សម្តេចប៉ាបប្រកាសឆ្នាំនៃការអធិដ្ឋានដើម្បីអំណរសប្បាយ

នៅដើមសប្តាហ៍នេះ សម្តេចប៉ាបហ្រ្វង់ស៊ីស្កូបានប្រកាសជូនដំណឹងពីការប្រកាសបើកឆ្នាំនៃការអធិដ្ឋានដើម្បីឆ្ពោះទៅរកថ្នាំនៃអំណរសប្បាយដែលគ្រោងនឹងរៀបចំនាឆ្នាំ២០២៥ខាងមុខនេះ​។​

តាមរយៈការប្រកាសបើកឆ្នាំនៃអធិដ្ឋាននេះ សម្តេចប៉ាបបានអញ្ជើញអស់គ្រិស្តបរិស័ទអោយរួបរួមគ្នានិងយកចិត្តទុកដាក់លើការអធិដ្ឋានដើម្បីឯកភាពខាងជំនឿ និង សន្តិភាពនៅលើពិភពលោកទាំងមូល ។​

សម្តេចប៉ាបបានជំរុញឲ្យគ្រិស្តបរិស័ទពង្រឹងការអធិដ្ឋានអោយខ្លាំងក្លាដើម្បីរៀបចំនិងរិះគិតអំពីថ្នាលនៃជីវិតរបស់យើងតាមលំអាននិងបន្ទូលរបស់ព្រះជាម្ចាស់ ។

សម្តេចប៉ាបបានមានបន្ទូលថា ឆ្នាំនៃការអធិស្ឋានត្រូវបានឧទ្ទិសដើម្បីស្វែងរកឡើងវិញនូវតម្លៃដ៏អស្ចារ្យ និងតម្រូវការដាច់ខាតសម្រាប់ការអធិស្ឋាន ទាំងការអធិស្ឋានក្នុងជីវិតផ្ទាល់ខ្លួន ក្នុងក្នុងព្រះសហគមន៍ និង ការអធិស្ឋានដើម្បីបុព្វហេតុនៃបញ្ហានៅលើពិភពលោក។

សម្តេចប៉ាបបានមានបន្ទូលថា ក្រសួងប្រកាសដំណឹងល្អបាន នឹង​កំពុង​រៀបចំ​សម្ភារៈ​សម្រាប់​ជួយ​ក្នុង​ការ​ប្រារព្ធ​ពិធី​នៃការអធិដ្ឋានប្រចាំឆ្នាំនេះ ។