យោងតាមអង្គកាឧតុនិយមពិភពលោក OMM ខែមករា ឆ្នាំ២០២៥ គឺការចាប់​ផ្តើម​នៃ​​ឆ្នាំដែលក្តៅបំផុតមិនដែលធ្លាប់បានកត់ត្រា

យោងតាមសម្រង់ចុងក្រោយនៃវិទ្យាស្ថានអឺរ៉ុប កូពែនីគូស (Copernicus) បានឲ្យដឹងថា ខែ​មករា ឆ្នាំ២០២៥ គឺជាខែមករា ដែលក្តៅបំផុតដែលមិនដែលធ្លាប់បានកត់ត្រា នៅលើពិភព លោក។ ​ទន្ទឹមពេលគ្នានេះដែរ ទីភ្នាក់ងារទទួលបន្ទុកឧតុនិយមនៃអង្គការសហប្រជាជាតិ បាន​ឲ្យ​​ដឹង​ថា វានៅតែក្តៅ ទោះបីជាមានការវិល​ត្រឡប់នៃបាតុភូតអាកាសធាតុឡានីណា (La Nina ដែលអាកាស​ធាតុចុះ​ត្រជាក់​ជាងធម្មតា)។ ជាទូទៅ បាតុភូតឡានីណានេះ សីតុណ្ហភាព​មធ្យម​នៅលើផែនដី​ចុះ​ត្រជាក់ជាបណ្តោះអាសន្ន។

យោងតាមអង្គការឧតុនិយមពិភពលោក OMM ដែលចែករំលែកទិន្នន័យពីវិទ្យាស្ថានអឺរ៉ុប​កូពែរនីគូស (Coperinicus) បានឲ្យដឹងថា កាលពីខែមុន ខែមករា ឆ្នាំ២០២៥ សីតុណ្ហភាព​ឡើង 1,75°C  លើសកម្រិតសីតុណ្ហភាពមធ្យម​មុនយុគសម័យឧស្សាហកម្ម និងឡើង 0,79°C លើស​កម្រិតសីតុណ្ហភាពមធ្យមសម្រាប់ខែមករា ចន្លោះឆ្នាំ១៩៩១ និងឆ្នាំ២០២០។

សីតុណ្ហភាពខ្យល់នៅលើផ្ទៃផែនដីគឺ 13,23 °C ឬ 0,79 °C ឡើងបន្ថែមទៀតលើកម្រិតមធ្យម​សម្រាប់​ខែមករា ដែលវាស់វែងនៅអំឡុងរយៈពេលពីឆ្នាំ១៩៩១ ដល់ឆ្នាំ២០២០។

ខែមករា ឆ្នាំ២០២៥នេះ ក៏ជាខែទី១៨ បន្តបន្ទាប់គ្នាដែលសីតុណ្ហភាពឡើងលើសកម្រិត​កំណត់​មិន​​ឲ្យ​សីតុណ្ហភាព​ឡើងមិនលើស 1,5 °C បើប្រៀបធៀបនឹងសីតុណ្ហភាពមុនយុគសម័យ​ឧស្សាហកម្ម​។

នៅក្នុងសេចក្តីប្រកាសមួយ លោកស្រី សាម៉ានថា បឺហ្ស៉េស មន្រ្តីយុទ្ធសាស្រ្តអាកាសធាតុនៅ​មជ្ឈ​មណ្ឌល​អឺរ៉ុបសម្រាប់ការព្យាករឧតុនិយមរយៈពេលមធ្យម ឬមជ្ឈមណ្ឌល CEPMMT បាន​គូសបញ្ជាក់ថា ៖ ”ខែមករា ឆ្នាំ២០២៥ នេះគឺជាខែដ៏គួរឲ្យភ្ញាក់ផ្អើលមួយទៀត ដែល​បន្ត​ឯកតកម្ម​សីតុណ្ហភាព​ដែលត្រូវត្រួតពិនិត្យឃើញនៅអំឡុង ២ឆ្នាំ ចុងក្រោយនេះ ទោះបី​ជា​មាន​​​ការអភិវឌ្ឍនៃលក្ខខណ្ឌបាតុភូត ឡានីណា នៅក្នុងមហាសមុទ្រប៉ាស៊ីហ្វីកត្រូពិក និង​ឥទ្ធពលរបស់ពួកវាក្នុងការធ្វើឲ្យចុះត្រជាក់ជាបណ្តោះអាសន្នសម្រាប់សីតុណ្ហភាពជាទូទៅនៅលើពិភពលោក។

នៅទ្វីបអឺរ៉ុប សីតុណ្ហភាពមធ្យមសម្រាប់ខែមករា ឆ្នាំ២០២៥ គឺ 1,80 °C ឬ 2,51 °C ឡើង​លើស​​សីតុណ្ហភាព​មធ្យមនៅរវាងឆ្នាំ១៩៩១ និងឆ្នាំ២០២០។

នេះគឺជាសីតុណ្ហភាពមធ្យមឡើងលើសលើកទី២ ខាងកម្តៅឡើង សម្រាប់ខែនេះ បន្ទាប់ពី​ខែ​ម​ករា ឆ្នាំ២០២០ ដែល​នៅពេលនោះសីតុណ្ហភាពមធ្យមឡើងលើស 2,64 °C ឡើងលើស​កម្រិត​មធ្យម។

សីតុណ្ហភាពដែលកើនឡើងខ្ពស់បំផុត នៅលើទឹកដីអឺរ៉ុប ត្រូវបានស្រង់នៅឃើញនៅភាគខាង​ត្បូង និងខាងកើតអឺរ៉ុប ព្រមទាំងភាគខាងលិចនៃប្រទេសរុស្ស៊ី។

ក៏ប៉ុន្តែសីតុណ្ហភាពទាំងនេះ ស្ថិតនៅក្រោមសីតុណ្ហភាពមធ្យមនៅប្រទេសអ៊ីស្ល៉ង់ ចក្រភព​អង់គ្លេស នៅអៀឡង់ និងនៅភាគខាងជើងនៃប្រទេសបារាំង។

ក្រៅពីប្រទេសអឺរ៉ុប សីតុណ្ហភាព​ក៏កើនឡើងខ្ពស់ជាងសីតុណ្ហភាពមធ្យម​នៅភាគខាងឥសាន នៃ​ប្រទេសកាណាដា នៅតំបន់អាឡាស្កា និងនៅស៊ីបេរី។

ពួកវា​ក៏ខ្ពស់ជាងសីតុណ្ហភាពមធ្យមនៅភាគខាងត្បូងនៃទ្វីប​អាម៉េរិកខាងត្បូង នៅអាហ្វ្រិក នៅ​តំបន់​មួយផ្នែកធំនៃប្រទេសអូស្រ្តាលី និងនៅទ្វីបអង់តាកទិក។

ប៉ុន្តែ នៅសហរដ្ឋអាម៉េរិក និងនៅក្នុងតំបន់ដែលស្ថិតនៅចុងបូព៌ាបំផុតនៃប្រទេសរុស្ស៊ី តំបន់ ទ្ចូកូតកា និងកំត្ចាតកា សីតុណ្ហភាពស្ថិតនៅទាបច្រើនប្រើប្រៀបធៀបនឹងសីតុណ្ហភាពមធ្យម។

ទីភ្នាក់ងារកូពែរនីគូស បញ្ជាក់ដែរថា ៖ “ជ្រោយឧបទ្វីបអារ៉ាប៊ីក និងអាស៊ីអាគ្នេយ៍ដីគោក ក៏​កត់​​ត្រា​ឃើញសីតុណ្ហភាពនៅទាបជាងសីតុណ្ហភាពមធ្យមដែរ”។