កាឌីណាល់​ តាគ្លេ៖ ក្តីសង្ឃឹមក្នុងយុគឌីជីថល បូជនីយចរនៃក្តីសង្ឃឹម និងសំឡេងអាស៊ីកំពុង​ងើបឡើង

ក្នុងអំឡុងពេលនៃ បូជនីយចរឆ្ពោះទៅក្តីសង្ឃឹម​ដ៏អស្ចារ្យនៅទីក្រុងប៉េណាំងកាលពីថ្ងៃទី ២៩ ខែវិច្ឆិកា លោក លូវីស អន់តូនីញ៉ូ តាគ្លេ (Luis Antonio Cardinal Tagle) បានថ្លែងសន្និសីទសារព័ត៌មានដ៏ទូលំទូលាយមួយ ដោយឆ្លុះបញ្ចាំងអំពីយុគសម័យឌីជីថល ស្មារតីនៃបូចនីចរ និងកេរដំណែលនៃសមាជបេសកកម្មអាស៊ីលើកទីមួយ។

«ដំណឹងល្អត្រូវតែមានឥទ្ធិពលលើជន​ល្បីល្បាញលើឌីជីថល (Influencer)»

លោកបានសរសើរចំពោះពិភពឌីជីថលថាជា «អំណោយទានពិសេស» និងជាការបង្ហាញពីការច្នៃប្រឌិតរបស់ព្រះជាម្ចាស់ ដោយកត់សម្គាល់ពីរបៀបដែលបច្ចេកវិទ្យាបានកែលម្អការទំនាក់ទំនងយ៉ាងទូលំទូលាយ (ផ្ទុយពីការហៅទូរស័ព្ទមានកំណត់ក្នុងសម័យលោកជានិស្សិត)។ លោកបានសង្កត់ធ្ងន់ថា ព្រឹត្តិការណ៍នានា ដូចជាបូជនីយចរនេះ ឥឡូវបានក្លាយជាបទពិសោធន៍ជាសកលតាមរយៈការផ្សាយបន្តផ្ទាល់។

ទោះជាយ៉ាងណាក៏ដោយ លោកកាឌីណាល់ក៏បានចេញការព្រមានយ៉ាងខ្លាំងអំពី «ដាវមុខពីរ» នៃបច្ចេកវិទ្យា ដោយលើកឡើងពីការបំភាន់ព័ត៌មាន (disinformation) ការលួចអត្តសញ្ញាណ ដោយចែករំលែកថាមានគណនីហ្វេសប៊ុកក្លែងក្លាយជាច្រើនប្រើឈ្មោះរបស់លោក និងសក្តានុពលនៃបញ្ញាសិប្បនិម្មិតកំពុង​បង្កភាពវឹកវរ។

លោក​បាន​សង្កត់ធ្ងន់ថា «គ្រោះថ្នាក់មិនបានលុបបំបាត់លទ្ធភាពទេ»។ លោកកាឌីណាល់ តាគ្លេ បានរំលឹកពីភាពជោគជ័យរបស់អ្នកផ្សព្វផ្សាយសាសនាតាម​ឌីជីថល ដែលជាវេទិកាមួយបានទទួលសំណួរអំពីអ្នក​ជឿចំនួនពីរលានបន្ទាប់ពីមានព្រឹត្តិការណ៍ទាក់ទងនឹងសម្តេចប៉ាប។

លោកបានបិទបញ្ចប់ដោយសារដ៏សំខាន់មួយសម្រាប់អ្នកបង្កើតមាតិកាឌីជីថល៖ «ដំណឹងល្អត្រូវតែមានឥទ្ធិពលលើជន​ល្បីល្បាញលើឌីជីថល»។

បូជនីយចរដែលផ្តល់ការលួងលោម

នៅពេលសួរលោក​ឱ្យពិពណ៌នាអំពីបូជនីយចរឆ្ពោះ​ទៅ​ក្តីសង្ឃឹមដ៏អស្ចារ្យ​ត្រឹមមួយពាក្យ លោកកាឌីណាល់ តាគ្លេ បានឆ្លើយតបភ្លាមៗថា៖ «ផ្តល់ការលួងលោម»។

លោកបានពន្យល់ថា ការធ្វើដំណើរនេះ មានអ្នកបូជនីយេសក៍​រាប់ពាន់នាក់នៅទូទាំងប្រទេសម៉ាឡេស៊ីចូលរួមក្នុងការអធិស្ឋាន និងការរួបរួម សុទ្ធតែនាំមកនូវអារម្មណ៍នៃការលួងលោមផ្លូវចិត្តយ៉ាងជ្រាលជ្រៅ។ វាជាការរំលឹកថា ព្រះជាម្ចាស់គង់នៅជាមួយព្រះសហគមន៍​​ក្នុងទ្វីបអាស៊ី ទោះបីជានៅចំពេលមានភាពមិនប្រាកដប្រជា ជម្លោះ និងការផ្លាស់ប្តូរយ៉ាងឆាប់រហ័សក៏ដោយ។

ព្រះសហគមន៍​ឆ្ពោះ​ទៅមុខ

ការឆ្លុះបញ្ចាំងរបស់លោកកាឌីណាល់ តាគ្លេ លើប្រធានបទទាំងបី គឺបច្ចេកវិទ្យា បូជនីយចរ និងបេសកកម្ម បានបង្ហាញពីអាស៊ី​ជា​ព្រះសហគមន៍​មួយដែល ចាក់ឫសក្នុងប្រពៃណី តែបើកចំហរចំពោះអនាគត។ មិនថាជាព្រះពរ​​និងហានិភ័យក្នុង​ពិភពឌីជីថល ការធ្វើដំណើររួមគ្នាក្នុងក្តីសង្ឃឹម ឬការប្រកាសដំណឹងល្អតាមរយៈរឿងនិទាននោះទេ លោកបានគូសបញ្ជាក់ថា បេះដូងនៃបេសកកម្មរបស់​គ្រីស្តបរិស័ទ​ នៅតែមិនផ្លាស់ប្តូរ។

លោកបានមានប្រសាសន៍ថា៖ «ស្រូវ​មាន​ច្រើន​អនេក» «ហើយព្រះយេស៊ូនៅតែបន្តយាងដើរជាមួយយើង»។