ព្រះសហគមន៍កាតូលិកកម្ពុជា គាំទ្រលើ​ការអនុវត្តគម្រោង «ព្រែកជីកហ្វូណនតេជោ»

តាងនា​មលោកអភិបាលព្រះសហគមន៍កាតូលិកទាំងបីភូមិភាគ លោកបូជាចារ្យបព្វជិត បព្វជិតា អង្គការមនុស្ស ធម៌កាតូលិក និងគ្រីស្តបរិស័ទកាតូលិកទាំងអស់នៅព្រះរាជាណាចក្រកម្ពុជា លោ​កអូលីវីយ៉េ មីឆែលម៉ារី ជី្មតហស្ល អភិបាលព្រះសហគមន៍កាតូលិកភូមិភាគភ្នំពេញ បាន​ប្រ​កាសគាំទ្រ​​យ៉ាងពេញទំហឹង ចំពោះការអនុវត្តគ​ម្រោង «ព្រែកជីកហ្វូណនតេជោ» របស់រាជរដ្ឋាភិបាលកម្ពុជា​។

«​ព្រែកជីកហ្វូណនតេជោ» ជាព្រែកជីកប្រវត្តិសាស្ត្រលើកទី១នៅព្រះរាជាណាចក្រកម្ពុជា ដែលជា​គំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា។

បច្ចុប្បន្ននេះ​ មានសម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រីនៃព្រះរាជាណាចក្រកម្ពុជា បានបន្តស្នាដៃ និងជំរុញបន្ថែមក្នុងការអភិវឌ្ឍគម្រោង ព្រែកជីកហ្វូណនតេជោ ឲ្យបានសម្រេ​ចនាពេលអនាគត។

ព្រែកជីកហ្វូណនតេជោ ផ្តល់អត្ថប្រយោជន៍ដ៏មហាសាលដល់ព្រះរាជាណាចក្រកម្ពុជា លើវិស័យជាច្រើន ជាពិសេសលើវិស័យដឹកជញ្ជូនជើងទឹក រវាងទន្លេមេគង្គនិងសមុទ្រ បង្កើតតំបន់ពា​ណិ​​ជ្ជកម្ម តំបន់សេដ្ឋកិច្ចពិសេស ពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិ​ញ្ចឹម​សត្វ ជួយបង្កើនផលត្រីទឹកសាប ជំរុញការអភិវឌ្ឍទីក្រុង និងនគរូបនីយកម្ម ជំរុញការរីកចម្រើ​នអចនទ្រព្យ និងការវិនិយោគ និងបង្កើតឳកាសការងារផ្សេងៗជាច្រើនជូនប្រជាពលរដ្ឋ។ល។

លោកអូលីវីយ៉េ មីឆែលម៉ារី ជី្មតហស្ល បានមានប្រសាសន៍ថា ៖ «យើងខ្ញុំទាំងអស់គ្នា សូមគោរពកោ​តសរសើរដោយស្មោះ និងវាយតម្លៃខ្ពស់បំផុត ព្រមទាំងសូមប្រកាសគាំទ្រយ៉ាង ពេញទំហឹង ចំពោះគំនិតផ្តួចផ្តើមប្រកបដោយឧត្តមគតិជាតិខ្ពស់របស់សម្តេចអគ្គមហាសេនាបតីតេជោ ចំ​ពោះការជីកព្រែកហ្វូណនតេជោ របស់រាជរដ្ឋាភិបាលកម្ពុជា»។

«យើងខ្ញុំសូមអធិដ្ឋានដល់ព្រះអម្ចាស់យេស៊ូគ្រីស្ត សូមព្រះមេត្តាប្រទានពរជ័យគ្រប់ប្រការជូន ស​ម្តេចអគ្គ មហាសេនាបតីតេជោ ហ៊ុន សែន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេ​ចមហាបវរធិបតី ហ៊ុន ម៉ាណែត និងលោកជំទាវបណ្ឌិត ព្រមទាំងក្រុមគ្រួសារជាទីគោរពស្រឡា​ញ់ មានសុខភាពល្អ អាយុយឺនយូរ ដើម្បីឲ្យព្រះរាជាណាចក្រកម្ពុជាយើងមានសុខសន្តិភាព និង ការអភិវឌ្ឍលើគ្រប់វិស័យជានិរន្តរ៍តរៀងទៅ។ អាមែន»​។

សូមបញ្ជាក់​ថា «គម្រោងព្រែកជីកហ្វូណនតេជោ» ​មានប្រវែង១៨០គីឡូម៉ែត្រ ត្រូវបានសិក្សាយ៉ា​ងល្អិតល្អន់ពីក្រុមអ្នកជំនាញបច្ចេកទេសជាតិ និងអន្តរជាតិចំនួន៤២រូប ទាំងនៅលើដីផ្ទាល់ និងប្រើឧបករណ៍សិក្សាពីលើអាកាស។

ជាលទ្ធផលនៃការសិក្សាបង្ហាញថា គម្រោងដែលមានតម្លៃវិនិយោគប្រមាណ១ពាន់៧រយលានដុល្លារអាម៉េរិកនេះ អាចដំណើរការទៅបានដោយគ្មានបង្កជាផលប៉ះពាល់ដល់បរិស្ថាន ឬលំហូរទឹករវាងទន្លេមេគង្គ និងសមុទ្រនោះទេ។

ការអភិវឌ្ឍគម្រោងនេះ មិនមានបច្ច័យប៉ះពាល់ដល់បរិស្ថាននៅកម្ពុជា ឬបរិស្ថានឆ្លងកាត់ព្រំដែនវៀតណាម ហើយវាក៏មិនបានធ្វើឱ្យប៉ះពាល់ដល់លំហូរទឹករបស់ទន្លេមេគង្គនោះដែរ ដ្បិតថា ការសាងសង់ព្រែកជីកនេះ កម្ពុជា នឹងប្រើបច្ចេកទេស និងបច្ចេកវិទ្យាទំនើបមិនឱ្យទឹកសាបហូរចូលទឹកប្រៃ ឬទឹកប្រៃហូរចូលទឹកសាបនោះទេ៕