ក្រុមប្រឹក្សាសន្តិសុខអង្គការសហប្រជាជាតិ ទាមទារឲ្យមានការឈប់ជាបន្ទាន់នូវ​ការវាយប្រហាររបស់ក្រុមហ៊ូទី នៅសមុទ្រក្រហម

កាលពីថ្ងៃទី១០ វិច្ឆិកា ក្រុមប្រឹក្សាសន្តិសុខនៃអង្គការសហប្រជាជាតិ បានទាមទារឲ្យមានការ​ឈប់ជាបន្ទាន់​នូវការវាយប្រហាររបស់ក្រុមហ៊ូទីប្រឆាំងនឹងនាវានៅសមុទ្រក្រហម ដែលរាំង ស្ទះដល់ពាណិជ្ជកម្មអន្តរជាតិ និងធ្វើឲ្យទន់ខ្សោយដល់សិទ្ធ និងសេរីភាពនៃការធ្វើ​នាវាចរណ៍ ព្រមទាំងសន្តិភាព និងសន្តិសុខនៅក្នុងតំបន់។

ដំណោះស្រាយដែលរៀបចំឡើង​ដោយសហរដ្ឋអាម៉េរិក និងជប៉ុន ដែលត្រូវបានអនុម័ត​ដោយ​១១សម្លេង គាំទ្រ និងបួនប្រឆាំង មានរុស្ស៊ី ចិន អាល់ហ្សេរី និងមូហ្សំប៊ិច ថ្កោលទោស​ដោយ ប្រើពាក្យពេជន៍ សម្រាប់ការវាយប្រហារដ៏ខ្លាំងក្លាបំផុត​របស់ក្រុមហ៊ូទី ទៅលើនាវាដឹកទំនិញ និងពាណិជ្ជកម្មយ៉ាងហោចណាស់ ១២គ្រឿង ចាប់តាំងពីថ្ងៃ១៩ ខែវិច្ឆិកា ឆ្នាំ២០២៣។

ក្រុមប្រឹក្សាសន្តិសុខ ដែលទទូចឲ្យមានការគោរពច្បាប់អន្តរជាតិ កត់សម្គាល់អំពីសិទ្ធរបស់​រដ្ឋ សមាជិកនានាដើម្បីការពារនាវាប្រឆាំងនឹងការវាយប្រហារ។

ចាប់តាំងពីការចាប់ផ្តើមនៃសង្រ្គាម នៅថ្ងៃទី៧ ខែតុលា រវាងអ៊ីស្រាអែល និងហាម៉ាស ក្រុម ហ៊ូទី ដែលគ្រប់គ្រងមួយផ្នែកដ៏ធំនៃប្រទេសយេម៉េន បានបង្កើនការវាយប្រហារទៅលើសមុទ្រ​ក្រហម ដើម្បីពន្យឺតចរាចរណ៍ផ្លូវសមុទ្រអន្តរជាតិ និងបញ្ជាក់ថាធ្វើការដោយសាមគ្គីភាព ជាមួយ​នឹងប្រជាជនប៉ាឡេស្ទីននៅហ្គាហ្សា។

សម្ព័ន្ធមិត្តទី១ របស់អ៊ីស្រាអែល គឺសហរដ្ឋអាម៉េរិក កាលពីខែធ្នូ បានកៀងគរសម្ព័ន្ធ​មិត្ត​អន្តរជាតិ​​ដើម្បីការពារចរាចរណ៍ផ្លូវសមុទ្រពីការវាយប្រហាររបស់ក្រុមហ៊ូទី នៅក្នុងតំបន់​យុទ្ធសាស្រ្ត ដែលជាផ្លូវពាណិជ្ជកម្មពិភពលោក ១២%។

នេះគឺជាសម្ព័ន្ធមិត្តដែលប្រទេសរុស្ស៊ីបានបរិហារ។ អគ្គរដ្ឋទូតរុស្ស៊ី លោកវ៉ាស៊ីលី ណេបេនហ្ស៊ីយ៉ា បានបរិហារថា ៖ “យើងមិនអាចមិនព្រួយបារម្ភអំពី​ស្ថានភាពសព្វថ្ងៃនៅ​សមុទ្រ​ក្រហម(...) ហើយយើងព្រួយបារម្ភថា សហរដ្ឋអាម៉េរិក និងសម្ព័ន្ធមិត្តរបស់ខ្លួនដូចជា​រឿយ ជ្រើសរើសយកដំណោះស្រាយដោយប្រើកម្លាំងជាឯកតោភាគី”។

ដំណោះស្រាយ ដែលកត់សម្គាល់​នូវការរំលោភ​ជាទ្រង់ទ្រាយធំលើការដាក់ទណ្ឌកម្ម​សព្វាវុធ សម្រាប់​ក្រុមហ៊ូទី បានរំឭកអំពីភាពចាំបាច់សម្រាប់រដ្ឋសមាជិកទាំងអស់គោរពកាតព្វកិច្ច​ចំពោះ​រឿងនេះ និងថ្កោលទោសការផ្តល់សព្វាវុធដល់ក្រុមហ៊ូទីដែលស្និទ្ធនឹងប្រទេសអ៊ីរ៉ង។

យោងតាមរបាយការណ៍ចុងក្រោយនៃអ្នកជំនាញដែលតែងតាំងដោយក្រុមប្រឹក្សាសន្តិសុខ​ដើម្បី​តាមដានការដាក់ទណ្ឌកម្មអំពីសព្វាវុធ តាំងពីខែវិច្ឆិកា ឆ្នាំ២០២៣ ក្រុមហ៊ូទី បានពង្រឹង​សមត្ថភាព​យោធារបស់ខ្លួនយ៉ាងខ្លាំងក្លាទាំងជើងគោក និងជើងទឹក រួមមាននាវាមុជទឹក អាវុធ​មីស៊ីល និងដ្រូនផងដែរ ដោយរំលោភលើការដាក់ទណ្ឌកម្ម។

ពង្រាងច្បាប់នៃដំណោះសា្រយអំពាវនាវឲ្យដោះស្រាយស្ថានភាពឲ្យដល់ឫសគល់ រួមទាំង​ជម្លោះ​​ដែលរួមចំណែកធ្វើឲ្យមានភាពតានតឹងនៅក្នុងតំបន់។

លោកស្រីលីនដា ថូម៉ាស ហ្គ្រីនហ្វៀ ឯកអគ្គរដ្ឋទូតអាម៉េរិក បានអធិប្បាយថា ធ្វើការពាក់ព័ន្ធ​ជាមួយ​តំបន់ហ្គាហ្សា នឹងលើកទឹកចិត្ត​ដល់​ក្រុមហ៊ូទី និងបង្កើតគ្រោះថ្នាក់មិនអាចនឹកស្មាន​សម្រាប់​ក្រុមប្រឹក្សា វាគឺជាការរំលោភលើ​ច្បាប់អន្តរជាតិ និងមិនទាន់រាប់បញ្ចូល​ការផ្តល់​ជំនួយ​ហិរញ្ញ​វត្ថុ និងសម្ភារៈ​របស់អ៊ីរ៉ងដល់ក្រុម​ហ៊ូទីផង។ លោកស្រី ដែលអំពាវនាវឲ្យអ៊ីរ៉ង​ធ្វើការ​ជ្រើស​រើស បានអះអាងថា យើងមិនត្រូវធ្វើប្រហែល​នឹងប្រភពនៃបញ្ហានោះទេ (...) យើងដឹង​ថា អ៊ីរ៉ងគឺបានចូលពាក់ព័ន្ធយ៉ាងខ្លាំង​នៅក្នុងការរៀប​ចំផែនការនៃប្រតិបត្តិការ​ប្រឆាំងនឹងនាវា​ពាណិជ្ជកម្ម​នៅសមុទ្រក្រហម”។

ចំណែក លោកស្តេហ្វាន ឌុចារីក អ្នកនាំពាក្យនៃអគ្គលេខាអង្គការសហប្រជាជាតិ បាន​ពន្យល់​ថា ៖ “យើងព្រួយបារម្ភខ្លាំងជានិច្ច​ពាក់ព័ន្ធនឹងស្ថានភាពនៅសមុទ្រក្រហម មិនគ្រាន់តែទាក់​ទង​នឹង​​ស្ថានភាពផ្ទាល់ ហានិភ័យចំពោះពាណិជ្ជកម្មពិភពលោក បរិស្ថាន និងមនុស្ស ប៉ុន្តែក៏​ជា​ហា​និភ័យ​ដែលធ្វើឲ្យរីករាលដាលធំឡើង​នូវជម្លោះដែលកាន់តែទំលំទូលាយ​នៅមជ្ឈិម​បូព៌ាផងដែរ។