ស្ថានភាពចែកចាយ និងវេចខ្ចប់ទឹកកកនៅកម្ពុជាគួរតែពង្រឹងស្តង់ដាបន្ថែមទៀត

ទឹកកកក៏អាចចាត់ទុកបានថាជាផលិតផលឧស្សាហកម្មអាហារមួយដ៏ចាំបាច់ផងដែរ ប៉ុន្តែទោះ​បីជាយ៉ាងណាក៏ដោយស្ថានភាពផលិតកម្ម និងចែកចាយនៅកម្ពុជាត្រូវបានគេជឿជាក់ថា នៅមានបញ្ហាប្រឈមដែលត្រូវការកែសម្រួលច្រើន​។​

នៅពេលនេះសម្រាប់ពលរដ្ឋកម្ពុជា គ្មាននរណាមិនប្រើប្រាស់ទឹកកកនោះទេ ទោះបីជាពួកគេមិនពិសារដោយផ្ទាល់ក៏ពូកគេចាំបាច់ប្រើប្រាស់វាដើម្បីហេតុផលនេះឫហេតុផលនោះ ពោលគឺសុទ្ធតែមានតម្រូវការ ដូច្នេះហើយដំណើរការផលិតនិងចែកចាយទឹកកកគួរតែមានស្តង់ដា​ឱ្យ​ប្រសើរជាងនៅពេលបច្ចុប្បន្ន។​

ដោយសារតែតម្រូវការទឹកកកនេះមានច្រើន​គឺមិនដឹងថា នៅទូទាំងប្រទេសមានកន្លែងផលិតទឹកកកប៉ុន្មានពិតប្រាកដនៅឡើយទេ ប៉ុន្តែសម្រាប់នៅរាជធានីភ្នំពេញគឺអាចមានប្រមាណជា​៦៦ កន្លែង ។

តួលេខនេះត្រូវបានយើងខ្ញុំដឹងគឺនៅពេលដែល​ លោក ហែម វណ្ណឌី រដ្ឋមន្រ្តីថ្មីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជើញសហគ្រាសផលិត​ទឹកកកទាំង៦៦កន្លែ​ងនៅ រាជធានីភ្នំពេញ ដើម្បីសំណេះសំណាល ស្វែងយល់ពីស្ថានភាពបច្ចុប្បន្ន និងស្វែងរក​វិធីកែលម្អគុណភាព ប្រសិទ្ធភាព និងភាពប្រកួតប្រជែងនៃផលិតកម្មទឹកកកកាលពីចុងឆ្នាំ២០២៣កន្លងទៅ។​

នៅក្នុងជំនួបនោះ​លោក រដ្ឋមន្រ្តីក៏បាន​សង្កត់​ធ្ងន់​លើសារសំខាន់នៃការកែលម្អ​ឧស្សាហកម្មផលិតទឹកកកនេះផងដែរ ដោយលោកបានលើកឡើងថា ទឹកកកដើរតួនាទីយ៉ាងសំខាន់ មិនត្រឹ​មតែសម្រាប់ការពិសា​ប៉ុណ្ណោះ​ទេ ប៉ុន្តែជាធាតុចូលសេដ្ឋកិច្ចគន្លឹះមួយ ដែលត្រូវបានប្រើដូចជាសម្រាប់ក្លាសេសាច់ បន្លែ និងផ្លែឈើជាដើម។

នៅពេលនោះ លោកបានជំរុញឲ្យរោងចក្រផលិតទឹកកក កែលម្អស្តង់ដាផលិតកម្មមួយចំនួន ដើ​ម្បីធានាថា​ទឹកកក​ដែលផលិត​បានត្រូវ​តាមស្តង់​ដារ​គុណភាព និងអាចទទួលបានទំនុកចិត្តពីអ្នកប្រើប្រាស់។ ការងារនេះ​រួមបញ្ចូលទាំងការគិតគូរ​លើទិដ្ឋ​ភាព​ជាច្រើន រួមទាំងការផលិត ការវេចខ្ចប់ និងការដឹក​ជញ្ជូន​ទឹកកកជាដើម។

នេះគឺជាការជំរុញរបស់លោករដ្ឋមន្រ្តី ប៉ុន្តែមកដល់ពេលបច្ចុប្បន្ននេះ ឃើញថា ស្ថានភាព​នៃការប្រែប្រួល គឺហាក់មិនទាន់ឃើញមានអ្វីដែលប្លែកនៅឡើយ ជាពិសេសគឺការចែកចាយទឹកកកតែម្តង ។

កន្លែងផលិតកម្មដែលមជ្ឈដ្ឋានទូទៅគេបារម្ភអំពីការលួចប្រើប្រាស់ជីអ៊ីរ៉េ និងដាក់សារធាតុ ផ្សេ​ងៗដើម្បីកាត់បន្ថយពេលបង្កក និងថែរក្សាការបង្កកនេះបានយូរ អនាម័យនៃប្រភទទឹក អនា​ម័យនៃកន្លែងផលិតកម្មជាដើម  ខណៈដែលការចែកចាយវិញចំណុចអសកម្មគឺមើលឃើ​ញត្រង់ៗច្បាស់ៗតែម្តង​នៅពេលនេះ ដែលគប្បីគួរតែមានការកែលំអរនិងពង្រឹងស្តង់ដាបន្ថែម ជាពិសេសគឺអនាម័យ៕