លោកហ្សង់ ឡឺមៀរ៍ ជាទូតផ្នែកអាកាសធាតុ និងជាអ្នកសម្របសម្រួលឲ្យរដ្ឋាភិបាលនៃក្រុមបរិស្ថានអន្តរជាតិនៃខេត្តកេបិច ប្រទេសកាណាដា ធ្វើការវាយតម្លៃថា ទោះបីមានការសន្យាអំពីការផ្លាស់ប្តូរថាមពលស្អាត ការតាំងចិត្តរបស់រដ្ឋនានា និងការព្រមានដែលកើតឡើងម្តងហើយម្តងទៀតរបស់អ្នកវិទ្យាសាស្រ្ត ការប្រយុទ្ធប្រឆាំងរបស់ពិភពលោកលើការធ្លាក់អន់ថយខាងអាកាសធាតុ បានជួបការបរាជ័យ។
នេះក៏ជាឱកាសមួយសម្រាប់រូបលោកហ្ស៉ង ឡឺមៀរ៍ ដែលជាសិល្បករភាពយន្ត ជាអ្នកជីវសាស្រ្ត និងសព្វថ្ងៃក្លាយជាទូតសន្តិភាពផ្នែកអាកាសធាតុ និងបញ្ហានៅផែនដីភាគខាងជើង ដើម្បីមកពិភាក្សារឿងរ៉ាវបរិស្ថានអំពីទសវត្សមួយ ដែលបានកន្លងផុតទៅ។
រយៈពេលច្រើនជាង ១០ឆ្នាំបន្តិចកន្លងទៅ សិល្បករភាពយន្តរូបនេះធ្លាប់បានបញ្ចប់នូវគម្រោងឯកសារជាភាគ ដែលមានចំណងជើងថា ១០០០ថ្ងៃ សម្រាប់ភពផែនដី ដែលកុនឯកសារនេះបានចងក្រងសភាពនៃតំបន់ស្ថានជីវចម្រុះ និងការគំរាមកំហែងសំខាន់ៗខាងបរិស្ថាន រួមទាំងការគំរាមកំហែងពីការឡើងកម្តៅអាកាសធាតុដែលមិនអាចប្រកែកបាន និងបណ្តាលមកពីសកម្មភាពរបស់មនុស្ស។ នៅជំនាន់នោះ សហគមន៍អន្តរជាតិធ្លាប់បានចុះហត្ថលេខាលើកិច្ចព្រមព្រៀងទីក្រុងប៉ារីស ដែលបានផ្តល់នូវជំហានដែលប្រកបដោយមហិច្ចតាក្នុងការប្រយុទ្ធប្រឆាំងនឹងការកើនកម្តៅនៃភពផែនដី។ ដោយក្លាយជាបេសកជនសម្រាប់ការប្រែប្រួលអាកាសធាតុ និងបញ្ហានៅផែនដីភាគខាងជើង នៃរដ្ឋបាលកេបិច នៅឆ្នាំ២០១៧ លោកហ្ស៉ង់ ឡឺមៀរ៍ ធ្លាប់បានសង្ឃឹមថា កិច្ចព្រមព្រៀងដ៏មិនធ្លាប់មាននេះ អាចអនុញ្ញាតឲ្យយើងកំណត់ការធ្លាក់អន់ថយខាងអាកាសធាតុឲ្យនៅក្នុងកម្រិតដែលមនុស្សនៅអាចរស់រានបាន។
ថ្ងៃនេះ លោកបានអធិប្បាយថា ព្រឹត្តិការណ៍ជាក់ស្តែងមិនមានករណីបែបនេះទេ។ លោកបានព្រមានថា ៖ “គេមាននូវកិច្ចព្រមព្រៀងទីក្រុងប៉ារីស និងមាននូវការតាំងចិត្តជាច្រើន ដែលត្រូវបានប្រកាន់យក។ ទោះបីជាបែបនេះ គេក៏នៅតែធ្វើដំណើរទៅកាន់ការកើនកម្តៅច្រើនជាង ៣°C ដដែល។”
យោងតាមការវិភាគនៃក្រុមអ្នកជំនាញអន្តររដ្ឋាភិបាលលើការវិវត្តន៍នៃអាកាសធាតុ GIEC បានឲ្យដឹងដែរថា ការកើនឡើងខ្ពស់នូវសីតុណ្ហភាពមធ្យមបែបនេះ នឹងធ្វើឲ្យពិភពលោកលោកលែងអាចមើលយល់។ រឿងនេះនឹងធ្វើឲ្យធ្លាក់ថយចុះនូវគុណភាពជីវិត និងអាយុសង្ឃឹមរស់របស់មនុស្ស និងបង្កើតជាសង្រ្គាមដើម្បីដណ្តើមនូវធនធានចាំបាច់សម្រាប់ជីវិត និងការកើនឡើងនូវអសមភាពសង្គម។ល។
លោកឡឺមៀរ៍ បន្ថែមថា ការកើនកម្តៅគឺកាន់តែរហ័សនៅក្នុងតំបន់ភាគខាងជើងនៃផែនដី និងក៏រួមមានតំបន់អាកទិក និងអង់តាកតិកផងដែរ។ លោកបាននិយាយថា ៖ “នេះគឺបេះដូងនៃម៉ាស៊ីនអាកាសធាតុដែលកំពុងរត់ធ្លាក់ផ្លូវ”។ លោកក៏បានរំឭកអំពីប្រព័ន្ធបរិស្ថានដែលបានរងវិបប្លាសដែលមិនអាចជួសជុលបានដោយវិបត្តិអាកាសធាតុ។ នៅមុនមួយថ្ងៃនៃទិវាពិភពលោកសម្រាប់សមុទ្រ ដែលបានប្រារព្ធឡើងនៅថ្ងៃទី៨ ខែមិថុនា លោកក៏បានលើកឡើងអំពីឥទ្ធពលនៃការរលាយទឹកកកសមុទ្រនៅតំបន់ប៉ូល ដែលបានវាយប្រហារមួយទំហឹងទៅលើស្ថានជីវចម្រុះបរិស្ថាន។
បើតាមលោកហ្ស៉ង់ ឡឺមៀរ៍ វាគឺជាការបរាជ័យប្រាកដណាស់។ តាមធម្មតា យើងគួរតែបានជោគជ័យក្នុងការធ្វើឲ្យការប្រយុទ្ធប្រឆាំងនឹងការក្តៅឡើងនៃអាកាសធាតុ ដែលវាជាអាទិភាពលើអាទិភាពទាំងអស់។ ប៉ុន្តែយើងបានបរាជ័យ។
ហើយអ្វីជាលទ្ធផល? យើងពិតជាត្រូវរងការគំរាមកំហែង។ មានគេនិយាយប្រាប់លោកឡឺមៀរ៍ ថា គាត់ជាគឺមនុស្សមហន្តរាយនិយម នៅពេលលោកប្រើភាសាទាំងនេះ។ ប៉ុន្តែអ្វីដែលវិទ្យាសាស្រ្តបានបង្ហាញយើងនៅខណៈនេះ គឺថា យើងពិតជាស្ថិតនៅក្នុងស្ថានភាពមហន្តរាយមែន។
Daily Program
