ក្រុមយុវជនត្រៀមទទួលអគ្គសញ្ញាមាំមួននៅទីក្រុងមុំបៃ ចាប់ផ្តើមយុទ្ធនាការសន្សំសំចៃទឹក ដាំដើមឈើ និងគ្រប់គ្រងកាកសំណល់

យុវជនចំនួន ៧៥ នាក់ ដែលកំពុងត្រៀមខ្លួនទទួលអគ្គសញ្ញាមាំមួន (Confirmation) នៅព្រះវិហារសន្តអាន់តូនី (St. Anthony) ក្នុងតំបន់វ៉ាកូឡា (Vakola) ទីក្រុងមុំបៃ បានចាប់ផ្តើមគំនិតផ្តួចផ្តើមផ្នែកបរិស្ថានជាច្រើន ក្នុងអំឡុងពេល «រដូវកាលនៃការបង្កើត» (Season of Creation) ឆ្នាំ២០២៦ ដោយផ្សារភ្ជាប់ការបណ្តុះបណ្តាលជំនឿគ្រីស្តបរិស័ទ ទៅនឹងសកម្មភាពជាក់ស្តែងក្នុងការថែរក្សាបរិស្ថាន។

បច្ចុប្បន្ននេះ ទីក្រុងមុំបៃ ដែលជាទីក្រុងធំបំផុតមួយរបស់ប្រទេសឥណ្ឌា កំពុងប្រឈមមុខនឹងបញ្ហាកាន់តែធ្ងន់ធ្ងរពាក់ព័ន្ធនឹងការប្រើប្រាស់ទឹក ការគ្រប់គ្រងកាកសំណល់ និងនិរន្តរភាពបរិស្ថានក្នុងទីក្រុង។ គំនិតផ្តួចផ្តើមរបស់សហគមន៍នេះ មានគោលបំណងលើកទឹកចិត្តឱ្យក្រុមគ្រួសារនានា និងសហគមន៍ទាំងមូល ចូលរួមដោះស្រាយបញ្ហាទាំងនេះជាមួយគ្នា។

ក្រោមការណែនាំរបស់លោកបូជាចារ្យ ហ្វ្រង់ស៊ីស កាវ៉ាល់ហូ (Fr. Francis Carvalho) ដែលជាអភិបាលព្រះវិហារ និងជាអ្នកដឹកនាំខាងផ្លូវវិញ្ញាណ បានបញ្ជាក់ថា យុវជនទាំងនោះកំពុងផ្តោតសំខាន់លើការអភិរក្សទឹក ការដាំដើមឈើ ការធ្វើជីកំប៉ុស្តពីកាកសំណល់ក្នុងផ្ទះ ការគ្រប់គ្រងសំណល់ប្លាស្ទិក និងការលើកកម្ពស់ការយល់ដឹងអំពីបរិស្ថាន។

លោកបានបន្តថា យុទ្ធនាការអភិរក្សទឹកដែលបានចាប់ផ្តើមនៅថ្ងៃទី ០៤ ខែតុលា មានប្រធានបទថា៖ «មួយគ្រួសារ ធុងទឹកពីរក្នុងមួយថ្ងៃ៖ សហគមន៍ព្រះវិហារសន្សំទឹកបានរាប់លានលីត្រ»។ សមាជិកព្រះសហគមន៍ត្រូវបានលើកទឹកចិត្តឱ្យសន្សំទឹកចំនួនពីរធុងក្នុងមួយថ្ងៃ ដែលប៉ាន់ស្មានថាមានបរិមាណប្រហែល ៣០ លីត្រក្នុងមួយគ្រួសារ។ ដោយមានការគាំទ្រពីគ្រួសារសមាជិកព្រះវិហារប្រហែល ៣ ០០០ គ្រួសារ យុទ្ធនាការនេះមានគោលបំណងសន្សំទឹកឱ្យបានប្រមាណ ២,៧ លានលីត្រក្នុងមួយខែ ប្រសិនបើគ្រប់គ្រួសារទាំងអស់ចូលរួមអនុវត្ត។

ទន្ទឹមនឹងនេះ យុវជនទាំងនោះក៏បានបណ្តុះ និងថែទាំរុក្ខជាតិឱសថ ព្រមទាំងរុក្ខជាតិផ្កាជាង ១ ២០០ ដើម ក្នុងរយៈពេលពីរខែ ដើម្បីចែកជូនដោយឥតគិតថ្លៃដល់សមាជិកព្រះសហគមន៍។ គំនិតផ្តួចផ្តើមនេះ មានគោលបំណងលើកទឹកចិត្តឱ្យមានការដាំដុះនៅតាមគេហដ្ឋាន គាំទ្រដល់ភាពសម្បូរបែបនៃជីវចម្រុះក្នុងទីក្រុង និងផ្តល់ឱកាសឱ្យយុវជនបានបំពេញតួនាទីផ្ទាល់ ក្នុងការថែរក្សាស្នាព្រះហស្តនៃការបង្កើតរបស់ព្រះជាម្ចាស់។