ថ្ងៃទី២១ ខែសីហា ឆ្នាំ២០២៥អត្ថបទគម្ពីរ (ម៉ាថាយ ២២,១-១៤)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល
បងប្អូនជាទីស្រឡាញ់! នៅថ្ងៃនេះយើងមានអត្ថបទដំណឹងល្អទាក់ទងនឹងពិធីមង្គលការរបស់ព្រះបុត្រារបស់ព្រះជាម្ចាស់គឺព្រះយេស៊ូ។ ព្រះយេស៊ូយាងមកនៅក្នុងលោកនេះ ហើយចូលរួមពិធីមង្គលការរបស់ព្រះអង្គ មង្គលការនោះរៀបចំឡើងយ៉ាងពិសេសព្រោះមានស្រាទំពាំងបាយជូរ គឺជាព្រះលោហិតរបស់ព្រះយេស៊ូជាព្រះបេះដូងរបស់ព្រះយេស៊ូដែលនៅលើឈើឆ្កាង។ ព្រះយេស៊ូត្រាស់ហៅយើងឱ្យចូលរួមនៅក្នុងពិធីមង្គលការ ប៉ុន្តែពេលខ្លះយើងបៀបដូចជាភ្ញៀវនៅក្នុងអត្ថបទដែលមិនព្រមចូលរួម។
តើយើងមានអាទិភាពអ្វីខ្លះក្នុងការឆ្លើយតបនឹងការត្រាស់ហៅរបស់ព្រះជាម្ចាស់ ឬធ្វើតាមចិត្តរបស់ខ្លួន? បងប្អូនត្រូវចាំថាបើគ្មានព្រះជាម្ចាស់! គ្មានសេចក្តីស្រឡាញ់! គ្មានអំណរសប្បាយ! ហេតុនេះយើងត្រូវតែមានពេលទំនេរដើម្បីព្រះជាម្ចាស់ ចូររូមអភិបូជា និងសកម្មភាពផ្សេងៗរបស់ព្រះសហគមន៍ ឆ្លើយតបនឹងអស់អ្នកដែលត្រូវការយើងជាពិសេសអស់អ្នកក្រីក្រ។ នៅក្នុងអត្ថបទដំណឹងល្អមានភ្ញៀវម្នាក់ចូលនៅក្នុងពិធីជប់លៀងទាំងគ្មានសម្លៀកបំពាក់មានន័យថាគាត់អត់បានប្រព្រឹត្តកិច្ចការនៃសេចក្តីស្រឡាញ់ អត់បានប្រព្រឹត្តកិច្ចការនៃធម៌មេត្តាករុណា។ យើងដឹងថាមានតែជំនឿដែលធ្វើឱ្យយើងទៅជាមនុស្សសុច្ចរិតត្រឹមត្រូវ។ យើងចូលក្នុងព្រះរាជព្រះជាម្ចាស់បានលុះត្រាតែយើងជឿ ប៉ុន្តែបើជឿហើយមិនប្រព្រឹត្តកិច្ចការធម៌មេត្តាករុណានោះជំនឿរបស់យើងនឹងងាប់គឺប្រៀបដូចជាមនុស្សស្លាប់។
ដូច្នេះព្រះជាម្ចាស់ត្រាស់ហៅយើងឱ្យប្រព្រឹត្តកិច្ចការមិនមែនដើម្បីទទួលការសង្គ្រោះ ប៉ុន្តែទទួលការសង្គ្រោះដោយសារយើងជឿ ប្រព្រឹត្តកិច្ចការគឺដើម្បីអរព្រះគុណព្រះអង្គវិញ តាមរយៈការស្រឡាញ់អ្នកដទៃ។ ដូច្នេះអត្ថបទដំណឹងល្អនៅថ្ងៃនេះដាស់តឿនយើងសុំឱ្យយើងចូលរួមនៅក្នុងសកម្មភាពរបស់ព្រះសហគមន៍ឱ្យយើងឆ្លើយតបនឹងអស់អ្នកដែលត្រូវការយើង ហើយនឹងប្រព្រឹត្តកិច្ចការនៃធម៌មេត្តាករុណា។ អាម៉ែន៕
Daily Program
