​ប្រឈម​របស់​យើង​សព្វថ្ងៃ​គឺ​បង្កើត​ចន្លោះ​ដែល​ពង្រឹង​ទំនាក់ទំនង​អន្តរជំនឿ​ជាជាង​ពង្រីក​ការ​បែងចែក។ កម្មវិធីសិក្សាដែលយើងបានរៀបចំឡើងនេះ គោលបំណងដើម្បីតម្រង់ទិសមនុស្សជំនាន់ក្រោយជាមួយនឹងការយល់ដឹងអំពីសាសនាដ៏រឹងមាំ ដោយមិនមានការបង្រៀនពីការស្អប់ខ្ពើម»។

លោកសាស្ត្រាចារ្យ ដែលជាអតីតមហាអ៊ីម៉ាមនៃវិហារឥស្លាម Istiqlal បានរំលឹកពីការជួបផ្ទាល់របស់លោក ជាមួយសម្តេចប៉ាប នៅក្នុងបរិវេណនៃវិហារនេះ ដោយពណ៌នាថាវាជាពេលវេលាដ៏សំខាន់មួយនៅក្នុងកិច្ចសន្ទនាអន្តរជំនឿ។