ការិយាល័យព័ត៌មានសន្តអាសនៈបានប្រកាសថា សម្តេចប៉ាប ហ្វ្រង់ស៊ីស្កូបានប្រកាសចេញនូវគោលបំណងនៃការអធិស្ឋានរបស់ទ្រង់សម្រាប់ខែ មេសា ឆ្នាំ២០២៤ដោយផ្តោតសំខាន់នៅលើតួនាទីរបស់ស្រ្តី។
ពាក់ព័ន្ធនឹងប្រធានបទនេះសម្តេចប៉ាបបានអញ្ជើញគ្រិស្តបរិស័ទទាំងអស់ឲ្យអធិដ្ឋានតាមគោលដៅនេះសំដៅលើកកំពស់ស្ត្រី និងគោរព ជាពិសេសគឺអោយតម្លៃចំពោះស្រ្តី ហើយគួរនាំគ្នាបញ្ឈប់ការរើសអើងលើស្រ្តី។
តាមសារដែលការិយាល័យព័ត៌មានសន្តអាសនៈបានបង្ហោះ សម្តេចប៉ាបបាន បង្ហាញពីគម្លាតដ៏ធំដែលមានរវាងគោលការណ៍ដែលបានប្រកាស និងការអនុវត្តជាក់ស្តែង។
សម្តេចប៉ាបបានមានបន្ទូលថា តាមទ្រឹស្តី យើងទាំងអស់គ្នាយល់ស្របថា បុរស និងស្ត្រីមានសេចក្តីថ្លៃថ្នូរជាមនុស្សដូចគ្នា ប៉ុន្តែក្នុងការអនុវត្តជាក់ស្តែងស្រ្តីនៅតែមានបញ្ហា។
សម្តេចប៉ាបបានផ្តល់នូវឧទាហរណ៍ជាក់ស្តែង ដោយលើកឡើងពី «ច្បាប់រើសអើង» ដែលបច្ចុប្បន្ននៅតែមានជាធរមាន ដូចជាការដាក់កម្រិតនៅលើសំលៀកបំពាក់នៅសង្គមខ្លះ ការរារាំងដល់ការអប់រំដែលកំពុងបន្ត ការបដិសេធជំនួយសម្រាប់ឱកាសការងារ ខណៈដែល ការកាត់ប្រដាប់ភេទនៅតែត្រូវបានអនុវត្តនៅតាមប្រទេសខ្លះ ។
សម្តេចប៉ាបបានមានបន្ទូល ថា រដ្ឋាភិបាលត្រូវតែប្តេជ្ញាលុបបំបាត់ការរើសអើងនេះ និងធ្វើការឆ្ពោះទៅរកការធានាសិទ្ធិមនុស្សរបស់ស្ត្រី។
សម្តេចប៉ាបបានស្នើឲ្យមនុស្សជាតិ ទាំងអស់គ្នាគោរពស្ត្រី ដែលជាអកុសលនៅតែបន្តត្រូវបានចាត់ទុក ដូចជាអ្វីដែលត្រូវកម្ចាត់ ហើយជារឿយៗជាជនរងគ្រោះនៃអំពើហិង្សា និងការរំលោភបំពាននៅក្នុងផ្នែកជាច្រើននៃពិភពលោក សូម្បីតែនៅក្នុងប្រទេសដែលអះអាងថាមានកម្រិតខ្ពស់ជាងក៏ដោយ។
សម្តេចប៉ាបបានបន្ថែមថា ប្រសិនបើយើងមិន [គោរពស្ត្រី] ទេ សង្គមរបស់យើងនឹងមិនរីកចម្រើនទេ៕
Daily Program
