ថ្ងៃទី២២ ខែសីហា ឆ្នាំ២០២៥អត្ថបទគម្ពីរម៉ាថាយ ២២,៣៤-៤០ អត្ថាធិប្បាយគម្ពីរដោយ៖ លោកបូជាចារ្យ ផាន បូរី

អត្ថបទព្រះគម្ពីរដំណឹងល្អនៅក្នុងថ្ងៃនេះ យើងឃើញថាការសន្ទនារវាងទេវទូតកាព្រីអែល​ និងនាងម៉ារី ដែល​ពួកគាត់សន្ទនាជាមួយគ្នាអំពីបេសកកម្មដែលនាងម៉ារីត្រូវទទួល។ ខ្ញុំចង់ចែកជាមួយបង​ប្អូនបី​ចំណុច​ ទីមួយ៖ គឺអំពីអំណរសប្បាយដែលនាងម៉ារីនឹងទទួល!  ព្រះជាម្ចាស់​បានត្រាស់ហៅនាង​ម៉ារីឱ្យក្លាយ​ជា​មា​តា​របស់ព្រះយេស៊ូ។ ហើយព្រះជាម្ចាស់បានត្រាស់ហៅនាងម៉ារីឱ្យក្លាយជាបុគ្គលម្នាក់​ដែល​រស់​នៅ​ជា​គំ​រូ ដោយ​ស្តាប់ព្រះសូរសៀងរបស់ព្រះជាម្ចាស់ និងយល់ព្រមធ្វើតាមពាក្យរបស់ព្រះអង្គ។

ព្រះជាម្ចាស់បានត្រាស់ហៅយើងជាលក្ខណៈឯកត្តៈ ដែលយើងហៅថាឯកត្តជនដើម្បីឱ្យយើងអាច​ធ្វើដំ​ណើរ​រួ​មជាមួយព្រះអង្គបាន។ ព្រះជាម្ចាស់ក៏បានត្រាស់ហៅយើងម្នាក់ៗ ឱ្យយើងក្លាយទៅជា​បុគ្គល​ដ៏ឆ្នើម​នៅ​ក្នុងសង្គមរបស់យើង នៅក្នុងភូមិក៏ដូចជានៅក្នុងព្រះសហគមន៍របស់យើង​ឱ្យយើងឆ្លើយតប​ព្រះ​អង្គ​​ដូច​នាងម៉ារីឆ្លើយតបទៅនឹងទ្រង់ដែរ។ ទ្រង់បានត្រាស់ហៅយើងតាមរយៈកិច្ចការងារ​ប្រចាំ​ថ្ងៃ​របស់​យើង ទាំងការនិយាយស្តី ទាំងកាយវិការដែលយើងធ្វើ ទាំងកិច្ចការដែលយើងធ្វើនៅកន្លែងដែលយើងធ្វើការ គ្រប់​ពេលយើងធ្វើដំណើរទីនេះទីនោះ គ្រប់ដង្ហើមចេញ គ្រប់ដង្ហើមចូលរបស់យើង គឺ​ព្រះជាម្ចាស់​បាន​ត្រាស់​ហៅយើង។ ត្រង់នេះតោងឱ្យយើងដឹងថាយើងត្រូវតែឆ្លើយទៅព្រះជាម្ចាស់ ក្នុ​ងទម្រង់​ណា​ក៏​បាន​ឱ្យ​យើងចេះឆ្លើយទៅព្រះជាម្ចាស់ដូចនាងម៉ារីបានឆ្លើយទៅព្រះអង្គដូចគ្នាដែរ។

ចំណុចទីពីរ៖ នាងម៉ារីបានទទួលព្រះអំណោយទានរបស់ព្រះជាម្ចាស់!។ ព្រះអំណោយទានរបស់​ព្រះជា​ម្ចាស់​ដែលនាងម៉ារីបានទទួល គឺធ្វើជាមាតារបស់ព្រះគ្រីស្ត ជាមាតារបស់ព្រះសហគមន៍ និងជាគំរូរបស់​ព្រះសហគមន៍​ដែលជឿទុកចិត្តលើព្រះជាម្ចាស់។ ជំនឿ! ខ្ញុំចង់និយាយអំពីជំនឿ ជំនឿនាំឱ្យយើងទទួល​បាន​ការសង្គ្រោះ ជំនឿនាំឱ្យយើងខិតជិតព្រះជាម្ចាស់។ ជំនឿនាំឱ្យយើងប្រព្រឹត្តសេចក្តីល្អ ជំនឿនាំ​ឱ្យ​យើង​មានសុខសន្តិភាពចំពោះគ្នាទៅវិញទៅមក ជំនឿនាំឱ្យយើងមានសេចក្តីស្រឡាញ់។ ​ដោយសា​រជំ​នឿ​យើង​ចង់ធ្វើតាមព្រះបន្ទូលរបស់ព្រះជាម្ចាស់។ ជឿទុកចិត្តលើព្រះជាម្ចាស់ជាព្រះសង្គ្រោះ​ដែលនាំឱ្យជីវិ​ត​មនុស្សផ្លា​ស់ប្រែរបៀបមិនល្អទៅរកសេចក្តីល្អ ពិសេសផ្នែកសីលធម៌របស់យើង ឱ្យយើងរស់នៅ​មានគុណ​ធម៌មានសីលធម៌ល្អ មានសុជីវធម៌ល្អក្នុងការប្រតិបត្តិតាមជំនឿរបស់យើង ជាពិសេសបងប្អូន​ដែល​ជឿលើ​គ្រីស្ត​សាសនា ជឿលើព្រះយេស៊ូជាព្រះសង្គ្រោះរបស់បងប្អូន។

យើងម្នាក់ៗទទួលព្រះអំណោយទានដែលមកពីព្រះជាម្ចាស់ យើងជាគ្រីស្តបរិស័ទជាអ្នកជឿ យើងត្រូវប្រើ​ព្រះអំណោយ​ទាននេះឱ្យបានត្រឹមត្រូវ ប្រសិនបើ់យើងមានឯកទេសណាមួយ យើងប្រើឯកទេសរបស់​យើង​ឱ្យមានប្រយោជន៍នៅក្នុងសង្គមរបស់យើង ឱ្យមានប្រយោជន៍នៅក្នុងសង្គមរបស់យើង កុំឱ្យអ្នកដទៃ​ឈឺ​ចាប់ដោយសារតែចំណេះជំនាញដែលយើងបានទទួលហើយតែប្រើវាអត់មិនសមប្រកបឬប្រើមិនល្អ។

ចំណុចទីបី៖ ព្រះជាម្ចាស់គង់នៅជាមួយនាង ដូចទេវទូតបានជូនដំណឹងទៅនាងម៉ារី ហើយព្រះអង្គគង់​នៅ​ជា​មួយនាងចូលឱ្យនាងមានអំណរសប្បាយ។ អាហ្នឹងមានន័យថាព្រះអង្គគង់នៅជាមួយនាង។ នាងម៉ារីគឺ​ជា​​គំរូនៃអ្នកជឿ។ ប្រសិនបើព្រះជាម្ចាស់និយាយពីព្រះបន្ទូលទៅកាន់នាងម៉ារី ព្រះអង្គគង់នៅជាមួយនាង ព្រះជាម្ចាស់ក៏និយាយមកកាន់យើងម្នាក់ៗជាបុរស ជាស្ត្រី ជាក្មេង ជាចាស់ ជាយុវជន ជាយុវនារី ព្រះអង្គ​ក៏​គង់​នៅជាមួយយើងដូចគ្នាដែរ។ សូមឱ្យយើងម្នាក់ៗចេះបើកដួងចិត្តទទួលអំណរសប្បាយ ទទួល​ព្រះ​អំណោយ​ទាន ទទួលស្គាល់ថាព្រះជាម្ចាស់គង់នៅជាមួយយើង និងសូមឱ្យយើងចេះប្រកាសជំនឿ​ខ្លួន​ទៅ​ដល់​បងប្អូននៅទីនេះទីនោះ ដូចនាងម៉ារីចេះប្រកាសជំនឿ ហើយសូមឱ្យយើងចេះឆ្លើយបាទ ឬចាស់ទៅ​ព្រះជា​ម្ចាស់ផងដែរ។ អាម៉ែន៕