ការត្រឡប់មកវិញនូវការរាំងខ្ទប់អ៊ីរ៉ង់ អាម៉េរិក ចាប់ផ្តើមសមរភូមិ ដើម្បីគ្រប់គ្រងច្រកសមុទ្រអ័រមូស
កាលពីយប់ថ្ងៃចន្ទ ទី១៥ ខែកក្កដា សហរដ្ឋអាម៉េរិកបានរាំងខ្ទប់កំពង់ផែអ៊ីរ៉ង់ និងចាប់ផ្តើមវគ្គ នៃការវាយប្រហារ និងសងសឹង នៅជុំវិញច្រកសមុទ្រអ័រមូស។ ទោះបីជាយ៉ាងណា លោក ដូណាល់ ត្រាំ បានបោះបង់ចោលគម្រោងការយកពន្ធលើនាវានានា នៅនាទីចុងក្រោយ។
សហរដ្ឋអាម៉េរិកបានធ្វើការរាំងខ្ទប់កំពង់ផែអ៊ីរ៉ង់ជាផ្លូវការ។ ការសម្រេចចិត្តដែលធ្វើឡើង ដោយលោកដូណាល់ ត្រាំ ប្រធានាធិបតីអាម៉េរិក ត្រូវបានយកទៅអនុវត្តដោយបញ្ជាការ កណ្តាលយោធាអាម៉េរិក សេនខម (Centcom) ដែលបានប្រកាសថា កងកម្លាំងរបស់ខ្លួននឹង ធ្វើការរាំងខ្ទប់ លើនាវាដែលមានគោលដៅចេញ និងចូល កំពង់ផែ និងតំបន់ឆ្នេររបស់អ៊ីរ៉ង់។
បញ្ជាការកណ្តាលយោធាអាម៉េរិក សេនខម បានធ្វើការព្រមាននៅលើបណ្តាញសង្គម អ៊ិក (X) និងប្រកាសថា នាវាចម្បាំងជាង ២០គ្រឿង នៃកងកម្លាំងម៉ារីនអាម៉េរិក និងយន្តហោះយោធារាប់រយ ពេលនេះត្រូវបានដាក់ពង្រាយនៅតំបន់មជ្ឈិមបូព៌ា និងអះអាងថា កងកម្លាំងអាម៉េរិកស្ថិតនៅយាមកាម អាចបាញ់ និងត្រៀមខ្លួនជាស្រេច។
សហរដ្ឋអាម៉េរិកធ្លាប់បានស្ថាបនាការរាំងខ្ទប់រួចហើយកាលពីពាក់កណ្តាលខែមេសា មុននឹងដកចេញវិញនៅពាក់កណ្តាលខែមិថុនា នៅថ្ងៃបន្ទាប់ពីការចុះហត្ថលេខាលើកិច្ចព្រមព្រៀង បណ្ដោះអាសន្ន ដែលកំណត់ឲ្យមានការចរចារយៈពេល ៦០ ថ្ងៃ លើកម្មវិធីនុយក្លេអ៊ែររបស់ អ៊ីរ៉ង់។
ការលាប់ឡើងវិញនៃសង្រ្គាម ដែលគេអាចឃើញវាកើតឡើងជាបន្តបន្ទាប់ គឺថា ទីក្រុងតេអេរ៉ង់ បានប្រកាសបិទច្រកសមុទ្រអ័រមូស បន្ទាប់ពីការប្រយុទ្ធត្រូវបានបន្តកើតឡើងវិញ ដែលបានចាប់ផ្តើមសប្តាហ៍មុន ក្រោយពីមានការវាយប្រហារលើនាវាមួយពីអ៊ីរ៉ង់ក្នុងផ្លូវសមុទ្រអ័រមូសដ៏សំខាន់នេះ។ ហើយកាលពីព្រឹកថ្ងៃពុធ ទី១៥ ខែកក្កដា កងឆ្មាំបដិវត្តន៍អ៊ីរ៉ង់ បានបញ្ជាក់ថា ច្រកសមុទ្រស្ថិតនៅបិទរហូតដល់ទង្វើនៃការឈ្លានពានរបស់អាម៉េរិកត្រូវបានបញ្ចប់។ ពួកគេក៏បានគំរាមកំហែងបិទការនាំចេញថាមពលទាំងមូលពីតំបន់មជ្ឈិមបូព៌ា តាមរយៈបិទផ្លូវយុទ្ធសាស្ត្រផ្សេងៗទៀត។
នៅក្នុងសេចក្តីប្រកាសមួយដែលផ្សព្វផ្សាយដោយទូរទស្សន៍រដ្ឋអ៊ីរ៉ង់ ឆ្មាំបដិវត្តន៍អ៊ីរ៉ង់ បាន ប្រកាសថា ការនាំចេញប្រេង និងឧស្ម័ននៅក្នុងតំបន់នឹងអាចមានសម្រាប់ទាំងអស់គ្នា ឬគ្មាន សម្រាប់ទាំងអស់គ្នា។”
អនុរដ្ឋមន្រ្តីកិច្ចការបរទេសអ៊ីរ៉ង់ លោកកាហ្ស៉េម ហ្គារីបាបាឌី ក៏បានព្រមានថា អនាគតនៃការ ចរចាខាងការទូតត្រូវបានរំខាន។ លោកបានថ្លែងថា ៖ “ប្រសិនបើសហរដ្ឋអាម៉េរិកស្រមៃថា ដោយការដាក់ទម្ងន់នៃវិធានការរបស់ពួកគេប្រឆាំងនឹងយើង ការមានសកម្មភាពយោធា និង ការរាំងខ្ទប់សេដ្ឋកិច្ច ធ្វើឲ្យយើងវិលមករកតុចរចា គឺពួកគេយល់ច្រឡំហើយ។”
ការស្ថាបនាការរាំងខ្ទប់អ៊ីរ៉ង់ត្រូវអមមកជាមួយនូវយុទ្ធនាការថ្មីនៃការវាយប្រហារ របស់អាម៉េរិកយ៉ាងសាហាវក្នុងប្រទេសអ៊ីរ៉ង់។ បញ្ជាការកណ្តាលយោធាអាម៉េរិកនៅមជ្ឈិមបូព៌ា បានបញ្ជាក់ថា បានវាយប្រហារលើគោលដៅរាប់សិបកន្លែងនៅក្នុងប្រទេសអ៊ីរ៉ង់ រយៈពេល ៧ម៉ោង ដើម្បីបន្តធ្វើឲ្យចុះទន់ខ្សោយដល់សមត្ថភាពយោធារបស់អ៊ីរ៉ងដែលបានវាយប្រហារលើនាវាចរណ៍ពាណិជ្ជកម្មផ្លូវសមុទ្រច្រកអ័រមូស។ ចំណែកលោកដូណាល់ ត្រាំ ប្រធានាធិបតីអាម៉េរិកបានអះអាងថា យុទ្ធនាការយោធានឹងនៅតែបន្ត។ លោកបានបញ្ជាក់ថា ៖ “ការវាយប្រហារនឹងនៅតែបន្តរហូតដល់លោកនិយាយថា វាសមរម្យហើយ។" នៅលើបណ្តាញសារព័ត៌មាន ហ្វ៉កញូ (Fox News) លោកក៏បានថ្លែងថា លោកទុកគោលដៅ ថាមពលនៅអ៊ីរ៉ង់នាពេលចុងក្រោយ ប៉ុន្តែយើងនឹងវាយប្រហារពួកវា។ សប្តាហ៍ក្រោយ នឹងជាមណ្ឌលថាមពលអគ្គីសនី ស្ពាន រហូតដល់ពួកគេត្រឡប់មករកតុចរចា។”
Daily Program
