នៅក្នុងពិធីបើកមហាសន្និបាតពេញអង្គលើកទី ១២ នៃសភាលោកអភិបាលកាតូលិកអាស៊ី (FABC) នៅទីក្រុងហ្សាការតា កាលពីថ្ងៃទី ២១ ខែកក្កដា កាឌីណាល់ Filipe Neri Ferrão បានអំពាវនាវឲ្យព្រះសហគមន៍នៅអាស៊ីធ្វើដំណើររួមគ្នា ឱ្យហួសពីការពិភាក្សា ហើយប្រែក្លាយវាឱ្យទៅជាការពិតនៅក្នុងជីវិតរស់នៅប្រចាំថ្ងៃតាមព្រះសហគមន៍មូលដ្ឋានតាមភូមិភាគព្រះសហគមន៍កាតូលិក និងតាមគ្រួសារនីមួយៗ។
កាឌីណាល់ហ្វើរ៉ាវ បានគូសបញ្ជាក់ថា ជំនួបនេះគឺជាដំណើរផ្លូវខាងវិញ្ញាណ ជាជាងជំនួបរៀបចំការងាររដ្ឋបាលធម្មតា៖ «យើងមិនបានមកជួបជុំគ្នាគ្រាន់តែដើម្បីពិភាក្សាអំពីអនាគតនៃព្រះសហគមន៍នៅអាស៊ីនោះទេ។ ប៉ុន្តែ យើងបានមកជុំគ្នាដើម្បីស្វែងរកព្រះហឫទ័យរបស់ព្រះជាម្ចាស់សម្រាប់ប្រជារាស្ត្រទ្រង់»។
ដោយបញ្ជាក់យ៉ាងច្បាស់ថា ស៊ីណូដាល មិនមែនជាកម្មវិធី អភិបាលកិច្ច ឬជាការកែទម្រង់រដ្ឋបាលនោះទេ លោកបានលើកឡើងអំពីបញ្ហាប្រឈមសំខាន់ដែលមហាសន្និបាតកំពុងជួបប្រទះថា៖
«សំណួរពិតប្រាកដនៅចំពោះមុខយើង មិនមែនជាសំណួរថាតើស៊ីណូដាលនេះមានសារៈសំខាន់ឬយ៉ាងណានោះទេ ប៉ុន្តែគឺថាតើវាអាចចាក់ឫសយ៉ាងជ្រៅនៅក្នុងភូមិភាគ ព្រះសហគមន៍ គ្រឹះស្ថាន គ្រួសារអ្នកបួស និងគ្រួសាររបស់យើងដោយរបៀបណានោះទេ»។
ដោយផ្អែកលើប្រធានបទនៃមហាសន្និបាត «ការត្រាស់ហៅឱ្យមានការផ្លាស់ប្តូរចិត្តគំនិតក្នុងដំណើររួមគ្នា និងបេសកកម្មធ្វើជាស្ពាន និងជាអ្នកកសាងស្ពាននៅអាស៊ី» លោកបានសង្កត់ធ្ងន់ថា ការអធិស្ឋាន កិច្ចសន្ទនា និងការរួមគ្នាពិចារណាស្វែងរកការពិត គឺជាចំណុចសំខាន់បំផុត៖ «ទាំងនេះមិនមែនគ្រាន់តែជាការរៀបចំលេងៗក្នុងកម្មវិធីនោះទេ»។
នៅក្នុងបរិបទនៃភាពចម្រុះនៃវប្បធម៌ដ៏សម្បូរបែប និងបញ្ហាប្រឈមសង្គម នយោបាយដ៏ស្រួចស្រាវនៅអាស៊ី លោកបានរំលេចពីការអំពាវនាវជាបន្តបន្ទាប់របស់ព្រះសហគមន៍ថា៖ «ព្រះសហគមន៍នៅអាស៊ី ត្រូវបានអំពាវនាវ ឱ្យធ្វើ ជាស្ពានផង និងជាអ្នកកសាងស្ពានផង»។
ជាចុងក្រោយ កាឌីណាល់ ហ្វើររ៉ាវ បានកត់សម្គាល់ថា ជោគជ័យនៃមហាសន្និបាតនេះ នឹងត្រូវវាស់វែងដោយមើលថា តើតំណាងដែលចូលរួមទាំងអស់ ត្រឡប់ទៅផ្ទះវិញដោយមានការយកចិត្តទុកដាក់កាន់តែខ្លាំងចំពោះព្រះវិញ្ញាណដ៏វិសុទ្ធ និងមានការរៀបចំខ្លួនបានល្អជាងមុនក្នុងការធ្វើជាអ្នកកសាងស្ពាននៅទូទាំងទ្វីបអាស៊ីដែរឬទេ។
Daily Program
