កម្ពុជាទទួលបានចំណូលជាង ៣២៧ លានដុល្លារអាមេរិក ពីការនាំចេញអង្ករក្នុងរយៈពេល ៥ ខែដំបូង

យោងតាមរបាយការណ៍ដែលចេញផ្សាយដោយសហព័ន្ធស្រូវអង្ករកម្ពុជា (CRF) កាលពីថ្ងៃទី០៥ ខែមិថុនា បានឱ្យដឹងថា ប្រទេសកម្ពុជាបាននាំចេញអង្ករចំនួន ៥៦៨,៩១២ តោន ក្នុងរយៈពេល ៥ ខែដំបូងនៃឆ្នាំ២០២៦ ដោយទទួលបានចំណូលចំនួន ៣២៧.៤៣ លានដុល្លារអាមេរិក។

អង្ករទាំងនោះត្រូវបាននាំចេញដោយក្រុមហ៊ុនចំនួន ៦១ ទៅកាន់ប្រទេស និងតំបន់ចំនួន ៦៣។ កម្ពុជាបាននាំចេញអង្ករចំនួន ១៥៤,២៥៤ តោន ដែលមានតម្លៃជាង ១០៥ លានដុល្លារអាមេរិកទៅកាន់បណ្តាប្រទេសក្នុងតំបន់អឺរ៉ុប, ចំនួន ១៦២,១២៥ តោន មានតម្លៃ ៩៤.៩២ លានដុល្លារអាមេរិកទៅកាន់ប្រទេសចិន និងតំបន់ស្វយ័ត និងចំនួន ២០៨,៥ concert៩៣ តោន មានតម្លៃ ៨៧.៣២ លានដុល្លារអាមេរិកទៅកាន់ប្រទេសជាសមាជិកអាស៊ានចំនួន ៥។

ដោយឡែក អង្ករចំនួន ៤៣,៩៤០ តោនបន្ថែមទៀត ដែលមានតម្លៃ ៤០.០៧ លានដុល្លារអាមេរិក ត្រូវបានដឹកជញ្ជូនទៅកាន់ទីផ្សារចំនួន ២៤ ផ្សេងទៀត រួមទាំងបណ្តាប្រទេសនៅក្នុងតំបន់អាហ្វ្រិក និងមជ្ឈិមបូព៌ាផងដែរ។

អង្ករក្រអូបនៅតែជាមុខទំនិញនាំចេញចម្បង ដោយគ្របដណ្តប់រហូតដល់ ៥៩.២០ ភាគរយ នៃការនាំចេញអង្ករសរុប បន្ទាប់មកគឺអង្ករសមានចំនួន ២២.២៨ ភាគរយ។ សម្រាប់អង្ករសរីរាង្គមានចំនួន ១.០៤ ភាគរយ, អង្ករចំហុយ ១.៧២ ភាគរយ, អង្ករបាក់ (ចុងអង្ករ) ១៥.៥៨ ភាគរយ និងពូជអង្ករផ្សេងៗទៀតមានចំនួន ០.១៨ ភាគរយ។

បន្ថែមពីលើនេះ កម្ពុជាក៏បាននាំចេញស្រូវចំនួនជាង ២.៧៥ លានតោន ក្នុងកំឡុងពេល ៥ ខែនេះផងដែរ ដោយបង្កើតចំណូលបានប្រមាណ ៥៩១.៤១ លានដុល្លារអាមេរិក។

កាលពីឆ្នាំ២០២៥ កម្ពុជា និងចិនបានចុះហត្ថលេខាលើកិច្ចព្រមព្រៀងថ្មីមួយ ដើម្បីបង្កើនកូតានៃការនាំចេញអង្ករកម្ពុជាទៅកាន់ប្រទេសចិនរហូតដល់ ៥០០,០០០ តោន ដែលកើនឡើង ២៥ ភាគរយ បើធៀបនឹងកូតាចាស់ដែលមានចំនួន ៤០០,០០០ តោន។