លោកវ៉ាស្កូ ដឺ ហ្គាម៉ា គឺជាអ្នកដើរនាវាចរណ៍ដ៏ល្បីជនជាតិព័រទុយហ្គាល់ ដែលត្រូវបានគេចាត់ទុកថា ជាជនជាតិអឺរ៉ុបទី១ ដែលបានទៅដល់ឥណ្ឌាបូព៌ា តាមរយៈផ្លូវឥណ្ឌាសមុទ្រឆ្ពោះទៅកាន់មហាសមុទ្រឥណ្ឌា ដោយឆ្លងកាត់តាមជ្រោយខាងត្បូងទ្វីបអាហ្វ្រ៊ិក ឬជ្រោយក្តីសង្ឃឹមល្អ ក្នុងអំឡុងសម័យកាលនៃរបកគំហើញធំៗ ខាងភូមិសាស្រ្តសមុទ្រ និងដីគោក។
លោកវ៉ាស្កូ ដឺ ហ្គាម៉ា កើតនៅប្រមាណឆ្នាំ១៩៦០ នៅទីក្រុងស៊ីន នៃតំបន់អាឡង់តឺហ្ស៉ូ នៅលើឆ្នេរភាគខាងនីរតីនៃប្រទេសព័រទុយហ្គាល់។
យោងតាមអ្នកប្រវត្តិសាស្រ្តព័រទុយហ្គាល់ បានបញ្ជាក់ថា លោកវ៉ាស្កូ ដឺ ហ្គាម៉ា កាលពីវ័យកុមារបានសិក្សាគណិតសាស្រ្ត និងការធ្វើនាវាចរណ៍នៅទីក្រុងអេវ៉ូរ៉ា ហើយក៏បានរៀនអំពីតារាសាស្រ្តផងដែរ។
នៅឆ្នាំ១៤៩២ ស្តេចព័រទុយហ្គាល់ ហ្ស៉ង់ ទី២ បានបញ្ជូនលោកវ៉ាស្កូ ដឺ ហ្គាម៉ា ក្នុងបេសកកម្មនៅកំពង់ផែ សេទុយបាល់ និងនៅតំបន់អាល់ហ្ស៉ាក ដើម្បីទៅរឹបអូសនាវាបារាំងជាការសងសឹកការខូចខាតដែលបង្កឡើងដោយបារាំងប្រឆាំងនឹងនាវាព័រទុយហ្គាល់។ នៅឆ្នាំ១៤៩៧ ស្តេចព័រទុយហ្គាល់ ម៉ានូអែល ទី១ បានហៅលោកវ៉ាស្កូ ដឺ ហ្គាម៉ា ដើម្បីទៅស្វែងរករាជាណាចក្រ បូជាចារ្យ ហ្ស៉ង់ ដែលជារាជាណាចក្រក្នុងព្រេងនិទានអឺរ៉ុប។ លោកវ៉ាស្កូ ដឺ ហ្គាម៉ា បានធ្វើដំណើរដំបូងចេញពីទីក្រុង លីស្បុន ដើម្បីស្វែងរកផ្លូវទៅឥណ្ឌា។ លោកបានឆ្លងកាត់ជ្រោយនៃក្តីសង្ឃឹមល្អ ហើយទៅដល់ទីក្រុងកាលីខាត់ នៃរដ្ឋខឺរ៉ាឡា ប្រទេសឥណ្ឌា នៅខែឧសភា ឆ្នាំ១៤៩៨។
បើយោងតាមអ្នកប្រវត្តិសាស្រ្តឥណ្ឌា លោកសានហ្ស៉ៃ ស៊ូប្រាម៉ាយាំ បានឲ្យដឹងថា លោកវ៉ាស្កូ ដឺ ហ្គាម៉ា បានរកឃើញផ្លូវសមុទ្រដែលអនុញ្ញាតឲ្យវាងផ្លូវដីនៃតំបន់មជ្ឈិមបូព៌ា។ នេះធ្វើឲ្យព័យទុយហ្គាល់អាចជៀសមិនបង់ពន្ធគយ និងពន្ធដារ ទៅឲ្យស្តេចស៊ុលតង់ អេហ្ស៊ីប។
នៅឆ្នាំ១៥០២ លោកវ៉ាស្កូ ដឺ ហ្គាម៉ា ធ្វើដំណើរលើកទីពីរទៅឥណ្ឌា។ គាត់បានប្រើកម្លាំងយោធាដើម្បីគ្រប់គ្រងពាណិជ្ជកម្ម និងបានប៉ះទង្គិចយ៉ាងហិង្សាជាមួយពាណិជ្ជករមូស្លីម។ ជាមួយនឹងកងនាវាប្រមាណ ២០គ្រឿង ការធ្វើដំណើរជាលើកទី២ នេះ ជួនកាលពោរពេញដោយហិង្សា និងមានការកត់សម្គាល់ដូចជា ការបាញ់ផ្លោងដាក់កំពង់ផែកាលីខាត់របស់ឥណ្ឌា ជាការសងសឹកនឹងការស្លាប់នាវិកនៃនាវាព័រទុយហ្គាល់ និងការផ្លោងដាក់នាវាទំនិញ មីរី ដែលដឹកជញ្ជូនអ្នកធ្វើបូជនីយកិច្ចមកពីទីក្រុងឡាម៉ិកជាដើម។
ការធ្វើដំណើរលើកទី២ របស់លោកវ៉ាស្កូ ដឺ ហ្គាម៉ា កត់សម្គាល់នូវការចាប់ផ្តើមនៃចក្រភពអាណានិគមព័រទុយហហ្គាល់។ នេះនាំមកឲ្យរាជវង្សព័រទុយហ្គាល់ ទទួលបានទ្រព្យសម្បត្តិដ៏ច្រើនជាមួយនឹងអត្ថប្រយោជន៍សំខាន់ៗ តាមរយៈការបង្កើតស្ថានីយ៍ពាណិជ្ជកម្មនៅតាមឆ្នេរសមុទ្រអាហ្វ្រិក។
ជាចុងក្រោយ ស្តេចព័រទុយហ្គាល់ ម៉ានូអែលទី១ បានប្រគល់ឋានៈជាកុងត៍ វីឌីហ្គៃរ៉ា ដល់លោកវ៉ាស្កូ ដឺ ហ្គាម៉ា នៅឆ្នាំ១៥១៩ ហើយស្តេចព័រទុយហ្គាល់ក្រោយ ហ្ស៉ង់ ទី៣ ដែលមានបំណងប្រយុទ្ធប្រឆាំងនឹងអំពើពុករលួយដែលកំពុងកើតឡើងនៅស្ថានីយ៍ពាណិជ្ជកម្ម បានតែងតាំងលោកវ៉ាស្កូ ដឺ ហ្គាម៉ា ជា វីសរ័រ (Vice-roi) អនុស្តេចនៃឥណ្ឌា នៅឆ្នាំ១៥២៤។
លោកវ៉ាស្កូ ដឺ ហ្គាម៉ា បានចាប់ផ្តើមការធ្វើដំណើរលើកទី៣ ប៉ុន្តែបានទទួលមរណភាពដោយជំងឺគ្រុនចាញ់ បន្ទាប់ពីមកដល់ទីក្រុងកូជីន រដ្ឋខឺរ៉ាឡា ប្រទេសឥណ្ឌា នៅថ្ងៃទី២៤ ខែធ្នូ ឆ្នាំ១៥២៤។
ការធ្វើដំណើររបស់លោកវ៉ាស្កូ ដឺ ហ្គាម៉ា បានបើកឲ្យមានផ្លូវពាណិជ្ជកម្មសមុទ្រដ៏សំខាន់រវាងអឺរ៉ុប និងអាស៊ី និងជួយឲ្យព័រទុយហ្គាល់ក្លាយជាមហាអំណាចសមុទ្រដ៏ធំក្នុងសតវត្សទី១៦។ លោកវ៉ាស្កូ ដឺ ហ្គាម៉ាត្រូវបានគេចងចាំថាជាអ្នកដឹកនាំដំបូងដែលបានភ្ជាប់អឺរ៉ុបទៅអាស៊ីតាមផ្លូវសមុទ្រ។
Daily Program
