លោកស៊ី ជីងពីង និយាយការពារសម្រាប់សន្និសីទសន្តិភាពដ៏ទំលំទូលាយនៅ​ហ្គាហ្សា

ប្រធានាធិបតីចិន លោកស៊ី ជីងពីង កាលពីថ្ងៃព្រហស្បតិ៍ បានអំពាវនាវឲ្យមានសន្នីសីទដ៏ធំ​មួយ​​ស្តីអំពីសន្តិភាព​ដើម្បីដោះស្រាយជម្លោះនៅហ្គាហ្សា នៅអំឡុងពេលសន្និសីទនៃមេដឹកនាំ និង​អ្នក​ការទូតអារ៉ាបនៅទីក្រុងប៉េកាំង។

ទាក់ទិននឹងសង្រ្គាមតាំងពីខែតុលារវាងអ៊ីស្រាអែល និងហាម៉ាស លោកស៊ី បានថ្លែងថា ៖ “មជ្ឈិ​មបូព៌ាគឺជាដែនដី​ជាមួយនឹង​ទស្សនវិស័យដ៏ធំនៃការអភិវឌ្ឍ ប៉ុន្តែសង្រ្គាមបានបំផ្លិច បំផ្លាញនៅទីនោះ”។ ប្រធានាធិបតីចិនបានបន្ថែមថា ៖ “សង្រ្គាមមិនគួរ​ត្រូវបាន​បន្ត​ដោយ​គ្មាន​ទី​​បញ្ចប់ទេ។ យុត្តិធម៌មិនគួរណាមិនមានជានិច្ចកាលនោះទេ”។

ដោយរំឭកអំពីសារសំខាន់ បើតាមរូបលោក​ នៃដំណោះស្រាយរដ្ឋពីរ លោកស៊ី ជីងពីង បាន​គូស​បញ្ជាក់ថា ចិនគាំទ្រដោយម៉ឺងម៉ាត់អំពីការបង្កើតរដ្ឋប៉ាឡេស្ទីនឯករាជ្យ និង​ការចូល​របស់​ដោយ​ពេញលេញ និងទាំងស្រុងរបស់ប៉ាឡេស្ទីនទៅកាន់អង្គការសហប្រជាជាតិ។ ទីក្រុង​ប៉េកាំង​​ក៏បានអំពាវទៅកាន់អង្គការសហប្រជាជាតិឲ្យមានសន្និសីទ​សន្តិភាពជាអន្តរជាតិ​ទំលំ​ទូលាយ​​ជាមួយនឹងការចូលរួមពីភាគីជាច្រើន។

ប្រធានាធិបតីចិន លោកស៊ី ជីងពីង កាលពីថ្ងៃព្រហស្បតិ៍ដែរ បានទទួលមេដឹកនាំ និងអ្នក​ការ​ទូត​អារ៉ាបជាច្រើន​នៅសន្និសីទមួយនៅទីក្រុងប៉កាំង​ដើម្បីស្វែងរកសម្លេងរួម​ចិន និងអារ៉ាបអំពី​ជម្លោះ​​នៅហ្គាហ្សា។

នៅក្នុងសេចក្តីថ្លែងសន្ទរកថាមួយ លោកស៊ី ជីងពីង បានថ្លែងថា ជារៀងរាល់ពេល ដែល​លោក​បានជួប​មិត្តអារ៉ាប លោកមានអារម្មណ៍ជាសាច់ញាតិដ៏ជ្រាលជ្រៅ។ លោកបញ្ជាក់ថា មិត្តភាព​រវាង​ប្រទេសចិន ប្រជាជនចិន និងប្រទេសអារ៉ាប់កើនឡើងពីការផ្លាស់ប្តូរមិត្តភាព​ជា​យូរ​​មកហើយ តួយ៉ាង តាមបណ្តោយអតីតផ្លូវសូត្រ។

ប្រធានាធិបតីអេហ្ស៊ីប លោកអាប់ដេល ហ្វ៉ាតា អាល់ ស៊ីសស៊ី បានអំពាវនាវឲ្យ​សហគមន៍​អន្តរជាតិរារាំងរាល់ការជម្លៀសប្រជាជនហ្គាហ្សាដោយប្រើកម្លាំង​ នៅអំឡុងសន្និសីទ​ចិន​​អារ៉ាប​នៅទីក្រុងប៉េកាំង។ លោកបានថ្លែងថា ៖ “លោកអំពាវនាវឲ្យសហគមន៍អន្តរជាតិ ផ្តល់់​ជា​បន្ទាន់នូវជំនួយមនុស្សធម៌រយៈពេលវែងដល់តំបន់ហ្គាហ្សា បញ្ចប់ការតាំងទីរបស់​អ៊ីស្រាអែល និងបញ្ឈប់រាល់ការប៉ុងប៉ងបង្ខំ​ប្រជាជនប៉ាឡេស្ទីនចាកចេញ​ពីដីរបស់ពួកគេ​ដោយ​​ប្រើកម្លាំង។”

ទោះបីជាមានការរិះគន់កាលពីថ្ងៃព្រហស្បតិ៍ ទាហានអ៊ីស្រាអែល​បន្តការវាយប្រហារ​លើ​តំបន់​​ហ្គាហ្សាបន្ទាប់ពីបានអះអាង​កាលពីម្សិលថា បានដណ្តើមគ្រប់គ្រង​តំបន់ទ្រនាប់យុទ្ធ​សាស្រ្ត​រវាងតំបន់ហ្គាហ្សា និងអេហ្ស៊ីប ដែលស្ថិតនៅជិតទីក្រុងរ៉ាហ្វ៉ា ដែលជាចំណុចក្តៅថ្មី​នៃ​សង្រ្គាម​ប្រឆាំងក្រុមហាម៉ាស។

ទន្ទឹមពេលនេះដែរ កាលពីថ្ងៃព្រហស្បតិ៍ នៅតំបន់ហ្គាហ្សា យោធាអ៊ីស្រាអែល បានពង្រាយ​ទាហាន​នៅក្នុងទីក្រុងផ្សេងៗ នៅស៊ីហ្ស័កដានី ដែលត្រូវបានគ្រប់គ្រង​បន្ទាប់ពីមានការវាយ​ប្រហារ​លើរថយន្តមួយរបស់អ៊ីស្រាអែលកាលពីថ្ងៃពុធ​ ដែលបានសម្លាប់ជនជាតិអ៊ីស្រាអែល​ពីរនាក់នៅជិតណាប្ល៊ូ។

នៅហ្គាហ្សា ទាហានអ៊ីស្រាអែល បានអះអាងថា បានរកឃើញ​រូងក្រោមដីប្រមាណ ២០ នៅ​ក្នុង​ផ្នែកព្រំដែន ដែលគេសង្ស័យថា ប្រើប្រាស់សម្រាប់​ដឹកនាំទំនិញសម្ភារៈសម្រាប់ក្រុម​ប្រដាប់​អាវុធ​​នៅក្នុងទឹកដីប៉ាឡេស្ទីន។ អេហ្ស៊ីប បានបដិសេធថា មិនមានរូងក្រោមដី​តាម​ព្រំដែន និង​អះអាងថា អ៊ីស្រាអែលស្វែងរកអ្វីដើម្បីផ្តល់ភាពត្រឹមត្រូវដល់ការវាយប្រហារ​របស់​ខ្លួន​​នៅ​រ៉ាហ៉្វា​ប្រឆាំងនឹងចលនា​អ៊ីស្លាម​ប៉ាឡេស្ទីន។