ថ្ងៃទី១១ ខែកញ្ញា ឆ្នាំ២០២៥អត្ថបទគម្ពីរ (លូកា ៦,២៧-៣៨)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល
អត្ថបទដំណឹងល្អ នៅក្នុងថ្ងៃនេះ បង្ហាញយើងពីលក្ខណៈពិសេសរបស់គ្រីស្តសាសនា គឺព្រះយេស៊ូសូមឲ្យសាវ័ករបស់ព្រះអង្គ ស្រឡាញ់មិនត្រឹមតែស្រឡាញ់អ្នកដទៃ ប៉ុន្តែស្រឡាញ់ទាំងខ្មាំងសត្រូវ ស្រឡាញ់អស់អ្នកដែលធ្វើបាបយើង។ ជារឿងដែលពិតជាពិបាកមែនទែន ការដែលឲ្យយើងទៅស្រឡាញ់អ្នកដែលធើ្វបាបយើង ផ្ទុយពីការសងសឹកនោះ ឬយ៉ាងតិចយើងមិននិយាយជាមួយ។
ព្រះយេស៊ូសូមឲ្យយើងខិតខំព្យាយាមស្រឡាញ់អ្នកដទៃ ដូចព្រះអង្គបានស្រឡាញ់យើងដែរ។ យើងជាខ្មាំងសត្រូវរបស់ព្រះយេស៊ូ នៅពេលដែលយើងធ្វើបាប ប៉ុន្តែព្រះយេស៊ូនៅតែស្រឡាញ់យើង នៅលើឈើឆ្កាងព្រះយេស៊ូស្រឡាញ់ខ្មាំងសត្រូវរបស់ព្រះអង្គ។ ធ្វើឲ្យគេកែប្រែប្រតិបត្តិគំនិត បើសិនជាយើងស្រឡាញ់ខ្មាំងសត្រូវ យើងនឹងព្យាយាមទ្រាំទុក្ខលំបាក ហើយនឹងព្យាយាមធ្វើអំពើល្អដល់គេ អធិដ្ឋាន សូមព្រះជាម្ចាស់ប្រោសប្រទានពរដល់ពួកគេ ប្រហែលជាគេអាចផ្លាស់ប្តូរចិត្តគំនិតខ្លះ។
បីគេមិនផ្លាស់ប្តូរចិត្តគំនិត ក៏យើងត្រូវតែធ្វើតាមព្រះហឫទ័យរបស់ព្រះជាម្ចាស់ ខិតខំស្រឡាញ់គេ ពីព្រោះពេលនោះ យើងមិនដូចអ្នកដែលធ្វើបាបយើង។ យើងមានចិត្តទូលាយ យើងមានចិត្តធម៌ យើងមានចិត្តដូចព្រះជាម្ចាស់។ ព្រះជាម្ចាស់មិនប្រកាន់នឹងនរណាម្នាក់ទេ ព្រះជាម្ចាស់ស្រឡាញ់មនុស្សលោកទាំងអស់ ទោះបីគេធ្វើបាបព្រះអង្គយ៉ាងណាក៏ដោយ។
ដូច្នេះពេលនោះយើងចូលនៅក្នុងពិភពថ្មី យើងជាបុត្រីបុត្រារបស់ព្រះជាម្ចាស់ យើងទៅជាសន្តបុគ្គល។ ជាបុត្រីបុត្រារបស់ព្រះជាម្ចាស់មានន័យថា ចិត្តយើងធំជាងការស្អប់ ធំជាងការប្រកាន់គេ ឬអាចនិយាយថាយើងមានភាពអត់ធ្មត់ខ្ពស់ និងការយល់ដឹងជ្រាលជ្រៅ ត្បិតយើងអាចគ្រប់គ្រងតណ្ហារបស់យើងដែលចង់សងសឹក។ អ្នកណាដែលនៅតែស្អប់ខ្មាំងសត្រូវ នៅតែខឹងគេ នៅតែចង់ធ្វើបាបគេ អ្នកនោះនៅតែជាប់ជំពាក់លោកិ៍យ ហើយនឹងក្លាយខ្លួនជាឈ្លើយនៃតណ្ហា ព្រះយេស៊ូត្រាស់ហៅយើងឲ្យមានសេរីភាពពិតប្រាកដ ឲ្យឈ្នះអំពើបាប ឈ្នះតណ្ហា ជាលក្ខណៈហួសពីធម្មជាតិ ឲ្យរស់នៅ ដូចជាមនុស្សដែលបានរស់ឡើងវិញបានឈ្នះសេចក្តីស្លាប់។
តាមពិតនេះជាព្រះអំណោយទានពិសេសរបស់ព្រះជាម្ចាស់ បើសិនជាយើងចង់ធ្វើតាមអត្ថបទដំណឹងល្អ នៅក្នុងថ្ងៃនេះ យើងត្រូវតែសូមឲ្យព្រះអង្គជួយ ចាក់ព្រះវិញ្ញាណដ៏វិសុទ្ធ ប្រទានកម្លាំងចិត្ត ឲ្យយើងចេះស្រឡាញ់ខ្មាំងសត្រូវ។ តាមបទពិសោធន៍ខ្ញុំ ខ្ញុំមិនមានខ្មាំងសត្រូវបែបស៊ីសាច់ហ៊ត់ឈាមអីទេ ប៉ុន្តែអ្នកដែលធ្វើបាបប្រចាំថ្ងៃគឺខ្លួនឯង ដែលបណ្តោយខ្លួនឲ្យធ្លាក់ក្នុងតណ្ហា ព្រោះតែការនិយាយអាក្រក់ពីអ្នកដទៃ ឬយកពាក្យអ្នកដទៃមានខ្លួន។
យ៉ាងណាមិញ បើសិនជាយើងខិតខំធ្វើតាមព្រះហឫទ័យរបស់ព្រះជាម្ចាស់យើងមានសេរីភាពពិតប្រាកដ យើងមានអំណរសប្បាយ។ ដូច្នេះនេះជាអត្ថបទពិសេសមែននៅក្នុងថ្ងៃនេះ ដែលត្រាស់ហៅយើងឱ្យពឹងផ្អែកលើព្រះជាម្ចាស់! បើសិនជាយើងយកព្រះអង្គធ្វើជាទីពឹង យើងធ្វើតាមព្រះហឫទ័យ ធ្វើតាមអត្ថបទដំណឹងល្អនៅក្នុងថ្ងៃនេះ។ សូមតាំងចិត្តក្លាហានស្រឡាញ់អ្នកដទៃ មានតែសេចក្តីស្រឡាញ់ទេ ដែលជាអ្នកសង្គ្រោះ ដែលជួយសង្គ្រោះយើង រួចពីអំពើអាក្រក់ទាំងអស់៕
Daily Program
