២០២៤ គឺជាឆ្នាំដំបូង​ដែលសីតុណ្ហភាពឡើងលើសកម្រិតចង់បាន ដែលមិនឲ្យ​លើស​ពី ១,៥ °C

ឥឡូវនេះ វាច្បាស់ថា ២០២៤ គឺជាឆ្នាំដំបូង​ដែលសីតុណ្ហភាពឡើងលើសកម្រិតចង់បាន ឲ្យ ឡើងត្រឹម ១,៥°C បើប្រៀបធៀបនឹងយុគសម័យមុនឧស្សាហកម្ម។

សព្វថ្ងៃនេះ វាច្បាស់ថា ឆ្នាំ២០២៤ គឺជាឆ្នាំដំបូង ដែលសីតុណ្ហភាពមធ្យមពិភពលោកឡើង​លើស​កម្រិតកំណត់ មិនឲ្យឡើងលើសពី ១,៥°C បើ​ប្រៀបធៀបនឹងមុនយុគសម័យ​ឧស្សាហកម្ម។​ នេះគឺជាកម្រិតដែលដាក់ចេញរយៈពេលយូរ​កំណត់ដោយកិច្ចព្រមព្រៀង​ទីក្រុង​ប៉ារីស។ បន្ទាប់ពីខែវិច្ឆិកា ដែលជាខែក្តៅជាងគេនៅលើ​ពិភពលោក សេវាកម្មនៃការប្រែ​ប្រួល​អាកាសធាតុ (C3S) របស់ការអង្កេតពិនិត្យអឺរ៉ុប Copernicus បានប្រកាសកាលពីថ្ងៃទី៩ ខែ​ធ្នូ ឆ្នាំ២០២៤ ថា វាគឺជាការពិតដែលថា ឆ្នាំ២០២៤ គឺ​ជាឆ្នាំដែល​ក្តៅបំផុត​ដែលមិនដែល​ធ្លាប់​បានកត់ត្រា និងឡើងហួសសីតុណ្ហភាព​ដែល​កម្រិត​ឲ្យ​ឡើង​ត្រឹម ១,៥°C នៃកម្រិតមុន​យុគ​សម័យឧស្សាហកម្ម។

កាលពីខែវិច្ឆិកា មានការកត់សម្គាល់ឃើញមាន ព្យុះទីហ្វុង​ដែលបំផ្លិច​បំផ្លាញជាបន្តបន្ទាប់​នៅ​អាស៊ី និងការបន្តគ្រោះរាំងស្ងួតជាប្រវត្តិសាស្រ្តនៅអាហ្វ្រិកខាងត្បូង និងតំបន់អាម៉ាហ្សូន។ សីតុណ្ហភាពឡើង ១,៦២°C ក្តៅជាងមុន នៅខែវិច្ឆិកា ដែលគេគិតដល់សម័យដែលមនុស្ស​ជាតិ​​មិន​​ទាន់ដុតប្រេង​ផូស៊ីល ឧស្ម័ន ឬធ្យូង​ សម្រាប់ធ្វើឧស្សាហកម្ម។ យោងតាមមូលដ្ឋាន​ទិន្នន័យ ERA5 នៃ កូពែរនីគូស បានឲ្យដឹងថា ខែវិច្ឆិកា គឺជាខែទី១៦ ក្នុងចំណោម ១៧ខែមុន ដែល​កត់​ត្រា​ឃើញសីតុណ្ហភាពឡើងមិនធម្មតា លើស ១,៥°C បើប្រៀងធៀបនឹងអំឡុងពេល ពី​ឆ្នាំ​១៨៥០ ដល់ឆ្នាំ ១៩០០។

ការកម្រិតជានិមិត្តរូបនេះ ពាក់ព័ន្ធទៅនឹងកម្រិតដែលប្រកបដោយមហិច្ចតានៃកិច្ចព្រមព្រៀង​ទីក្រុងប៉ារីស ឆ្នាំ២០១៥ ដែលសំដៅ គ្រប់គ្រងការឡើងកម្តៅឲ្យស្ថិតនៅក្រោម ២°C តាមរយៈ​ការបន្តខិតខំប្រឹងប្រែងដើម្បីកម្រិតសីតុណ្ហភាពមិនឲ្យឡើងលើសពី ១,៥°C ។ កិច្ច​ព្រមព្រៀង​នេះ ពីមុនយោងទៅលើនិន្នការរយៈពេលវែង។

ការកម្រិតមធ្យមនៃការកើនកម្តៅ​មិនឲ្យលើសពី ១,៥°C នឹងត្រូវធ្វើការត្រួតពិនិត្យយ៉ាងហោច​ណាស់ ២០ឆ្នាំ ដើម្បីពិចារណាទៅលើកម្រិត​ដែល​មនុស្សអាចគ្រប់គ្រងបាន។

តាមការប្រកាន់យកគោលវិនិច្ឆ័យនេះ អាកាសធាតុសព្វថ្ងៃ បានឡើងប្រមាណ ១,៣°C ។ ក្រុម​អ្នកជំនាញអន្តររដ្ឋាភិបាលនៃអង្គការសហប្រជាជាតិសម្រាប់អាកាសធាតុ វាយតម្លៃថា ការកម្រិត​មិនឲ្យលើសពី ១,៥°C នឹងប្រហែលអាចសម្រេចបាន នៅរវាងឆ្នាំ ២០៣០ និង ២០៣៥។ ចំណែកការវិវត្តន៍នៃការបំភាយឧស្ម័នផ្ទះកញ្ចក់របស់មនុស្សជាតិ ក៏ខិតជិតដល់​ចំនុច​កំពូល ហើយក៏មិនទាន់ថយចុះទេ។

យោងតាមការគណនាពីមុនរបស់អង្គការសហប្រជាជាតិ ពិភពលោកមិនស្ថិតនៅលើផ្លូវល្អទេ នៃការកាត់បន្ថយការបំពុលឧស្ម័នកាបូនិកដើម្បីបញ្ចៀសពីភាពធ្ងន់ធ្ងរដ៏ខ្លាំងក្លានៃគ្រោះរាំង​ស្ងួត រលកកម្តៅ ឬភ្លៀងព្យុះ ដែលគេពិនិត្យឃើញមានរួចហើយ។ ពួកវាធ្វើឲ្យបាត់បង់ច្រើន ទាំង​ជីវិតមនុស្ស និងមានឥទ្ធិពលទៅលើសេដ្ឋកិច្ច។

យោងតាមអង្គការសហប្រជាជាតិខាងបរិស្ថាន បានឲ្យដឹងថា នយោបាយសព្វថ្ងៃនៃ​ប្រជាជាតិ​នានា នាំពិភពលោកទៅដល់ការកើនកម្តៅដ៏មហន្តរាយ ៣,១°C នៅក្នុងសតវត្ស ឬ ២,៦°C ប្រសិន​បើកិច្ចសន្យាត្រូវបានធ្វើប្រសើរ។

ប្រទេសនានាមានពេលរហូតដល់ខែកុម្ភៈ ឆ្នាំ២០២៥ ដើម្បីដាក់ទៅអង្គការសហប្រជាជាតិ អំពី​ការត្រួត​ពិនិត្យ​ឡើងវិញ​នូវគោលដៅរបស់ពួកគេខាងអាកាសធាតុ ពីពេលនេះ រហូតដល់​ឆ្នាំ២០៣៥ ដែលគេ​ហៅថា “ការចូលរួមវិភាគទានដាច់ខាតនៅកម្រិតជាតិ”។