ទីក្រុងមូស្គូ បានអះអាងកាលពីថ្ងៃទី១៧ ខែមករា អំពីការវាយប្រហារដែលធ្វើឡើងលើអគារមួយ ដែលជាជម្រករបស់ទាហានស៊ីឈ្នួលបារាំងនៅទីក្រុងខាឃីវ ទីក្រុងទី២ របស់អ៊ុយក្រែន ដែលអាជ្ញាធរតំបន់បានប្រាប់ឲ្យដឹងថា មាន ជនស៊ីវិល ១៧នាក់ រងរបួស។
ក្រសួងការពារជាតិរុស្ស៊ី បានអះអាងថា នៅល្ងាចថ្ងៃទី១៦ ខែមករា កងកម្លាំងយោធារុស្ស៊ី បានធ្វើការវាយប្រហារចំគោលដៅលើចំនុចនៃការដាក់ពង្រាយកម្លាំងបណ្តោះអាសន្ននៃអ្នកប្រយុទ្ធបរទេស នៅទីក្រុងខាឃីវ ដែលសំខាន់គឺមានទាហានស៊ីឈ្នួលបារាំង។
ក្រសួងការពារជាតិរុស្ស៊ីបានអះអាងថាមាន មនុស្សច្រើនជាង ៦០នាក់ស្លាប់ និង ២០នាក់ រងរបួសនៅក្នុងការវាយប្រហារនេះ ដែលបានបំផ្លាញអគារទាំងស្រុង ដែលជាទីតាំងរបស់ទាហានស៊ីឈ្នួល។ ការអះអាងដែលមិនអាចផ្ទៀងផ្ទាត់បានពីប្រភពឯករាជ្យមកដល់ពេលនេះ។ ការអះអាងអំពីការវាយប្រហារនេះដោយទីក្រុងមូស្គូ កើតឡើងបន្ទាប់ពីមានការប្រកាសរបស់ប្រធានាធិបតី បារាំង អេម៉ានូអែល ម៉ាក្រុង កាលពីថ្ងៃអង្គារថា ប្រទេសបារាំងនឹងផ្គត់ផ្គង់ដល់ទីក្រុងគៀវ នូវមីស៊ីល Scalp រយៈចម្ងាយឆ្ងាយ ៤០ដើមបន្ថែម និងចុះហត្ថលេខាលើសន្តិសុខជាមួយអ៊ុយក្រែន ដែលនឹងប្រកាសនៅអំឡុងទស្សនកិច្ចរបស់លោកនៅអ៊ុយក្រែនដែលត្រៀមធ្វើឡើងនៅខែកុម្ភៈខាងមុខ។
អាជ្ញាធរទីក្រុងខាឃីវ កាលពីថ្ងៃអង្គារ បានរាយការណ៍ថា មានការវាយប្រហាររបស់រុស្ស៊ីដោយប្រើប្រាស់មីស៊ីល ពីដីទៅអាកាស S-300 ទៅលើទីក្រុងនៅភាគខាងឥសាន ជិតព្រំដែនរុស្ស៊ី។ ការវាយប្រហារនេះ បានបំផ្លាញអគាររស់នៅជាច្រើន និងធ្វើឲ្យរងរបួសដល់ជនស៊ីវិលយ៉ាងហោចណាស់ ១៧នាក់ ដែលរួមមានស្ត្រី ២នាក់ ដែលស្ថិតនៅក្នុងការរងរបួសធ្ងន់ធ្ងរ។
តំបន់ខាឃីវ ដែលបានគ្រប់គ្រងមួយចំណែកដោយរុស្ស៊ីនៅឆ្នាំ២០២២ ជាញឹកញាប់ត្រូវរងការវាយប្រហារ ហើយអាជ្ញាធរភ័យខ្លាចថា នឹងមានការវាយប្រហារនៅពេលខាងមុខនៅក្នុងតំបន់នេះ ដែលអាជ្ញាធរបានបញ្ជាឲ្យមានការជម្លៀស ភូមិចំនួន ២៦។
ដោយមានវត្តមាននៅទីក្រុង ដាវ៉ូស នៅប្រទេសស្វីស សម្រាប់សន្និសីទសេដ្ឋកិច្ចពិភពលោក ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី និងរដ្ឋមន្រ្តីកិច្ចការបរទេសអ៊ុយក្រែន លោកឌីមីត្រូ គូឡឺបា បានដាក់គោលដៅសម្រាប់ឆ្នាំនេះ គឺការធ្វើជាម្ចាស់លើអាកាស ដើម្បីប្រឆាំងនឹងយន្តហោះ មីស៊ីល និងដ្រូនរបស់រុស្ស៊ីដែលមកបំផ្លិចបំផ្លាញ។
ការអំពាវនាវនេះកើតមានឡើងនៅខណៈដែលអាម៉េរិក និងអឺរ៉ុប ផ្លាស់ប្តូរជារឿយៗ នូវការគាំទ្រសម្រាប់ទីក្រុងគៀវ។ អ៊ុយក្រែនភ័យខ្លាចថា ការញញើតញញើមនេះអាចធ្វើឲ្យសង្រ្គាមនៅរ៉ាំរ៉ៃ ដែលជាការអនុគ្រោះដល់រុស្ស៊ី ដែលបានកំពុងគ្រប់គ្រងទឹកដីអ៊ុយក្រែនជិត ២០%។
កាលពីថ្ងៃពុធ លោកវ៉ូឡូឌីមៀ ហ្សេឡេនស្គី បានសង្កត់ធ្ងន់ ថា រាល់ការយឺតយ៉ាវនក្នុងការផ្តល់ជំនួយសម្រាប់អ៊ុយក្រែន នឹងធ្វើឲ្យមានគ្រោះថ្នាក់សម្រាប់សន្តិសុខនៃទ្វីបអឺរ៉ុប។ លោកបន្តថា ខ្វះខាតជំនួយ យើងនឹងខ្វះខាតកាំភ្លើងធំច្រើនបំផុត។ យើងក៏មានការថយចុះយ៉ាងឆាប់រហ័សនូវមីស៊ីលការពារអាកាស។ នេះមានន័យថា យើងមិនស្ថិតនៅក្នុងស្ថានភាពដែលអាចវាយរុញច្រានការវាយប្រហារនោះទេ។ ដូច្នេះ លោកហ្សេឡេនស្គី ប្រមើលមើលអំពីអនាគតនៃសង្រ្គាមដែលអាចកើតឡើងរវាងអង្គការណាតូ និងរុស្ស៊ី។
អ៊ុយក្រែនត្រូវបានវាយប្រហារស្ទើតែជារៀងរាល់យប់ដោយដ្រូនវាយប្រហារ និងមីស៊ីលរបស់រុស្ស៊ី ដែលបាញ់ចេញពីដី សមុទ្រ និងអាកាស។
កងទ័ពអាកាសអ៊ុយក្រែន បាននិយាយថា បានវាយប្រហារកាលពីល្ងាចថ្ងៃអង្គារ នូវដ្រូនចំនួន ១៩គ្រឿង ក្នុងចំណោម ដ្រូន ២០គ្រឿង ដែលរុស្ស៊ីវាយប្រហារ មានជាអាទិ៍ នៅតំបន់ដូដឺសា ដែលជាតំបន់កំពង់ផែដ៏ធំរបស់អ៊ុយក្រែននៅភាគខាងត្បូង ក៏ទទួលរងការវាយប្រហារពីមីស៊ីលរបស់រុស្ស៊ីផងដែរ ហើយមនុស្ស ៣នាក់ បានរងរបួស។
Daily Program
