ក្នុងដំណើរទស្សនកិច្ចនៅអឺរ៉ុប ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី កាលពីថ្ងៃទី២៨ ឧសភា នៅទីក្រុងប៊្រុចសែល ប្រទេសប៊ែលហ្ស៊ីក ក៏មានការចុះហត្ថលេខាលើកិច្ចព្រមព្រៀងទ្វេភាគីអំពីសន្តិសុខដើម្បីពង្រឹងមធ្យោបាយយោធារបស់ទីក្រុងគៀវ នៅក្នុងពេលលំបាកក្នុងការធ្វើសង្រ្គាមដើម្បីតទល់នឹងទីក្រុងមូស្គូ។
មេដឹកនាំអ៊ុយក្រែន សិ្ថតនៅប៉ុន្មានម៉ោងនៅប៊ែលហ្ស៊ីក ដើម្បីចុះហត្ថលេខាលើអត្ថបទច្បាប់ជាមួយនឹងនាយករដ្ឋមន្រ្តីប៊ែលហ្ស៊ីច លោក អាឡិចហ្សង់ឌើ ដឺ គ្រូ។ នៅពេលថ្ងៃ លោកវ៉ូឡូឌីមៀ ហ្សេឡេនស្គី ក៏ត្រូវទៅកាន់ព្រលានយន្តហោះយោធា មេលប្រូក នៅជិតទីក្រុងប៊្រុចស៊ែល នៅខណៈប្រទេសប៊ែលហ្ស៊ិកត្រូវរំឭកអំពីការសន្យារបស់ខ្លួនដើម្បីផ្គត់ផ្គងយន្តហោះប្រយុទ្ធ F-16 ដល់ទីក្រុងគៀវ។
យោងតាមរដ្ឋមន្រ្តីការពារជាតិប៊ែលហ្ស៊ីក លោកលូឌីវីន ដឺដុងឌើ បានឲ្យដឹងថា ចាប់តាំងពីខែកុម្ភៈ ឆ្នាំ២០២២ ប្រទេសប៊ែលហ្ស៊ីក បានសន្យាជួយអ៊ុយក្រែនឡើងដល់ ១,២ ពាន់លានអឺរ៉ូ ដែល ៩១៦ លានអឺរ៉ូ គឺត្រៀមសម្រាប់ឆ្នាំ២០២៤ តែមួយ។ ក្រសួងការពារជាតិ ប៊ែលហ្ស៊ិក ក៏បានបណ្តុះបណ្តាលទាហានអ៊ុយក្រែន ជិត ២៥០០ នាក់។
ចំណែកនៅអំឡុងទស្សនកិច្ចនៅទីក្រុងម៉ាឌ្រីដ ប្រទេសអេស្បាញ កាលពីថ្ងៃ២៧ ឧសភា លោកវ៉ូឡូឌីមៀ ហ្សេឡេនស្គី ក៏បានអំពាវនាវដល់លោកខាងលិច បង្ខំរុស្ស៊ីឲ្យស្វែងរកសន្តិភាពតាមគ្រប់មធ្យោបាយ នៅខណៈដែលទីក្រុងគៀវ ទាមទារលទ្ធភាពប្រើប្រាស់អាវុធលោកខាងលិចដើម្បីវាយប្រហារដែនដីរុស្ស៊ី។
រហូតមកដល់ពេលនេះ អាម៉េរិក និងអឺរ៉ុប បានបដិសេធមិនឲ្យអ៊ុយក្រែនវាយប្រហារទីតាំង និងមូលដ្ឋាននៅខាងក្រោយក្នុងដែនដីរុស្ស៊ីជាមួយនឹងអាវុធរបស់លោកខាងលិចដោយខ្លាចសង្រ្គាមកាន់តែរីកធំ ដែលផ្តល់ផលចំណេញដ៏ពិតប្រាកដដល់វិមានក្រឹមឡាំង។ ប៉ុន្តែបញ្ហានេះ ចាប់ផ្តើមមានការពិភាក្សាក្នុងចំណោមសម្ព័ន្ធមិត្តលោកខាងលិច។
នាយករដ្ឋមន្រ្តីអេស្បាញ លោកពេដ្រូ សង់ស្ហ៉េ បានប្រកាសអំពីជំនួយយោធាថ្មីដែលមានទឹកប្រាក់ ១ពាន់លានអឺរ៉ូសម្រាប់ឆ្នាំ២០២៤ នៅក្នុងក្របខណ្ឌនៃកិច្ចព្រមព្រៀងសន្តិសុខជាមួយទីក្រុងគៀវ។
អ៊ុយក្រែនទាមទារមានជាអាទិ៍ ប្រព័ន្ធប្រឆាំងមីស៊ីល និងការពារអាកាស Patriot របស់អាម៉េរិក ហើយអ៊ុយក្រែនជំរុញថា មិនមានពេលវេលាច្រើនទេដើម្បីទប់ទលជាមួយរុស្ស៊ី។
ពីទីក្រុងម៉ាឌ្រីដ លោកវ៉ូឡូឌីមៀ ហ្សេឡេនស្គី បានថ្លែងថា គេមិនគ្រាន់តែត្រូវដាក់សំពាធលើរុស្ស៊ីនោះទេ ប៉ុន្តែក៏ទៅលើដៃគូរបស់យើងដើម្បីពួកគេផ្តល់ឲ្យយើងនូវលទ្ធភាពការពារខ្លួន។
លោកវ៉ូឡូឌីមៀ ហ្សេឡេនស្គី ត្រូវទៅប្រទេសព័រទុយហ្គាល ដើម្បីសន្ទនាជាមួយនាយករដ្ឋមន្រ្តីល្វីស ម៉ុងតេណេហ្គ្រ៉ូ និងប្រធានាធិបតី ម៉ាកសឺឡូ រ៉ឺបឺឡូ ដឺ សូសា ក្នុងគោលបំណងពង្រឹងកិច្ចសហប្រតិបត្តិការនៅក្នុងវិស័យសន្តិសុខ និងការពារជាតិ ជាមួយអាជ្ញាធរព័រទុយហ្គាល់។
ប្រធានាធិបតីអ៊ុយក្រែនមិនដែលបានទៅទស្សនកិច្ចនៅព័រទុយហ្គាល់ទេ ដែលតាំងពីខែកុម្ភៈ ឆ្នាំ២០២៣។ ព័រទុយហ្គាល់បានសន្យាផ្គត់ផ្គង់ដល់អ៊ុយក្រែននូវរថក្រោះធន់ធ្ងន់ Leopard 2 ចំនួន ៣គ្រឿង។
មិនដល់ ៣សប្តាហ៍ផង មុនកិច្ចប្រជុំកំពូលសម្រាប់សន្តិភាពនៅអ៊ុយក្រែន ដែលត្រៀមធ្វើនៅប្រទេសស្វីស លោកវ៉ូឡូឌីមៀ ហ្សេឡេនស្គី បានទាត់ចោលសំណើររបស់ប្រទេសចិន និងប្រេស៊ីលឲ្យអញ្ជើញរុស្ស៊ីចូលរួមផង និងវាយតម្លៃថា រឿងនេះត្រូវហាមឃាត់ដាច់ខាត។
Daily Program
