កាលពីថ្ងៃទី២៨ ខែតុលា ឆ្នាំ២០២៦ លោក ស្តេហ្វេន លី ប៊ុនសាង (Stephen Lee Bun-sang) អភិបាលនៃព្រះសហគមន៍កាតូលិកទីក្រុងម៉ាកាវ បានជំរុញឱ្យបណ្តាអភិបាលអាស៊ី និងអ្នកធ្វើការផ្នែកទំនាក់ទំនងរបស់ព្រះសហគមន៍ ទទួលយកគំរូនៃការប្រកាសដំណឹងល្អនេះ ដើម្បីដោះស្រាយបញ្ហាប្រឈមនានាក្នុងសម័យកាលដែលត្រូវបានជះឥទ្ធិពលដោយបញ្ញាសិប្បនិម្មិត (AI)។
លោកអភិបាលបានមានប្រសាសន៍ថា សម្រាប់ព្រះជាម្ចាស់ ព្រះអង្គត្រាស់ហៅតែមនុស្សពិតដែលស្ម័គ្រចិត្តចង់ជួយ និងបម្រើអ្នកដទៃ ហើយបានរំលឹកដល់អ្នកធ្វើការផ្នែកទំនាក់ទំនងរបស់ព្រះសហគមន៍ថា ការប្រកាសដំណឹងល្អទាមទារឱ្យចេះដាក់ខ្លួន មានភាពស្និទ្ធស្នាល និងមានឆន្ទៈក្នុងការដើរទៅជាមួយមនុស្សក្នុងអំឡុងពេលដែលពួកគេជួបការលំបាក។
នៅក្នុងពិធីថ្វាយអភិបូជាបើកកិច្ចប្រជុំនៃការិយាល័យទំនាក់ទំនងសង្គមនៃសហព័ន្ធក្រុមប្រឹក្សាអភិបាលព្រះសហគមន៍កាតូលិកអាស៊ី លោកអភិបាលបានគូសបញ្ជាក់ពីទំនាក់ទំនងរវាងការអធិស្ឋាន ការពិចារណាដោយឈ្លាសវៃ ការជួបជុំ និងការព្យាបាល។
លោកបានមានប្រសាសន៍ថា ព្រះយេស៊ូមិនបានចាត់មនុស្សដែលល្អឥតខ្ចោះ ឬមនុស្សអស្ចារ្យដែលដាច់ឆ្ងាយពីបទពិសោធន៍ជីវិតមនុស្សនោះទេ ប៉ុន្តែទ្រង់បានត្រាស់ហៅមនុស្សពិតៗ ដែលមានឈ្មោះ មានប្រវត្តិជីវិត និងមានចំណុចខ្វះខាត ដើម្បីឱ្យពួកគេបម្រើអ្នកដទៃ ជាជាងការត្រួតត្រាលើអ្នកដទៃ។
ដោយអនុវត្តសារនេះទៅលើការងារទំនាក់ទំនងរបស់ព្រះសហគមន៍ លោកអភិបាលបានសង្កត់ធ្ងន់ថា ការប្រកាសដំណឹងល្អអំពីព្រះគ្រីស្ទមិនមែនគ្រាន់តែជាការផ្សព្វផ្សាយព័ត៌មាន ឬការប្រើប្រាស់បច្ចេកវិទ្យាថ្មីៗនោះទេ។ វាទាមទារឱ្យមានវត្តមានផ្ទាល់ខ្លួន ការស្តាប់ដោយយកចិត្តទុកដាក់ស្មោះត្រង់ និងឆន្ទៈក្នុងការអនុញ្ញាតឱ្យទុក្ខលំបាករបស់អ្នកដទៃមកធ្វើឱ្យការងាររបស់យើងត្រូវផ្អាក ឬផ្លាស់ប្តូរទិសដៅ។
លោកបានជំរុញឱ្យអ្នកធ្វើការនៅក្នុងបណ្តាញផ្សព្វផ្សាយកាតូលិកត្រូវស្តាប់មុននឹងនិយាយ ហើយត្រូវដើរទៅជាមួយគេមុននឹងវិនិច្ឆ័យ។ នេះគឺជាវិធីសាស្ត្រទំនាក់ទំនងមួយដែលមានឫសគល់នៅក្នុងដំណើររួមគ្នារបស់ព្រះសហគមន៍។
Daily Program
