ថ្ងៃទី២៧ ខែកញ្ញា ឆ្នាំ២០២៥ អត្ថបទគម្ពីរ (លូកា ៩,៤៣-៤៥)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន
ព្រះបន្ទូលដំណឹងល្អថ្ងៃនេះ យើងឃើញថាប្រជាជនបានស្ញើចសរសើរព្រះយេស៊ូនូវសេចក្តីដែលព្រះអង្គបានធ្វើការអស្ចារ្យ នឹងការបង្រៀន ទ្រង់បានឆ្លើយទៅគេថាបន្តិចទៀតនឹងមានគេមកចាប់ព្រះអង្គបញ្ជូនទៅកាត់ក្តី។
សេចក្តីនេះនាំឲ្យយើងស្វែងយល់នឹងទទួលព្រះបន្ទូលនេះ ដូចសាវ័កដែលបានឃើញសេចក្តីល្អដែលព្រះយេស៊ូធ្វើ តែហេតុដូចម្តេចនឹងមានរឿងមិនល្អនៅក្នុងជីវិតព្រះអង្គ? បងប្អូនជាទីស្រឡាញ់! យើងម្នាក់ៗតែងតែចង់បានអនាគតល្អ តែបែរជាមានមនុស្សជាច្រើនទៅរកគ្រូទាយព្រោះតែចង់ដឹងពីអនាគតរខ្លួន ឬដើម្បីការពារខ្លួនក៏ប្រើមន្តគមន៍ ខ្សែកថា និងវត្ថុជាច្រើនផ្សេងៗទៀតដើម្បីចាកពីអាវុធផ្សេងៗដែលនាំឲ្យអន្តរាយ នេះជាចំណុចមួយដែលមនុស្សពឹងពាក់។
ថ្ងៃនេះទោះបីព្រះយេស៊ូបង្ហាញសេចក្តីស្រឡាញ់ បង្ហាញធម្មមេត្តាករុណាដែលព្រះយេស៊ូយាងមកបម្រើមនុស្សលោកក៏ដោយក៏ព្រះអង្គត្រូវមនុស្សលោកចាប់យកទៅវិនិច្ឆ័យដាក់ទោស យើងមិនយល់ តែភ្នែកនៃយើងដែលមើលតែពីខាងក្រៅឃើញថាមិនត្រូវ ប៉ុន្តែភ្នែកនៃជំនឿរបស់យើង គឺយើងដឹងថា ព្រះជាម្ចាស់សុខចិត្តលះបង់ព្រះអង្គ បន្ទាបខ្លួនមករស់នៅជាមួយមនុស្សលោក មនុស្សដែលរស់នៅក្នុងអំពើបាប មនុស្សដែលរស់នៅក្នុងកាលៈទេសៈនៃការអស់សង្ឃឹមទាំងឡាយ តែព្រះជាម្ចាស់នាំក្តីសង្ឃឹម នាំអំណរសប្បាយ មិនត្រឹមតែជីវិតលោកនេះ ប៉ុន្តែជីវិតអស់កល្បជានិច្ច នេះហើយដែលនៅភ្នែកនៃជំនឿដែលធ្វើឲ្យយើងរកឃើញតម្លៃថ្លៃថ្នូរនៃជីវិតរបស់យើង។
យើងជឿថា ព្រះយេស៊ូបានបូជាព្រះជន្មសម្រាប់យើង ដូច្នេះជីវិតរបស់យើងមានតម្លៃនិងមានន័យ ទោះបីយើងជួបឧបសគ្គ ទុក្ខលំបាក មិនមែនមានន័យថា យើងជាគ្រីស្តបរិស័ទបានព្រះជាម្ចាស់ស្រឡាញ់បានព្រះជាម្ចាស់អាណិតមេត្តានឹងយើងចាកពីការអត់ឃ្លាន ចាកពីឧបសគ្គ គ្រោះថ្នាក់ អត់ទេ ដូច្នេះអ្វីៗដែលកើតឡើងក្នុងជីវិតរបស់យើង ទោះបីមានឧបសគ្គ គ្រោះថ្នាក់យ៉ាងណាក៏ដោយ តើជំនឿនៅកន្លែងណា? តើយើងមានជំនឿ? តើយើងនៅតែអធិដ្ឋាន? តើយើងនៅតែស្តាប់ព្រះបន្ទូល? ទុកឲ្យព្រះបន្ទូលណែនាំជីវិតយើង។
ប្រសិនបើយើង មិនបណ្តោយខ្លួនទៅតាមអប្រិយជំនឿ ឬក៏ទៅតាមសំណាងទេនោះ គឺយើងនឹងដឹងថាព្រះជាម្ចាស់ជាអ្នកផ្តល់ជីវិត ផ្តល់អំណរឲ្យយើង គឺព្រះអង្គ ទោះបីយើងជាអ្នកបាបក៏ព្រះអង្គនៅតែស្រឡាញ់យើង នៅតែមេត្តាករុណាយើង នៅតែតម្រង់ផ្លូវយើង គឺផ្លូវនៃជីវិតដើរទៅរកព្រះជាម្ចាស់ និងឋានបរមសុខ សូមជូនពរ នឹងសូមសេចក្តីសុខសាន្តរបស់ព្រះជាម្ចាស់គង់ជាមួយបងប្អូនជានិច្ច។ អាម៉ែន៕
Daily Program
