ថ្ងៃទី២៨ ខែសីហា ឆ្នាំ២០២៥ អត្ថបទគម្ពីរ (ម៉ាថាយ២៤,៤២-៥១)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

នៅថ្ងៃនេះបុណ្យសន្តីអូគូស្តាំង ឬសន្តអូគូស្ទីន គឺជាមនុស្សម្នាក់ដែលគេហៅថាបិតាព្រះសហគមន៍។ គាត់​គឺ​ជា​មនុស្សម្នាក់ដែលជួយបង្កើតគោលលទ្ធិតាមគ្រីស្តសាសនា តាមព្រះសហគមន៍កាតូលិកនៅ​សតវត្ស​ទី៤-៥។ គាត់ជាសន្តបុគ្គលដ៏អស្ចារ្យ គាត់បាននិពន្ធសៀវភៅជាច្រើន ជាពិសេសសៀវភៅមានឈ្មោះថា​ “ទីក្រុងរបស់ព្រះជាម្ចាស់ និងទីក្រុងរបស់មនុស្ស”។

នៅសម័យលោកអូគូស្ទីនប្រហែលបងប្អូនធ្លាប់ឮព្រះរាជណាចក្រទីក្រុងរ៉ូមនៃជនជាតិរ៉ូមុំាងដែលមានទឹកដីពីអឺរ៉ុបទាំងមូលជាទឹកដីមហាអំណាច។ ប៉ុន្តែនៅសម័យលោកអូគូស្ទីនជនជាតិរ៉ូមុំាង​កំពុងតែចាញ់​សង្គ្រាម​តែ​មនុស្សជាច្រើនស្មានថាជាពេលវេលាចុងក្រោយនៃពិភពលោក។ ដូចសន្តអូគូស្ទីនរំលឹកនៅក្នុងសៀវ​ភៅ​របស់គាត់ថា“នរគរបស់មនុស្សមិនស្ថិតស្ថេររហូតទេ” មានតែព្រះរាជ្យរបស់ព្រះជាម្ចាស់! ហើយគាត់លើក​ទឹក​ចិត្តឱ្យមនុស្សនៅសម័យរបស់គាត់ថា ទោះបីជាមានមហន្តរាយធំកំពុងតែកើតឡើងតែសូមឱ្យ​យើង​ជឿ​ទុកចិត្ត និងមានសេចក្តីសង្ឃឹមលើព្រះជាម្ចាស់! ជាជាងមានសង្ឃឹមលើរឿងលោកិយ៍។ យើង​ឃើញ​​ថា​ក្រោយ​ពីជនជាតិរ៉ូមុំាង អរិយធម៌ផ្សេងទៀតបានកើតឡើង។

នៅក្នុងជីវិតរបស់យើងប្រហែលមានមហន្តរាយ មានបញ្ហា មានគ្រោះថ្នាក់ផ្សេងៗដែល​ធ្វើឱ្យ​យើ​ង​ពិបាក​ចិត្ត​ អស់សង្ឃឹម។ ក្នុងអត្ថបទថ្ងៃនេះដែរព្រះយេស៊ូមានព្រះបន្ទូលថា ចូរប្រុងប្រៀបជានិច្ច កុំឱ្យយើងចាញ់ កុំ​ឱ្យយើងអស់សង្ឃឹម ប៉ុន្តែឱ្យយើងជឿទុកចិត្តលើព្រះជាម្ចាស់។ អាម៉ែន៕