ប្រទះឃើញសាកសពផ្សោតសមុទ្រមួយក្បាលនៅសហគមន៍នេសាទព្រែកត្នោត

យោងតាមសហគមន៍នេសាទព្រែកត្នោត បានឱ្យដឹងនៅ​ថា ប្រជានេសាទបាន​​ប្រទះឃើញសាកសព​ផ្សោតសមុទ្រមួយក្បាលនៅសហគមន៍នេសាទព្រែកត្នោត នាថ្ងៃទី​៨ ខែឧសភា ដោយពុំដឹងពីមូលហេតុនៃការបាត់បង់ជីវិតនេះ។

យោងតាមសារព័ត៌មានថ្មីៗ បាន​ឱ្យដឹងតាមរយៈអ្នកស្រី យ៉ែម សុភា អនុប្រធានទី១ និងជាគណៈកម្មការសហគមន៍នេសាទព្រែក​ត្នោត​ ​ថា ផ្សោតឈ្មោល១ក្បាលនេះ មានប្រវែង២ម៉ែត្រ បានងាប់ប្រហែល៣សប្ដាហ៍មកហើយ តែទើបត្រូវបានគេប្រទះឃើញ នៅថ្ងៃទី៨ ឧសភា ដែល​ស្ថិតក្នុងរូបភាពស្អុយរលួយ គេមិនទាន់អាចសន្និដ្ឋានថា វាងាប់ដោយសារអ្វីនោះទេ។ ​

អ្នកស្រីប្រាប់ដូច្នេះថា៖ «ផ្សោតដែលងាប់នៅសហគមន៍ព្រែកត្នោត យើងអត់ដឹងថាមូលហេតុអ្វីបានវាងាប់នោះទេ ប៉ុន្តែនៅពេលពួកខ្ញុំចុះទៅមើល សង្កេតឃើញថា វាងាប់ប្រហែល ៣សប្ដាហ៍មកហើយ»។​​

ប្រភពដដែលថា តំបន់សមុទ្រក្នុងភូមិសាស្រ្តខេត្តកំពត មានផ្សោតឃ្លាចពណ៌ផ្កាឈូក ប្រមាណ៤០​ ទៅ៤៦ក្បាល។ ចំណែកប្រភេទផ្សោតក្បាលត្រឡោក មានប្រមាណ៣០ ទៅ៤០ក្បាល។ នេះបើតាមទិន្ន័យរបស់ មន្ទីរកសិកម្ម រុក្ខាប្រមាញ់ និងនេសាទខេត្តកំពត៕