អ្នកជំនាញស្នើឱ្យអ្នកផ្សព្វផ្សាយកាតូលិកប្រើចិត្តជាត្រីវិស័យនៅក្នុងការប្រកាសដំណឹងល្អ

អ្នកជំនាញផ្នែកបច្ចេកវិទ្យាព័ត៌មានម្នាក់បានថ្លែងនៅក្នុងកិច្ចប្រជុំមួយនៅទីក្រុងម៉ាកាវថា «ចិត្ត» ត្រូវតែដើរតួនាទីជាត្រីវិស័យសម្រាប់ការប្រកាសដំណឹងល្អរបស់ព្រះសហគមន៍ ក្នុងបរិបទដែលមានវត្តមាននៃបញ្ញាសិប្បនិម្មិត (AI)។

នៅក្នុងពិធីបើកកិច្ចប្រជុំនៃការិយាល័យទំនាក់ទំនងសង្គមនៃសហព័ន្ធក្រុមប្រឹក្សាអភិបាលព្រះសហគមន៍កាតូលិកអាស៊ី នៅទីក្រុងម៉ាកាវ កាលពីថ្ងៃទី២៨ ខែតុលា លោកបណ្ឌិត វិចទ័រ ឡាម (Victor Lam) បានលើកឡើងថា ព្រះសហគមន៍ត្រូវនាំយក«ចិត្ត»ចូលទៅក្នុងពិភពឌីជីថលដោយ AI ដើម្បីផ្សារភ្ជាប់ទំនាក់ទំនងជាមួយមនុស្ស ហើយក្នុងពេលជាមួយគ្នានោះ ត្រូវដឹកនាំចិត្តឆ្ពោះទៅរកទំនាក់ទំនងមនុស្សដ៏ពិតប្រាកដ និងជីវិតនៅក្នុងព្រះសហគមន៍។

នៅក្នុងបទបង្ហាញរបស់លោកដែលមានចំណងជើងថា «ពីការងារគិលានុបដ្ឋាកទៅកាន់ការប្រកាសដំណឹងល្អ៖ ពីហុងកុងដល់ម៉ាកាវ» លោកបណ្ឌិតបានតភ្ជាប់ការពិភាក្សាកាលពីឆ្នាំមុននៅទីក្រុងហុងកុង អំពីបញ្ញាសិប្បនិម្មិត និងផលប៉ះពាល់របស់វាទៅលើមនុស្សជាតិ ជាមួយនឹងប្រធានបទសំខាន់នៅឆ្នាំនេះ គឺការប្រកាសដំណឹងល្អ។

លោកបានជំរុញឱ្យមានការផ្លាស់ប្តូរទស្សនៈ ដោយឈប់មើលឃើញបច្ចេកវិទ្យាឌីជីថលគ្រាន់តែជាឧបករណ៍សម្រាប់កិច្ចការបន្ទាប់បន្សំប៉ុណ្ណោះ ប៉ុន្តែត្រូវទទួលស្គាល់ថាពិភពឌីជីថលគឺជា «ដែនដីនៃបេសកកម្ម» ថ្មីមួយរបស់ព្រះសហគមន៍។

លោកបានបញ្ជាក់ថា ទោះបីជាបញ្ញាសិប្បនិម្មិតអាចផ្តល់ឱកាសសំខាន់ៗជាច្រើនក៏ដោយ ក៏វាមិនមែនជារឿងអព្យាក្រឹតក្នុងន័យសីលធម៌នោះដែរ។ ការរចនា និងការប្រើប្រាស់វាអាចបង្កប់នូវភាពលម្អៀង និងជះឥទ្ធិពលដល់ឥរិយាបថរបស់មនុស្ស ដែលតម្រូវឱ្យមានការប្រុងប្រយ័ត្នផ្នែកសីលធម៌ និងការអនុវត្តសកម្មភាពសង្គមជាក់ស្តែងក្រោមការគ្រប់គ្រងដោយចិត្ត។