ការវាយប្រហារបង្ហូរឈាមទៅលើអូដឺសា ក្នុងអំឡុងទស្សនកិច្ច​របស់លោក​ហ្សេឡេនស្គី និងនាយករដ្ឋមន្រ្តីក្រិក

អូដឺសារងការវាយប្រហារ​នៅអំឡុងពេលបំពេញដំណើរទស្សនកិច្ចការទូត របស់នាយក​រដ្ឋ​មន្ត្រី​​ក្រិកនៅអ៊ុយក្រែន។ ការវាយ​ប្រហាររបស់រុស្ស៊ី បានធ្វើឲ្យមនុស្ស ៥នាក់ ស្លាប់ កាលពីថ្ងៃ​ទី​​៦ ខែមីនា នៅក្នុងភូមិអ៊ុយក្រែន ដែលប្រធានាធិបតីវ៉ូឡូឌីមៀ ហ្សេឡេនស្គី និងនាយក​រដ្ឋ​មន្រ្តី​​​ក្រិក លោក គីរីយ៉ាកូស មីតសូតាគីស កំពុងដើរ។

អ្នកនាំពាក្យកងទ័ពជើងទឹកអ៊ុយក្រែន លោកឌីមីត្រូ ប្លេតេនជុក បានថ្លែងថា​៖ “យើងបញ្ជាក់​អំពី​​ការវាយប្រហារប្រឆាំងនឹងហេដ្ឋារចនាសម្ព័ន្ធកំពង់ផែ​នៃទីក្រុងអូដឺសា។ យើងបញ្ជាក់អំពី​កា​រ​ស្លាប់របស់មនុស្ស ៥នាក់។ ហើយក៏មានអ្នករងរបួសផងដែរ។”

លោកគីរីយ៉ាកូស មីតសូតាគីស នាយករដ្ឋមន្រ្តីក្រិក បានរៀបរាប់ថា នៅជិតចុងបញ្ចប់នៃ​ដំណើរ​​ទស្សនកិច្ច យើងបានលឮសម្លេង​ស៊ីរ៉ែនកាំភ្លើងការពារអាកាស និងការផ្ទុះនៅជិត​ក្បែរ​យើង។ យើងមិនមានពេលវេលា​រកទីកន្លែងជ្រកផង។ ចេញពីការទម្លាក់គ្រាប់បែក លោកបាន​ប្រាប់​អំពី​បទពិសោធន៍ដ៏គួរឲ្យភ្ញាក់ផ្អើល។

ចំណែកលោកវ៉ូឡូឌីមៀ ហ្សេឡេនស្គី បានប្រតិកម្មថា យោធារុស្ស៊ីមិនដែលខ្វល់នឹងដឹងថា តើ​គោលដៅវាយប្រហារគឺជាយោធា ឬប្រជាជនស៊ីវិលនោះទេ ឬក៏ដឹងថា នេះគឺជាភ្ញៀវអ​ន្តរ​ជាតិ។ យោធារុស្ស៊ីមើលងាយគេណាស់។

នៅទីក្រុងមូស្គូ ក្រសួងការពារជាតិរុស្ស៊ី បានអះអាងអំពីការបាញ់មីស៊ីលមួយគ្រាប់លើតំបន់​កំពង់​ផែពាណិជ្ជកម្ម និងបញ្ជាក់ថា បានប៉ះពាល់ដល់អគារមួយ ដែលនៅក្នុងនោះ​ដ្រូន​ទាហាន​ជើងទឹក ត្រូវបានរៀបចំ​ដើម្បីប្រយុទ្ធដោយកងកម្លាំងយោធាអ៊ុយក្រែន។

លើសពីនេះ តំបន់នៅប្រទេសអ៊ុយក្រែនជាច្រើនត្រូវបានវាយប្រហារ​​ដោយដ្រូនរបស់​រុស្ស៊ីនៅ​ក្នុង​យប់ថ្ងៃអង្គារឆ្លងចូលថ្ងៃពុធ។

ចំណែកទាហានអ៊ុយក្រែនបានពង្រីកវិសាលភាពនៃសកម្មភាពរបស់ពួកគេនៅពីក្រោយខ្សែត្រៀម​​របស់រុស្ស៊ី ជាមួយនឹងការវាយប្រហារអត្តឃាតនៅក្នុងតំបន់ដែលគ្រប់គ្រងដោយរុស្ស៊ី នៅ​ទីក្រុងប៊ែរឌីយ៉ង ទៅលើមន្រ្តី​ដែលតែងតាំងដោយអាជ្ញាធររុស្ស៊ីសម្រាប់ការបោះឆ្នោត។ មន្រ្តីម្នាក់​​បានស្លាប់នៅក្នុងរថយន្តរបស់គាត់ និងមានការវាយប្រហារដោយដ្រូន​នៅលើ​ឃ្លាំង​ប្រេង​​នៅ​ក្នុង​តំបន់គូស ព្រំដែនជាមួយអ៊ុយក្រែន។

យោងតាមអ្នកអង្កេតការណ៍ គ្រឿងផ្ទុះដែលច្នៃដោយដៃត្រូវបានបំពាក់នៅក្រោម​យានយន្ត​របស់​សមាជិក​នៃគណកម្មការបោះឆ្នោតតំបន់។ នៅខណៈ​ដែលគាត់ឡើងទៅក្នុងឡាន វាក៏​ផ្ទុះ​​ឡើង។

មេដឹកនាំ​តំបន់ក្រោមការគ្រប់គ្រងរបស់រុស្ស៊ី​នៅក្នុងតំបន់នេះនៅភាគខាងត្បូងអ៊ុយក្រែន លោក​អេវហ្គេនី បាលីតស្គី បានប្រកាសនៅលើតេឡេក្រាមថា វាគឺជាការវាយប្រហារភេរវកម្ម និង​ជាការប៉ុនប៉ង់គំរាមកំហែងសម្រាប់សប្តាហ៍នៃការបោះឆ្នោតប្រធានាធិបតីរុស្ស៊ីពីថ្ងៃទី១៥ ដល់ថ្ងៃទី១៧ មីនា ដែលនឹងប្រព្រឹត្តិទៅ នៅក្នុងដែនដីដែលរុស្ស៊ីកាន់កាប់នៅអ៊ុយក្រែន។

មន្រ្តីកាន់កាប់ដែនដីជាច្រើនរបស់រុស្ស៊ី ឬអ្នកសហការណ៍ជាមួយរុស្ស៊ីនៅអ៊ុយក្រែន រួមទាំង​នៅ​គ្រីម៉េត្រូវបានស្លាប់ និងរងរបួសក្នុងប៉ុន្មានឆ្នាំចុងក្រោយនេះនៅក្នុងការវាយប្រហារ និងការ​ធ្វើ​ភេរវកម្មដែលត្រូវបានចោទប្រកាន់ថា ជាស្នាដៃរបស់ទីក្រុងគៀវ។​

ប្រមាណ៦០០គីឡូម៉ែត្រនៅភាគខាងជើង នៅក្នុងតំបន់គូសរបស់រុស្ស៊ី គឺជាឃ្លាំងប្រេង ដែល​បាន​ឆាបឆេះកាលពីថ្ងៃពុធ ទី៦ មីនា បន្ទាប់ពីការវាយប្រហាររបស់ដ្រូនអ៊ុយក្រែន។ នេះ​គឺ​ជា​ប្រភេទនៃប្រតិបត្តិការ​ដែលកាន់តែមានញឹកញាប់ឡើងៗ។

ចាប់តាំងពីប៉ុន្មានខែមកហើយ  មួយផ្នែកនៃយុទ្ធសាស្រ្តយោធាទីក្រុងគៀវ រួមបញ្ចូល​ការ​វាយ​ប្រហារ​​ពីខាងក្រោយខ្សែត្រៀមសត្រូវ ឆ្ងាយពីសមរភូមិ។ នេះគឺជាមធ្យោបាយ​ដែលធ្វើ​ឲ្យ​រញ៉េ​រញ៉ៃ​ដល់​ការដឹកជញ្ជូនរបស់យោធារុស្ស៊ី ដែលផ្គត់ផ្គង់ដល់កងទ័ពជួរមុខនូវគ្រាប់រំសេវ និង​ប្រេងនៅ​តាមតំបន់ព្រំដែន។