អង្គការសុខភាពពិភពលោកចេញសេចក្តីអំពាវនាវបន្ទាន់ស្វែងរកទឹកប្រាក់ ១,៥ ពាន់លានដុល្លារ ដើម្បីប្រឈមមុខនឹងវិបត្តិសុខភាពនៅឆ្នាំ២០២៥

អង្គការសុខភាពពិភពលោក OMS បានចេញសេចក្តីអំពាវនាវបន្ទាន់ឲ្យមានជំនួយជាទឹកប្រាក់ ១,៥ពាន់លានដុល្លារដើម្បីប្រឈមមុខនឹងវិបត្តិសុខភាពពិភពលោក ដែលមិនធ្លាប់មានពីមុន​នៅ​ឆ្នាំ២០២៥។

ទីភ្នាក់ងាររបស់អង្គការសហប្រជាជាតិបានរាប់ឃើញមានមនុស្សមិនតិចជាង ៣០៥លាននាក់ ដែល​ត្រូវការជំនួយមនុស្សធម៌បន្ទាន់នៅអំឡុងឆ្នាំថ្មីនេះ។

នៅក្នុងសេចក្តីប្រកាសមួយ អង្គការសុខភាពពិភពលោក OMS បានសម្តែង​នូវ​ការព្រួយ​បារម្ភ​ថា ៖ “សង្រ្គាម ការប្រែប្រួលអាកាសធាតុ រោគរាតត្បាត និងការភៀសខ្លួន បានមកផ្តុំគ្នា​ដើម្បី​បង្កើត​បាន​ជាវិបត្តិសុខភាពពិភពលោកដែលមិនដែលមានពីមុន”។

ដើម្បីប្រឈមមុខនឹងតម្រូវការពិសេសដាច់ដោយឡែកនេះ អគ្គនាយកនៃអង្គការសុខភាព​ពិភពលោក លោកតេដរ៉ូស អាដហានូម ហ្គឺប្រឺយេស៊ូស បានចេញសេចក្តីអំពាវនាវជាបន្ទាន់​ដើម្បី​សុខភាពសកលលោក ក្នុងការស្វែងរកទឹកប្រាក់ ១,៥ពាន់លានដុល្លារ ដើម្បីគាំទ្រកិច្ច​អន្តរាគមន៍សម្រាប់​សុខភាពនៅឆ្នាំ២០២៥។

លោកតេដរ៉ូស អាដហានូម ហ្គឺប្រឺយេស៊ូស បានរាប់ឃើញមានតម្រូវការសុខភាពបន្ទាន់ចំនួន ៤២ ដែលកំពុងកើតមានឡើង ហើយក្នុងនេះ វិបត្តិកម្រិត ៣ គឺមានចំនួន ១៧ ដែលជា​សេចក្តី​ត្រូវ​ការបន្ទាន់ធ្ងន់ធ្ងរបំផុត ដែលទាមទារចាំបាច់នូវកម្រិតនៃការឆ្លើយតបខ្ពស់បំផុតដែរ។

នៅខណៈដែលប្រព័ន្ធសុខាភិបាលឈានដល់កម្រិតព្រំដែនរបស់វា និងធនធានហិរញ្ញវត្ថុ​ពិភពលោក​ខ្សោះខ្សោយ ចំនួនទឹកប្រាក់ដែលស្នើសុំនេះនឹងអាចនាំមកនូវជំនួយដល់មនុស្ស​ដែល​ប្រឈមនឹងស្ថានភាព​ដែលលំបាកបំផុត។

នាយកនៃអង្គការសុខភាពពិភពលោក OMS បានថ្លែងថា ៖ “សង្រ្គាម រោគរាតត្បាត មហន្តរាយ​​អាកាស​​ធាតុ​នានា និងសេចក្តីត្រូវការបន្ទាន់ខាងសុខភាពដទៃៗ ទៀត លែងជា​ស្ថាន​ភាព​កម្រ និងតាមរដូវទៀតហើយ។ ពួកវាកើតឡើងមិនឈប់មិនឈរ មានកំណើនឡើង និង​ពង្រីក​វិសាល​ភាពផងដែរ”។ លោកបានបញ្ជាក់ថា ៖ “ជាក់ស្តែង សូម្បីការគ្រប់គ្រងជំងឺរាត​ត្បាត​​កូឡេរ៉ា ឬការផ្គត់ផ្គង់ការគាំទ្រខាងសុខភាពផ្លូវចិត្តនៅក្នុងតំបន់ជម្លោះ ការងាររបស់​អង្គការ​សុខភាព​ពិភពលោក ក៏បានលាតសន្ធឹងលើសពីការព្យាបាលបន្ទាន់ភ្លាមៗ នៅនឹង​កន្លែង​​ហើយ”។

អង្គការសុខភាពពិភពលោកបានសន្យាផ្គត់ផ្គង់ជំនួយសុខភាពបន្ទាន់ មានជាអាទិ៍​នៅក្នុងតំបន់​មានជម្លោះដូចជា សាធារណរដ្ឋប្រជាធិបតេយ្យកុងហ្គោ (RDC) ដែនដីប៉ាឡេស្ទីនដែល​ត្រូវ​ត្រួត​ត្រា និងប្រទេសស៊ូដង់ផងដែរ។

ការឆ្លើយតបរបស់អង្គការសុខភាពពិភពលោកសម្រាប់ស្ថានភាពបន្ទាន់ចុះធ្វើនៅក្នុងក្រប​ខណ្ឌនៃកិច្ចខិតខំប្រឹងប្រែងមនុស្សធម៌ដែលកាន់តែទូលាយ និងផ្តល់អាទិភាពសម្រាប់​ការ​ព្យាបាល​​វេជ្ជសាស្រ្តចាំបាច់ ការព្យាបាល​ការខ្វះខាតសារជាតិចិញ្ចឹម ការគាំទ្រសុខភាពមាតា និងទារក ការដឹកនាំយុទ្ធនាការចាក់វ៉ាកសាំងដើម្បីត្រៀមបង្ការរោគរាតត្បាត និងការថែទាំ​សុខភាព​ផ្លូវ​ចិត្ត​​សម្រាប់ប្រជាជនដែលបានរងផលប៉ះពាល់ដោយភាពភ័យរន្ធត់។

សេចក្តីអំពាវនាវដែលធ្វើឡើងដោយអង្គការសុខភាពពិភពលោក បានបង្ហាញនូវការប្រឈម ៤ សំខាន់ៗ ដែលពិភពលោកសព្វថ្ងៃកំពុងតែប្រឈមមុខ ក្នុងនោះ មាន ការប្រែប្រួលអាកាស​ធាតុ សង្រ្គាម​ ការភៀសខ្លួនរបស់ប្រជាជន និងរោគរាតត្បាត។

ទីភ្នាក់ងាររបស់អង្គការសហប្រជាជាតិ បានថ្លែងដែរថា ៖ “ជាមួយនឹងការគាំទ្រពីម្ចាស់ជំនួយ និងដៃគូ អង្គការសុខភាព​ពិភពលោករំពឹងថា នឹងបំពេញបាននូវតួនាទីពិសេសរបស់ខ្លួននៅ​ក្នុង​​ស្ថានភាពបន្ទាន់នៃវិបត្តិសុខភាព។”