នៅពេលដែលអាកាសធាតុត្រជាក់គ្របដណ្តប់លើសមុទ្រមេឌីទែរ៉ាណេ អាជ្ញាធរសុខាភិបាលក្នុងតំបន់ហ្គាហ្សាបានរាយការណ៍ ពីការស្លាប់របស់ទារកទើបនឹងកើតយ៉ាងហោចណាស់ ៤នាក់ដោយសារតែពួកគេមិនអាចស៊ូទ្រាំនឹងអាកាសធាតុត្រជាក់បាន។
អង្គការយូនីសេហ្វបានអះអាងថា បន្ថែមពីលើការវាយប្រហាររបស់អ៊ីស្រាអែល ឥឡូវនេះកុមារកំពុងស្លាប់ដោយសារភាពត្រជាក់ និងខ្វះទីជម្រកគ្រប់គ្រាន់។
លោក អេឌូអាត ប៊ិងប៊ីឌ័រ (Edouard Beigbeder )នាយកអង្គការយូនីសេហ្វ ប្រចាំតំបន់មជ្ឈិមបូព៌ា និងអាហ្វ្រិកខាងជើង បាននិយាយថា ការស្លាប់ដែលអាចបង្ការបានទាំងនេះ បង្ហាញពីស្ថានភាពអស់សង្ឃឹម និងកាន់តែអាក្រក់ដែលគ្រួសារ និងកុមារនៅហ្គាហ្សាកំពុងប្រឈម។
ទន្ទឹមនឹងរបាយការណ៍នេះ អាជ្ញាធរសុខាភិបាលអ៊ីស្រាអែលក៏បានបញ្ចប់របាយការណ៍មួយដែលត្រូវដាក់ជូនអង្គការសហប្រជាជាតិស្តីពីសុខភាពអ្នកទោសអ៊ីស្រាអែលដែលត្រូវបានដោះលែងដោយក្រុមហាម៉ាស។
របាយការណ៍នោះបានបង្ហាញថា អ្នកទោសបានទទួលរងបញ្ហាជាច្រើន រួមទាំងការស្រកទម្ងន់ពី ១០ ទៅ ១៧ ភាគរយនៃទម្ងន់ខ្លួនរបស់ពួកគេ ខណៈពេលដែលកំពុងជាប់ឃុំដោយសារតែកង្វះអាហារូបត្ថម្ភ ត្រូវបានគេវាយដំ និងរក្សាឱ្យនៅដាច់ដោយឡែក។
របាយការណ៍ដដែលបានបន្តថា កុមារក៏ត្រូវបានគេវាយដំដែរ ហើយស្ត្រីត្រូវរងនូវអំពើហិង្សាផ្លូវភេទ។
លើសពីនេះ ចំណាប់ខ្មាំងមិនមានការថែទាំសុខភាពត្រឹមត្រូវទេ។ ជាលទ្ធផល ចំណាប់ខ្មាំងវ័យចំណាស់មួយចំនួន ជាឧទាហរណ៍ មានជំងឺស្ទះសរសៃឈាមនៅពេលត្រូវបង្ខំឲ្យនៅនឹងកន្លែងក្នុងរយៈពេលយូរ៕
Daily Program
