ការស្ដារឡើងវិញនូវដី ការបញ្ឈប់ការរិចរិលដីទៅជាវាលខ្សាច់ និងការកសាងភាពធន់នឹងគ្រោះរាំងស្ងួត គឺជាប្រធានបទសំខាន់នៃទិវាបរិស្ថានពិភពលោកឆ្នាំ ២០២៤ ដែលត្រូវបានរៀបចំឡើងដោយប្រទេសអារ៉ាប៊ីសាអូឌីត។
ទិវាបរិស្ថានពិភពលោកដែលត្រូវបានបង្កើតឡើងក្នុង ឆ្នាំ១៩៧២ និងត្រូវបានគេប្រារព្ធជារៀងរាល់ឆ្នាំនៅថ្ងៃទី៥ ខែមិថុនាគឺជាគំនិតផ្តួចផ្តើមបរិស្ថានចម្បងរបស់អង្គការសហប្រជាជាតិពាក់ព័ន្ធនឹងគ្រោះធម្មជាតិ។
អង្គការសហប្រជាជាតិបានឲ្យដឹងថា រហូតដល់៤០ ភាគរយនៃផ្ទៃដីនៅលើភពផែនដីនេះត្រូវបានបំផ្លាញហើយនៅពេលនេះ រយៈពេលនៃភាពរាំងស្ងួតបានកើនឡើង។
ការសិក្សាមួយបានអះអាងថា ការសិករិចរិលនៃគុណភាពដី អាចជះផលប៉ះពាល់ដល់ប្រជាជនប្រមាណជា បីភាគបួននៃចំនួនប្រជាជនពិភពលោកនៅឆ្នាំ ២០៥០។
លោកបណ្ឌិត លីយ៉ាង អាប៊ូ មូលី (Iyad Abu Moghli) ស្ថាបនិក និងជានាយកកម្មវិធីបរិស្ថានរបស់អង្គការសហប្រជាជាតិបានឲ្យដឹងថា មូលហេតុចម្បងនៃការរិចរិលដីគឺ «សកម្មភាពរបស់មនុស្ស» ដែលរំខានដល់តុល្យភាពធម្មជាតិនៃប្រព័ន្ធអេកូឡូស៊ី។
លោកបានបន្តថា ៖ «វាលខ្សាច់ជាប់ពាក់ព័ន្ធនឹងការកាប់ឆ្ការព្រៃដើម្បីកសិកម្ម និងនគរូបនីយកម្ម។ ប្រការនេះនាំទៅដល់ការហូរច្រោះដី ការបាត់បង់ជីវចម្រុះ និងការរំខានដល់អាកាសធាតុក្នុងតំបន់។ ការស៊ីស្មៅលើសចំណុះជាឧទាហរណ៍មួយទៀត វាមិនត្រឹមតែបំផ្លាញរុក្ខជាតិប៉ុណ្ណោះទេ ប៉ុន្តែវាក៏ប៉ះពាល់ដល់ដី និងធ្វើឱ្យសំណឹកកាន់តែធ្ងន់ធ្ងរទៅទៀត»។
លោកបានបន្តទៀតថា ការអនុវត្តកសិកម្មមិនត្រឹមត្រូវ ដូចជាការធ្វើកសិកម្មតែមួយមុខ ដោយគ្មានវិធានការអភិរក្សដីត្រឹមត្រូវ នឹងធ្វើឱ្យដីបាត់បង់ និងបង្កើនភាពងាយរងគ្រោះដល់សំណឹក ហើយនគរូបនីយកម្ម និងការកសាងទីក្រុងថ្មី តំបន់ទីក្រុងថ្មី ក៏ដូចជាសកម្មភាពនៅតំបន់ឧស្សាហកម្មក៏តែងតែបណ្តាលឱ្យមានការបំពុលដី និងសម្លាប់ជីវិតនៅលើដីនិងក្នុងដីផងដែរ៕
Daily Program
