ជាជនផ្តាច់ការ ជាការពិតស្ថិតនៅក្នុងស្ថានភាពភ័យ​ខ្លាច

លោកម៉ាកសែល ឌៀស៊ូស នយោបាយវិទូជនជាតិអាឡឺម៉ង ពន្យល់អំពីអ្វី ដែលតាមការពិត ជន​ផ្តាច់ការស្ថិតនៅក្នុងស្ថានភាពផុយស្រួល និងហេតុអ្វី ជនផ្តាច់ការមានរាល់មូលហេតុក្នុង ពិភពលោកដើម្បីរស់នៅក្នុងភាពភ័យខ្លាច…

ការដួលរលំរបស់លោកបាស្ហ៉ាល អេល អាសាដ នៅប្រទេសស៊ីរី បានរំឭកអំពីភាពផុយស្រួល​នៃអាជីបជាជនផ្តាច់ការ។

លោកម៉ាកសែល ឌៀស៊ូស រំឭកថា ចាប់តាំងពីសង្រ្គាមលោកលើកទី២ ជនផ្តាច់ការជាង ២/៣ បន្ទាប់ពីចាកចេញពីអំណាច បានរស់នៅនិរទេស ជាប់គុក ឬត្រូវគេធ្វើឃាត។ នយោបាយ​វិទូ​អាឡឺម៉ង ព្រមានថា ៖ “នៅលើកម្រាលព្រំក្រហមដែលមេដឹកនាំផ្តាច់ការនានាដើរ នៅពេល​ដែល​ពួកគេឡើងកាន់អំណាច ពួកគេតម្រូវឲ្យស្ថិតនៅរហូត ដោយសារតែ​ទោះបីពួកគេចុះ​ពី​អំណាច​ដោយឆន្ទៈ ក៏បានបង្ហាញឲ្យឃើញមាននូវការប្រថុយប្រថាន​បំផុត”។

ដោយផ្អែកលើមូលដ្ឋានទិន្នន័យ និងប្រវត្តិសាស្រ្ត និក្ខេបបទរបស់លោកបានផ្តល់​ដ៏​ពិត​ប្រាកដ​អំពីរបៀបដែលប្រជាជនអាចរួចខ្លួនពីអំណាចផ្តាច់ការ។

លោកម៉ាកសែល ឌៀស៊ូស ពន្យល់ថា ហេតុអ្វីអ្នកកាន់អំណាចផ្តាច់ការដូចជាតួយ៉ាង​ លោក​វ្លាឌីមៀ ពូទីន មានរាល់ហេតុផលក្នុងការដេកមិនលក់នៅពេលយប់​ និងមិនទុកចិត្តអ្នកនៅ​ជុំវិញ​ជិតស្និទ្ធជាងប្រជាជនរបស់គាត់ទៅទៀត។ បើតាមរូបលោក ប្រវត្តិសាស្រ្តក៏​បាន​បង្ហាញ​​ថា លោកបាស្ហ៉ាល់ អេល អាសាដ គ្មានហេតុផលណានឹងមានអារម្មណ៍​សុវត្ថិភាព​នៅ​ទីក្រុង​មូស្គូនោះទេ។ ហើយយើងមិន​ត្រូវមានសុទិដ្ឋិនិយមពេកចំពោះប្រទេសស៊ីរីនោះដែរ ៖ រវាង​​ឆ្នាំ១៩៥០ និងឆ្នាំ២០១២ នៅពេលដួលរលំអំណាចផ្តាច់ការ គឺមានតែ ២០% នៃ​ស្ថានភាព​ប៉ុណ្ណោះ ដែលវិលទៅរកអំណាចប្រជាធិបតេយ្យ...

នៅក្នុងរបបប្រជាធិបតេយ្យ គេជារឿយៗ ចាត់ទុកជន​ផ្តាច់ការគឺមានអំណាចផ្តាច់មុខ។ គេ​ស្រមៃ​ពួកគេស្ថិតនៅក្នុងវិមាន និងអាច​ទទួលបាននូវអ្វីដែលគេត្រូវការដោយគ្រាន់​តែចង្អុល​ដៃ។ ជាការពិត គ្មានមេដឹកនាំណា ដែលអាចមានអំណាចដាច់ខាតនោះទេ។ ម្យ៉ាងជនផ្តាច់​ការ​ត្រូវ​ពឹងលើអ្នកដទៃៗទៀត ដើម្បីស្ថិតនៅក្នុងអំណាច។ ពួកគេប្រឈមមុខនឹងការ​លំបាក​ធំៗ ពីរ។ ទី១ ពួកគេនឹងមានគ្រោះថ្នាក់ធំប្រសិនបើពួកគេបាត់បង់អំណាច។ យោង​តាម​ទិន្នន័យ ៦៩% នៃមេដឹកនាំផ្តាច់ការ​ដែលបានចាកចេញពីអំណាច​នឹងបញ្ចប់នៅក្នុងគុក បង្ខំ​ចិត្ត​និរទេស ឬត្រូវបានគេសម្លាប់។ បើយោងតាមស្ថិតិ ដូច្នេះ ពួកគេមិនអាចបោះបង់តំណែង ឬ​ត្រូវធ្វើអ្វីៗ គ្រប់យ៉ាងដើម្បីរក្សាអំណាច។ ប្រសិនបើមិនដូច្នេះ ពួកគេប្រឈមនឹងបាត់បង់​សេរីភាព ឬក៏អាយុជីវិតផង។ ទីពីរ នៅទីកន្លែងណា​ដែលមានគោលការណ៍​ប្រជាធិបតេយ្យ​កើត​មាននៅលើចំនួនប្រជាជនច្រើននោះ វានឹងលំបាកសម្រាប់អំណាចផ្តាច់ការ។ តួយ៉ាងរបប​ផ្តាច់​ការ ដូចជារបបរបស់លោកគីម ជុងអ៊ុន នៅកូរ៉េខាងជើង ឈជើងបានលើមូលដ្ឋាន​គ្រួសារ ប្រហែល ១០០។ វាគ្រប់គ្រាន់ក្នុងការបាត់បង់​ការគាំទ្រពី​មនុស្ស​ម្នាក់ ឬ ២នាក់ ក៏អាច​បង្ក​គ្រោះថ្នាក់ធ្វើ​ឲ្យ​របបដួលរលំដែរ។ ជនផ្តាច់ការដើរទៅមុខក្នុងអ័ព្ទ និង​ធ្វើមិនដឹងមិន​ឮ​ចំពោះ​ភាពស្មោះត្រង់​របស់មនុស្សនៅជុំវិញ ហើយអ្នកដែលអាច​សម្តែង​មតិសេរី ក៏មិន​ចង់​ទៅ​រស់នៅក្នុងគុក នៅជំរុំធ្វើការជាទម្ងន់ ឬដេកក្នុងមជ្ឈូសនោះទេ។

ប្រសិនបើគេពិចារណា ឲ្យបានល្អ មេដឹកនាំផ្តាច់ការ គឺស្ថិតនៅក្នុងស្ថានភាពដ៏គួរឲ្យ​ភ័យ​ខ្លាច។ គេអាចបាត់បង់អំណាចមិនថា នៅពេលណាទេ មនុស្សនៅជុំវិញគេ តំណាងឲ្យការ​គំរាម​​កំហែងដ៏ខ្លាំង ហើយប្រសិនបើគេត្រូវបានដកតំណែង ឬលាលែង​ខ្លួនឯង គេប្រឈមមុខ​នឹង​ការ​បាត់បង់ជីវិត។