ប៉ាគីស្ថាន ភ្លៀងព្យុះសម្លាប់មនុស្ស ៥៤នាក់ ក្នុងរយៈពេល ២៤ម៉ោង

យោងតាមអាជ្ញាធរគ្រប់គ្រងគ្រោះមហន្តរាយប៉ាគីស្ថាន បានឲ្យដឹងថា ជាសរុប មានមនុស្ស​ប្រមាណ ១៨០នាក់ រួមមាន ៧០នាក់ គឺជាកុមារ បានស្លាប់ ហើយមានមនុស្ស ៥០០នាក់ រង​របួស​ចាប់តាំងពីការចាប់ផ្តើមនៃរដូវភ្លៀងមូសុង។

កាលពីចុងសប្តាហ៍ អាជ្ញាធរ បានជួយសង្រ្គោះដល់ប្រជាជនដែលជាប់នៅក្នុងទឹក និង​បាន​​ឲ្យ​ដឹងថា មនុស្សជាង ៥០នាក់ បានស្លាប់ក្នុងរយៈពេល ២៤ម៉ោង នៅក្នុងភ្លៀងព្យុះដែល​វាយ​ប្រហារ​ប្រទេសប៉ាគីស្ថាន ដែលនាំឲ្យអ្នកស្លាប់ឡើងដល់ប្រមាណ ១៨០នាក់ ចាប់តាំងពី​ការ​​ចាប់​ផ្តើមរដូវភ្លៀងមូសុង។

ចាប់តាំងពីថ្ងៃពុធ ទី១៦ ខែកក្កដា ភ្លៀងព្យុះ បានបោកបកមិនឈប់ឈលើផ្នែកជាច្រើននៃ​ខេត្ត​​ពេនចាប ប្រទេសប៉ាគីស្ថាន ដែលជាខេត្តដែលមានប្រជាជនរស់នៅច្រើនបំផុតនៅក្នុង​ភាគ​ខាង​កើតជាប់ព្រំដែនឥណ្ឌា និងបង្កបានជាទឹកជំនន់ភ្លាមៗ និងការបាក់រលំផ្ទះសម្បែង។

អាជ្ញាធរគ្រប់គ្រងគ្រោះមហន្តរាយបានអធិប្បាយថា ៖ “២៤ម៉ោង ចុងក្រោយនេះ មនុស្ស ៥៤​នាក់ បានស្លាប់ និង២២៧នាក់ រងរបួសនៅទូទាំងប្រទេសប៉ាគីស្ថាន ហើយខេត្តពេនចាប រាប់ឃើញ​មានជនរងគ្រោះច្រើនជាងគេ”។

យោងតាមអាជ្ញាធរសហព័ន្ធ បានឲ្យដឹងថា​ ជាសរុប មានមនុស្សប្រមាណ ១៨០នាក់ និង​កុមារ ៧០ នាក់បានស្លាប់ និង ៥០០នាក់ រងរបួសចាប់តាំងពីដើមរដូវភ្លៀងមូសុងនា​ដំណាច់​ខែ​មិថុនានៅប្រទេសនេះ។ ភាគច្រើននៃជនរងគ្រោះ បានស្លាប់នៅក្នុងការបាក់ដំបូល ឬ​ការ​ដួល​រលំនៃជញ្ជាំងផ្ទះរបស់ពួកគេ ការនាំទៅដោយទឹកជំនន់ភ្លាមៗ ឬការឆកខ្សែភ្លើង។

នៅជិតទីក្រុងរ៉ាវ៉ាល់ពីនឌី ដែលមានចម្ងាយប្រមាណ ២០ គម ពីរដ្ឋធានីអ៊ីស្លាមម៉ាបាដ ការ​ជម្លៀស​ប្រជាជនត្រូវបានរៀបចំធ្វើឡើង ប៉ុន្តែប្រជាជនខ្លះត្រូវបានជាប់ផុងនៅពេលទឹក​ឡើង។ លោកតារីក ម៉េប៊ូដ ដែលជាកសិករដែលរស់នៅភាគខាងត្បូងទីក្រុង រ៉ាវ៉ាលពីនឌី ខេត្ត​ពេនចាប ប្រទេសប៉ាគីស្ថាន បានរៀបរាប់ថា ៖ “ក្មេងៗ ស្រែកឲ្យគេជួយ និងស្រីៗ​ឡើង​ទៅ​​នៅលើដំបូលផ្ទះ គ្រវីសញ្ញា ដើម្បីអង្វរសុំការជួយសង្រ្គោះ”។ បុរសម្នាក់ដែលមានវ័យ ៥១ឆ្នាំ ដែលបានហៅការជួយ​សង្រ្គោះ បានរៀបរាប់ថា ៖ “នេះគឺគួរឲ្យភ័យខ្លាចណាស់។ សមាជិក​គ្រួសារដែលជាប់ផុងក្នុងទឹកបានយំមិនឈប់មិនឈរ”។.

អាជ្ញាធរទីក្រុង រ៉ាវ៉ាល់ពីនឌី បានប្រកាសថា ៖ “ប្រជាជនដែលរស់នៅក្នុងតំបន់​ដែល​មាន​ហានិភ័យ​ត្រូវត្រៀមបង្ការសម្ភារៈរស់រានមានជីវិត​ជាមួយចំណីអាហារ ទឹក និងថ្នាំពេទ្យ​សម្រាប់​​រយៈ​​ពេលពី៣ ទៅ ៥ថ្ងៃ”។

សេវាកម្មជាតិឧតុនិយមព្យាករថា ហានិភ័យនៃភ្លៀងដ៏សម្បើម និងលទ្ធភាពនៃការកើត​ទឹក​ជំនន់​ភ្លាមៗ ស្ថិតនៅកម្រិតខ្ពស់ក្នុងរយៈពេលក្រោយទៀត។ ប្រទេសប៉ាគីស្ថានគឺជាប្រទេស​មួយ​​ក្នុងចំណោមប្រទេសនានាលើពិភពលោក​ដែលងាយរងគ្រោះបំផុតពីឥទ្ធពលនៃការ​ប្រែប្រួល​អាកាសធាតុ ហើយប្រជាជន​របស់ខ្លួន​ចំនួន ២៥៥លាននាក់បានទទួលរងនូវ​ព្រឹត្តិការណ៍​អាកាសធាតុហួសហេតុដែលមានកាន់តែញឹកញាប់ឡើងៗ។

កាលពីខែឧសភា មនុស្ស ៣២នាក់ បានស្លាប់ និងជាង ១៥០នាក់ បានរងរបួស​នៅក្នុង​ព្យុះ​ដ៏​ខ្លាំងក្លា​នៅក្នុងប្រទេស។

រដូវភ្លៀងមូសុង បាននាំមកនូវការធ្លាក់ភ្លៀងពី ៧០% ដល់ ៨០% ជាប្រចាំឆ្នាំនៅតំបន់អាស៊ី​ខាង​ត្បូង​នៅ​រវាងខែមិថុនា និងខែកញ្ញា។ ភ្លៀងមានសារសំខាន់​សម្រាប់កសិកររាប់លាននាក់​នៅ​​ក្នុង​តំបន់ដែលមានមនុស្សរស់នៅ ២ពាន់ លាននាក់។ ប៉ុ​ន្តែប្រទេសប៉ាគីស្ថាន​នៅ​ស្ថិត​នៅ​ក្នុង​ការ​​លំបាក​នៅឡើយបន្ទាប់ពីទឹកជំនន់​ដ៏បំផ្លិចបំផ្លាញ​នៅឆ្នាំ២០២២ ដែល​បានប៉ះ​ពាល់​ដល់​​ប្រជាជន​ខ្លួនជាង ៣៣លាននាក់ ហើយភោគផល​កសិកម្មមួយផ្នែកធំ​ត្រូវបានបាត់បង់​។