កុំទុទិដ្ឋិនិយមពេកអំពីកម្ពុជា!

សង្គមមួយគ្មានអ្វីដែលវាត្រឹមត្រូវ១០០ភាគរយបានទេ ប៉ុន្តែនៅក្នុងករណីដែលសង្គមមួយមានស្ថា​នភាពវិជ្ជមានចាប់ពី៦០ ភាគរយឡើងទៅចាត់ទុកថា សង្គមយើងនោះវាមានស្ថានភាពប្រ​សើរ និងគួរជាទីរីករាយទៅហើយ ។

មកដល់ពេលនេះបើនិយាយអំពីស្ថានភាពនៃការអភិវឌ្ឍន៍ជារួម ជាពិសេសគឺហេដ្ឋារចនាសម្ព័​ន្ធជារូបវ័ន្តដូចជាផ្លូវថ្នល់និងស្ពាន សំណង់នៅក្នុងរាជធានីនិងទីប្រជុំជននានា គឺបានរីកដុះ​ដា​ល​ព្រោងព្រាត​។

ក្រៅពីចំណុចវិជ្ជមានទាំងនេះ កម្ពុជាក៏នៅមានសមិទ្ធផលជាច្រើនទៀត ដូចជាវិស័យអប់រំ  ដែ​លមកដល់ពេលនេះកម្ពុជាមិនត្រឹមតែមានសមត្ថភាពបណ្តុះបណ្តាលពលរដ្ឋនៅក្នុងស្រុក ប៉ុណ្ណោះទេ ពលរដ្ឋក៏មានសមត្ថភាពទទួលការបណ្តុះបណ្តាលនៅក្រៅប្រទេសតាមរយៈកម្មវិធី​អាហារូបករណ៍ពីប្រទេសជាមិត្ត ជាច្រើនរាប់តាំងពីអាមេរិក ជប៉ុន អូស្រ្តាលី អង់គ្លេស បារាំង រុស្ស៊ី វៀតណាម ឡាវ ថៃ ឥណ្ឌូនេស៊ី ជាដើម ហើយក៏មានអ្នកដែលមានជីវភាពធូរធារខ្លះ ដែលទទួលបានផ្លែផ្កាពីការរីកចម្រើនៃសង្គមសេដ្ឋកិច្ច អាចមានលទ្ធភាពបណ្តាក់ទុននៅលើ ការការកសាងមូលធនធនធានមនុស្សនេះទៅប្រទេស ទាំងនោះដោយថវិកាផ្ទាល់ខ្លួនជាច្រើនរយនាក់ផងដែរ ។

ផ្អែកតាមគោលនយោបាយនេះ កម្ពុជានៅតែអាចរក្សាបាននូវចលករនៃសង្គម និងដំណើរប្រពឹត្តិ​ទៅជាប្រក្រតីនៃសកម្មភាពសង្គមនានា សូម្បីតែនៅក្នុងអំឡុងពេលនៃការរីករាលដាលនៃមេរោ​គកូវីដ ១៩ ក៏កម្ពុជានៅតែអាចមានជំហរមួយរឹងប៉ឹង ហើយបានធានាការចាក់វ៉ាក់សាំង និង ប​ញ្ហាសុខមាលភាពសង្គមបានយ៉ាងសមរម្យ ។​

ក្រៅពីនោះបើនិយាយអំពីបញ្ហាកំណើនសេដ្ឋកិច្ចវិញ ថ្វីត្បិតតែមិនខ្លាំងក្លា​ដល់កម្រិត ៧ ភាគរយ ដូចកាលពីមុនវិបត្តិកូវីដ ១៩ រីករាលដាលក៏ពិតមែន ប៉ុន្តែនៅក្នុងឆ្នាំ​២០២៣ នេះ កំណើនសេដ្ឋកិច្ចកម្ពុជាគឺនៅតែប្រសើរនៅក្នុងកំណើន ដែលស្ថាប័ននានាបានព្យាករណ៍ពី ៥ ទៅ៦ ភាគរយ។

មកដល់ពេលនេះកម្ពុជានៅតែបន្តរីកចម្រើនគ្រប់វិស័យ ដូច្នេះហើយ ទស្សនៈទុទិដ្ឋិនិយមជ្រុលដែលបានលើកឡើងនៅលើបណ្តាញសង្គមដោយជនអគតិខ្លះ​ក៏មិនត្រឹមត្រូវទាំងស្រុងដែរ។ សង្គមកម្ពុជាថ្វីត្បិតតែមិនល្អឥតខ្ចោះ ប៉ុន្តែយ៉ាងហោចណាស់ក៏ ម្នាក់ៗនៅតែបន្តរស់​នៅក្នុងស្ថានភាពមួយប្រសើរនៅក្នុងជំហរនិងលក្ខខណ្ឌដែលអាចប្រសើរជាប្រទេសជាច្រើននៅលើពិភពលោក៕