ថ្ងៃទី៣០ ខែសីហា ឆ្នាំ២០២៥ អត្ថបទគម្ពីរ (ម៉ាថាយ ២៥,១៤-៣០)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ជម្រាបសួរ បងប្អូនជាទីស្រឡាញ់! ខ្ញុំអញ្ជើញបងប្អូនអធិដ្ឋាន ទីណាមានមេត្តានិងសេចក្តីស្រឡាញ់ ព្រះ​ជា​ម្ចាស់គង់ជាមួយយើង! ឥឡូវស្ថានភាពនៃសង្រ្គាមធ្វើឲ្យបាក់បែក ធ្វើឲ្យមានទុក្ខវេទនាទាំងអស់នេះ យើង​សូមទូលអង្វរព្រះជាម្ចាស់ សូមឲ្យរាជរដ្ឋាភិបាលទាំង២ប្រទេសប្រទេសយើង និងប្រទេសថៃ ចេះរិះ​គិត​ជាមួយគ្នា រកដំណោះស្រាយដោយសន្តិវិធី ជាប្រយោជន៍រួមសម្រាប់ប្រទេសទាំងពីរ និងប្រជាជន។  

នៅថ្ងៃនេះ ព្រះយេស៊ូបានលើកឡើងអំពីប្រស្នាអំពីម្នាក់ៗដែលបានទទួល៥តម្លឹង ២តម្លឹង និងម្នាក់១ តម្លឹង។ បាទ! ប្រស្នានេះនាំឲ្យយើងបានទទួលការបង្កើតពីព្រះជាម្ចាស់ មានរូបសម្បត្តិ លក្ខណៈ​ផ្សេង​ៗ​ពី​គ្នា​។ នឹងទីពីរ៖ ព្រះជាម្ចាស់ផ្តល់សេរីភាពឲ្យយើង នៅក្នុងការរិះគិត ការសម្រេចចិត្ត នៅក្នុងអ្វីៗដែល​យើង​​ធ្វើ ព្រះជាម្ចាស់បានធ្វើឲ្យយើងជារូបតំណាងរបស់ព្រះអង្គ ត្បិតទ្រង់បង្កើតយើងម្នាក់ៗមានលក្ខ​ណៈ​សម្បត្តិផ្សេងៗគ្នា តែឲ្យយើងមានសេរីភាពក្នុងការរិះគិត នឹងការសម្រេចចិត្ត។ នេះជាព្រះអំណោយទាន មួយ​ដែលព្រះជាម្ចាស់ប្រទានឲ្យ។ ដូច្នេះនៅក្នុងព្រះអំណោយទានដែលយើងបានទទួលនៅថ្ងៃនេះ៥ តម្លឹង ២តម្លឹង និង១តម្លឹងតើអំណោយទានទាំងនេះ តើយើងយកព្រះអំណោយទានរបស់ព្រះជាម្ចាស់ មក​ប្រព្រឹត្តនិងធ្វើដូចម្តេច?

បងប្អូនជាទីស្រឡាញ់ នៅពេលដែលយើងដឹងថា ការបង្កើតរបស់ព្រះជាម្ចាស់ចំពោះយើង គឺផ្សេងៗពីគ្នា និង​មានសេរីភាព ទាំងអស់នេះ សេចក្តីទាំងនេះ គឺព្រះអង្គចង់ឲ្យយើង រស់នៅជាបងប្អូននឹងគ្នា ជា គ្រួ​សារ​តែ​មួយ ដោយដឹងថា ព្រះជាម្ចាស់បានបង្កើតយើង ហើយធ្វើឲ្យយើងចេះ ជួយគ្នា ចេះយល់គ្នា ដោយ​រស់​នៅ​ជាមួយគ្នា ដោយមិនគិតថាយើង ចេះជាងគេ ល្អជាងគេ ប្រសើរជាងគេ នោះទេ តែផ្ទុយទៅវិញ ធ្វើ​ឲ្យ​យើ​ងចេះមាន ចិត្តអាណិតអាសូរ និងចេះជួយគ្នា ដើម្បី បំពេញ គ្នានូវលក្ខណៈខ្វះខាតរបស់យើង។ នេះ​ជា​សេចក្តីមួយដើម្បីជួយឲ្យយើងដឹងថា អំណោយទានដែលយើងបានទទួល៥តម្លឹង ២តម្លឹង និង១តម្លឹង គឺព្រះជាម្ចាស់ចង់ធ្វើឲ្យយើង ចេះរស់នៅជាបងប្អូននឹងគ្នា។

សរុបសេចក្តីមកព្រះយេស៊ូចង់ឲ្យយើងដឹងថា មានតែព្រះជាម្ចាស់ជាបិតាដ៏វិសុទ្ធ ដែលជាព្រះអម្ចាស់ ១០០%ជាសិរីរុងរឿង ជាភាពដ៏វិសុទ្ធដ៏ខ្ពង់ខ្ពស់របស់ព្រះអង្គ មានសម្រាប់មនុស្សលោក ហើយ​ធ្វើ​ឲ្យ​មនុស្ស​លោកដឹងថាយើងជាអ្នកទន់ខ្សោយជាអ្នកបាបនោះ ដែលព្រះអង្គបានប្រទានឲ្យយើង ហើយ​ក៏​ឲ្យ​យើង​កើតជារូបតំណាងរបស់ព្រះអង្គ នេះជាការអស្ចារ្យ។ ទោះបីយើងមានជាតិសាសន៍ផ្សេងគ្នា ប៉ុន្តែព្រះ​ជា​ម្ចាស់បានបង្រួបប្រង្រួមធ្វើឲ្យយើង ទៅជាសាច់ឈាមតែមួយ ក្នុងព្រះជាម្ចាស់។

ថ្ងៃនេះសូមបងប្អូនអរព្រះគុណព្រះជាម្ចាស់នូវអំណោយទានដែលយើងបានទទួល ហើយចេះប្រើ​អំ​ណោ​យ​​​ទានដែលយើងមាននេះ សម្រាប់ស្រឡាញ់គ្នា ផ្តល់ក្តីស្រឡាញ់ធម៌មេត្តាករុណា​ប្រណីសណ្ដោស​ចំពោះ​គ្នា ជួយបំពេញគ្នា ដើម្បីយើងទៅជារូបតំណាង​របស់ព្រះជាម្ចាស់ដ៏ពេញលក្ខណៈ។

នៅពេលដែលមានបញ្ហាជម្លោះបាក់បែកគ្នា សង្រ្គាមតទល់គ្នា សូមឲ្យបងប្អូនមានការសោកស្តាយ ឲ្យបង​ប្អូន​ឃើញថា ទង្វើដែលយើងឈ្លោះគ្នា ឈ្នានីសគ្នា បំពានលើគ្នា គឺជាទង្វើមួយដែលយើងធ្វើ ប្រឆាំង​​នឹង​ព្រះ​ជាម្ចាស់។ សូមឲ្យយើងទាំងអស់គ្នា រួមគ្នាទូលអង្វរព្រះជាម្ចាស់ ដើម្បីឲ្យយើងចេះសូម​ព្រះជា​ម្ចាស់​លើក​លែងទោសនូវភាពទន់ខ្សោយទាំងប៉ុន្មានដែលយើងបានធ្វើ ហើយឲ្យយើងនឹកឃើញថា ទីណាមាន​មេត្តា​និ​ងសេចក្តីស្រឡាញ់ គឺព្រះជាម្ចាស់គង់ជាមួយយើង អាម៉ែន៕​