ប៉ាពួញូហ្គីនី កំពុងរងគ្រោះរអិលបាក់ដីដ៏ធំ

មនុស្សជាង១០០ នាក់ត្រូវបានគេជឿថាត្រូវបានសម្លាប់នៅក្នុងគ្រោះនៃការរអិលបាក់ដីដែលបា​នកប់ភូមិដាច់ស្រយាលមួយក្នុងប្រទេស ប៉ាពួញូហ្គីនីដែលជាប្រជាជាតិមួយក្នុងចំណោមប្រជាជាតិដែលសម្តេចប៉ាប គ្រោងនឹងធ្វើទស្សនកិច្ចនៅខែកញ្ញា។

វ៉ាទីកង់ញូវបានរាយការណ៍ថា មកដល់ពេលនេះក្រុមស្វែងរកសង្គ្រោះបន្ទាន់ និងជួយសង្គ្រោះកំពុងនៅក្នុងតំបន់ដែលរងគ្រោះដែល ត្រូវបានកប់ដោយការរអិលបាក់ដីកាលពីព្រឹកថ្ងៃសុក្រ​។

អាជ្ញាធរបាននិយាយថា មានការភ័យខ្លាចថាមនុស្សជាង ១០០ នាក់បានស្លាប់ ប៉ុន្តែអ្នកភូមិបា​ននិយាយថា ចំនួនមនុស្សដែលត្រូវបានសម្លាប់ដោយគ្រោះធម្មជាតិនេះអាចមានច្រើនជាងនេះ​។

តាមសេចក្តីរាយការណ៍បានឲ្យដឹងថា ផ្ទះជាង ៥០ ខ្នង ដែលភាគច្រើនមានអ្នកដេកនៅខាងក្នុ​ង ត្រូវបានជន់លិចដោយភក់ និងថ្ម ហើយកប់នៅពេលដែលភ្នំមួយចំហៀងបានបាក់ចុះមក ប​ង្កឱ្យមានការបាក់ដីដ៏ធំនៅម៉ោងបីទៀបភ្លឺ។

គ្រោះធម្មជាតិនេះកើតនៅភូមិ កាវកាឡាម ( Kaokalam ) ក្នុងខេត្ត អេនហ្គា ( Enga )មានច​ម្ងា​យប្រហែល ៦០០ គីឡូម៉ែត្រភាគពាយព្យនៃរដ្ឋធានី ព័រ មូរ៉េសប៊ី (Port Moresby) នៃប្រទេសដែនកោះនៅប៉ាស៊ីហ្វិកខាងត្បូងនេះ។

លោក ជេម ម៉ារ៉ាប៉េ (James Marape ) នាយករដ្ឋមន្រ្តីនៃប្រទេសនេះបាននិយាយថា អាជ្ញាធរកំពុងឆ្លើយតប ហើយថាលោកនឹងបញ្ចេញព័ត៌មានអំពីការបំផ្លិចបំផ្លាញ និងការបាត់បង់អាយុជីវិត នៅពេលដែលមាន។ ក្នុង​សេចក្តី​ថ្លែងការណ៍​មួយ លោក​បាន​ចូលរួម​រំលែក​ទុក្ខ​ដល់​ក្រុម​គ្រួសារ​នៃ​អ្នក​ដែល​បាន​បាត់បង់​ជីវិត​ក្នុង​គ្រោះ​មហន្តរាយ​នេះ៕