កាឌីណាល់តាក្លេ នឹងថ្លែងសុន្ទរកថាទៅកាន់បណ្តាលោកអភិបាលនៅអាស៊ី ក្នុងទីក្រុងម៉ាកាវ

លោកកាឌីណាល់ ល្វីស អេនតូនីញ៉ូ តាក្លេ (Luis Antonio Tagle) ដែលជារដ្ឋមន្ត្រីស្តីទី នៃក្រសួងប្រកាសដំណឹងល្អរបស់បុរីវ៉ាទីកង់ និងជាព្រឹទ្ធសមាជិកនៃក្រុមប្រឹក្សាកាឌីណាល់ នឹងថ្លែងសុន្ទរកថាទៅកាន់បណ្តាលោកអភិបាលព្រះសហគមន៍មកពីអាស៊ី នៅទីក្រុងម៉ាកាវ នាថ្ងៃទី ៣១ ខែតុលា មុនពេលលោកធ្វើជាអធិបតីក្នុងពិធីអបអរសាទរខួបលើកទី ៤៥០ នៃភូមិភាគម៉ាកាវ។

សុន្ទរកថារបស់លោកកាឌីណាល់ គ្រោងនឹងធ្វើឡើងនៅម៉ោង ១០ ព្រឹក នៅតំណាក់របស់លោកអភិបាលនៃព្រះសហគមន៍កាតូលិកក្រុងម៉ាកាវ ហើយព្រឹត្តិការណ៍នេះគឺជាផ្នែកមួយនៃកិច្ចប្រជុំក្រុមលោកអភិបាលព្រះសហគមន៍នានា ក្រោមការរៀបចំរបស់ការិយាល័យទំនាក់ទំនងសង្គម នៃសហព័ន្ធសភាលោកអភិបាលព្រះសហគមន៍កាតូលិកអាស៊ី (FABC) សម្រាប់ឆ្នាំ ២០២៦។

កិច្ចប្រជុំនេះ ដែលប្រព្រឹត្តទៅចាប់ពីថ្ងៃទី ២៧ ដល់ថ្ងៃទី ៣១ ខែតុលា ត្រូវបានរំពឹងថានឹងប្រមូលផ្តុំបណ្តាអភិបាល និងអ្នកទទួលបន្ទុកផ្នែកទំនាក់ទំនងរបស់ព្រះសហគមន៍ ដើម្បីពិភាក្សាលើប្រធានបទ និងមាគ៌ានៃការរួមដំណើរសម្រាប់ការផ្សព្វផ្សាយដំណឹងល្អនៅអាស៊ី ពោលគឺ «ការផ្សព្វផ្សាយអំពីព្រះគ្រិស្តនៅក្នុងយុគសម័យនៃបញ្ញាសិប្បនិម្មិត (AI)»។

កិច្ចប្រជុំនេះក៏គ្រោងនឹងលើកយកបញ្ហាប្រឈម និងឱកាសដែលកើតចេញពីបញ្ញាសិប្បនិម្មិត មកពិភាក្សាក្នុងបរិបទដ៏ទូលំទូលាយនៃការប្រកាសដំណឹងល្អ និងស្មារតីនៃការរួមដំណើរ (Synodality) នៅក្នុងព្រះសហគមន៍នៅអាស៊ីផងដែរ។

កម្មវិធីនេះរួមមាន វគ្គពិភាក្សាអំពី AI និងការប្រកាសដំណឹងល្អ ការពិចារណាលើការប្រើប្រាស់ AI និងប្រវត្តិ ៤៥០ ឆ្នាំនៃការប្រកាសដំណឹងល្អ និងការទំនាក់ទំនងនៅអាស៊ី ព្រមទាំងមានការធ្វើរបាយការណ៍ថ្នាក់ជាតិ និងការពិភាក្សាជាក្រុម។

បន្ទាប់ពីថ្លែងសុន្ទរកថានៅព្រឹកថ្ងៃទី ៣១ ខែតុលា លោកកាឌីណាល់នឹងអញ្ជើញទៅទស្សនាមជ្ឈមណ្ឌលកាតូលិកម៉ាកាវ និងចូលរួមពិធីអាហារថ្ងៃត្រង់ មុនពេលចូលរួមក្នុងដំណើរធម្មយាត្រាទៅកាន់វិហារតូច។ លោកកាឌីណាល់ក៏នឹងដឹកនាំពិធីថ្វាយអភិបូជាអបអរសាទរខួបនេះ នៅវេលាម៉ោង ៥ ល្ងាចផងដែរ។

ការប្រារព្ធពិធីទាំងនេះ គឺជាការទទួលស្គាល់នូវការរួមចំណែកជាប្រវត្តិសាស្ត្ររបស់ម៉ាកាវ ក្នុងការផ្សព្វផ្សាយសាសនាកាតូលិកនៅទូទាំងទ្វីបអាស៊ី ព្រមទាំងអញ្ជើញព្រះសហគមន៍ក្នុងតំបន់ឱ្យពិចារណាថា តើបេតិកភណ្ឌបេសកកម្មនោះអាចជួយកំណត់ទម្រង់នាអនាគតរបស់ខ្លួនបានយ៉ាងដូចម្តេច។