ក្រុមហ៊ុនភេសជ្ជៈ និង​អ្នក​លក់​ គួរពិចារណា​អំពី​អនាគត​កុមារ!

ក្រុមហ៊ុនដែលផលិតនិងចែកចាយភេសជ្ជៈប៉ូវកម្លាំងនិងទឹកផ្អែមៗ ក៏ដូចជា​អាជីវករគួរតែអាណិត កុមារាកុមារីផង ពីព្រោះអត្រាកុមារានិងកុមារីដែលកំពុងតែរស់នៅដោយសារជំងឺទឹកនោមផ្អែម គឺកំពុងតែមានកំណើនកើនឡើង។

ជាទូទៅជំងឺទឹកនោមផ្អែមច្រើនកើតចំពោះមនុស្សពេញវ័យ​ចាប់ពី៣៥​ឆ្នាំឡើង ប៉ុន្តែនៅកម្ពុជានាពេលបច្ចុប្បន្ននេះ ក៏មាន​កុមារានិងកុមារីកើតជំងឺនេះជាច្រើននាក់ផងដែរ រហូតដល់អ្នកខ្លះត្រូវខូចតម្រង់នោម ដែលភាសាសាមញ្ញហៅថា ក្រលៀន ហើយតម្រូវឲ្យលាងឈាមជាប្រចាំផងដែរ រង់ចាំតែសេចក្តីស្លាប់ក៏មាន​។​

កុមារ​តូចៗទាំងនោះ ប្រសិនបើពួកគេកើតជំងឺនេះ ត្រូវវេចសំពាយថ្នាំតាមខ្លួនមួយជីវិត។ ជីវិតពួកគេនឹងលែងមានសេចក្តីសុខ គឺរស់នៅតែជាមួយនឹងថ្នាំមួយជីវិត រីឯកម្លាំងកំហែងនិងសុខភាពគឺទ្រុឌទ្រោម បណ្ដាលឲ្យ​បាត់បង់សក្តានុពលការងារនៅពេលដែលពួកគេពេញវ័យ  ហើយមានខ្លះអាចនឹងស្លាប់តាំងពីមិនទាន់ចម្រើនវ័យក៏អាចមាន។​

ដើម្បីកាត់បន្ថយផលប៉ះពាល់ ប្រសិនបើអាចក្រុមហ៊ុននានាគួរបញ្ឈប់ការឃោសនាផ្សព្វផ្សាយពីគ្រឿងកំប៉ុងនិងភេសជ្ជៈ ជា​ពិសេស​ការ​ផ្តល់​រង្វាន់។​ ការផ្សព្វផ្សាយរបស់ក្រុមហ៊ុននានាបានកំពុងតែផ្តល់រូបភាពនិងព័ត៌មានបំភាន់សេចក្តីពិតអំពីផលិតផលភេសជ្ជៈរបស់​ខ្លួន​ទៅ​ដល់​កុមារ​ ដែលគ្នាមិនបានដឹងអី គឺដឹងតែឃ្លានទារទទួលទានប៉ុណ្ណោះ។​

ចំពោះអ្នកលក់វិញនៅក្នុងករណីឃើញ​ កុមារចូល​ទិញភេសជ្ជៈ​ គួរណែនាំជម្រើសភេសជ្ជៈជា​ទឹក​ផ្លែឈើស្រស់ជំនួសវិញ។​  សម្រាប់អ្នកលក់ភេសជ្ជៈតាមផ្លូវ ដូចជាពពួកតែជ្រក់ ផាសិនក្រឡុក​គួរ ណែនាំពួកគេឲ្យ​បន្ថយ​ជាតិស្ករ ឬអ្នកលក់​គួរ​បន្ថយស្ករនៅក្នុងភេសជ្ជៈទាំងនេះ​ ដោយពន្យល់​ឲ្យ​ពួកគេ​យល់ដឹងអំពីគ្រោះថ្នាក់នៃពពួកជំងឺទឹកនោមផ្អែម។​

តាមស្ថិតិដែលសារព័ត៌មាននានាបានផ្សព្វផ្សាយមកដល់ត្រឹមខែកក្កដាឆ្នាំ២០២៤ នៅកម្ពុជាបានរកឃើញកុមារកើតជំងឺទឹកនោមផ្អែមប្រភេទ១ប្រមាណជា ៧០០ នាក់ឯណោះ។ ​ពួកគេទាំងនោះភាគច្រើនមានអាយុ ពី ៤ទៅ​១៤ ឆ្នាំ ដែលជាវ័យហូប​ ដូច្នេះ​ឪពុកម្តាយ​គប្បីយកចិត្តទុកដាក់និងអប់រំពួកគេឲ្យល្អ អំពីព័ត៌មានដែល​ប៉ះពាល់ដល់សុខភាព​។​

សរុបទៅដើម្បីឲ្យកុមាររបស់​យើងមានសុខភាពល្អ យើងទាំងអស់គ្នាមានតួនាទីជួយគ្នា ដើម្បីកាត់បន្ថយការប្រើប្រាស់ពពួកភេសជ្ជៈផ្អែមនិង​ភេសជ្ជៈប៉ូវកម្លាំងនេះ​៕